छत्तीसगढ़ी उपन्यासःचन्द्रकला

लेखक परिचय

2006-07-02T02:01:00.000-07:00

डॉ.जे.आर.सोनी
(Dr.J.R.SONI)

जन्म तिथि
08.06.1954

जन्म स्थान
ग्राम टिकारी, बिलासपुर

शिक्षा
एम.ए.(लोक प्रशासन), विधि स्नातक, व्यवसाय प्रबंध डिप्लोमा, पी.एच.डी

पुरस्कार/सम्मान

0डॉ. अम्बेडकर साहित्य सम्मान
0नई दिल्ली-1994, हिंदी सेवी सम्मान
0ग्वालियर-1996, सत्यध्वज साहित्यकार सम्मान
0भिलाई-1996, दीपाक्षर साहित्य सम्मान भिलाई 1999
0भारतीय कलाकार संघ सम्मान, 1999
0दुर्ग जिला हिंदी साहित्य समिति-1999
0गायत्री शक्तिपीठ सम्मान दुर्ग-1999,
0बाबू रेवाराम साहित्य सम्मान रतनपुर-1999
0प्रयास प्रकाशन सम्मान बिलासपुर-1999,
0विक्रम शीला विद्यापीठ से वाचस्पति सम्मान- 1999
0जेमिनी अकादमी पानीपत, आचार्य की मानद उपाधि,
0म.प्र. लेखक संघ-आंचलिक साहित्यकार सम्मान- 2000
0सहस्राब्दी हिंदी सम्मान,
0राजेश्वरी प्रकाशन साहित्य सम्मान, गुना
0सृजन सम्मान 2000 उज्जैन,
0मेघानाथ कन्नौजे स्मृति सम्मान 2001,
0बिलासा कला सम्मान 2002
0राष्ट्रभाषा सम्मान 2002
0सृजन सम्मान रायपुर 2003
0साहित्य वैभव सम्मान बालाघाट 2006

कृतियाँ –

-सतनाम के अनुयायी- सतनाम की दार्शनिक पृष्ठभूमि
-बबूल की छाँव
-नगमत
-पछतावा
-रंग झांझर
-मारीशस-एक लघु भारत
-श्रीलंका-यात्रा संस्मरण

।।छत्तीसगढ़ी रचनाएं ।।

-मोंगरा के फूल
-मितान
-उढ़रिया
-चन्द्रकला

विदेश भ्रमण

मारीशस, श्रीलंका

संप्रति

संयुक्त संचालक, नगरीय प्रशासन एवं विकास, रायपुर, छ.ग.

पता –
डी-95, गुरुघासीदास कॉलोनी, न्यू राजेन्द्र नगर रायपुर (छत्तीसगढ़)
मोबाईल-98271-11018, फोन-0771-2429644, निवास- 4966826

------------------------------------------------------------------------------------------------
------------------------------------------------------------------------------------------------

2006-07-01T17:17:00.000-07:00

लोकार्पण पर्व पर

आपका हार्दिक अभिनंदन

परम आदरणीय

श्री देवी प्रसाद वर्मा, वरिष्ठ साहित्यकार, रायपुर

श्री रमेश नैयर, संचालक, छ.ग. हिंदी ग्रंथ अकादमी, छ.ग.

श्री बबन मिश्र, अध्यक्ष, बख्शी सृजनपीठ, भिलाई

डॉ. मन्नू लाल यदु, वरिष्ठ भाषाविद्, रायपुर

डॉ. विनय पाठक, वरिष्ठ साहित्यकार एवं शिक्षाविद्, बिलासपुर

डॉ. महेश चन्द्र शर्मा, वरिष्ठ संस्कृताचार्य, भिलाई

डॉ.परदेशी राम वर्मा, वरिष्ठ कहानीकार, भिलाई

श्री शिवशंकर शुक्ल, छत्तीसगढ़ी उपन्यासकार, रायपुर

श्री गिरीश पंकज, संपादक, सद्-भावना दर्पण, रायपुर

श्री शंकर पांडे, वरिष्ठ पत्रकार, रायपुर

श्री रामावतार तिवारी, अध्यक्ष प्रेस क्लब, रायपुर

श्री सुधीर शर्मा, प्रकाशक, वैभव प्रकाशन, रायपुर

समस्त साहित्यकार साथी

एवं

पत्रकार गण

मेरा सौभाग्य है कि आपकी ऐतिहासिक उपस्थिति एवं गवाही में मेरी कृति चंद्रकला’ (छत्तीसगढ़ी उपन्यास) का लोकार्पण विश्वजाल पर प्रेस क्लब जैसे महत्वपूर्ण मंच पर हो रहा है । मैं इस अवसर पर सृजन-सम्मान, छत्तीसगढ़ के सभी सदस्यों का भी आभार मानता हूँ जिनके लगन और अभियान के बल पर यह कृति आज से संपूर्ण विश्व के पाठकों के लिए उपलब्ध हो सकेगी । मैं आपका आभार मानता हूँ ....

प्रेस क्लब, रायपुर
दिनांक- 2 जुलाई, 2006
रविवार

डॉ. जे. आर. सोनी

पीछे जायें

भाग-सत्रह

2006-06-27T13:08:00.000-07:00

चन्द्रकला देवी ह मंत्रालय म सरकारी कामकाज निपटा के बंगला आईस । चन्दादेवी के फोन आईस कि, दीदी मोर सास के तबियत ठीक नई हे मंय भोपाल से सारंगढ़ जाथंव । चन्द्रकला देवी कथे, बहिनी महूँ ह एक-दू दिन म रायगढ़ जाहूं कहत हंव । चुनाव घलो तीन महीना म होवईया हे । पार्टी ह टिकट तो दे देही । चन्दा देवी कथे, दीदी ठीक हे चुनाव तो लड़बो, हारिन या जीतीन । मुख्यमंत्री जी हा वादा तो करे हे जे विधायक हे, ओला जरूर टिकट मिलही । आधा घंटा तक सुख-दुःख के बात करीन । चन्द्रकला देवी ह हाथ मुँह धोके चाय नास्ता करत रईथे, दू-चार झन भेंट करईया से मुलाकात घलो करथे । सिरफ विधानसभा के टिकट मंगाईया, बायोडाटा थमा के चले जावय । प्रदेश भर से हजार से जादा आवेदन पत्र मिलगे रहय । बीस पच्चीस झन समर्थक लेके मंत्री अउ पार्टी अध्यक्ष के बँगला, आफिस म पहुँच जावय । कहय, विधानसभा म चुनाव मही ह भारी बहुमत से जीतहंव के दावा करय । सब ल टिकट के आस्वासन देवय के तोही ल टिकट मिलही । चन्द्रकला देवी रात म भोजन करके सो जाथे ।

चन्द्रकला देवी रात म भयानक सपना देखते, सपना म पुस्पा देवी पांड़े के मिथिया म दब गे हे, बचावव-बचावव कहत हे । चन्द्रकला बेटी मोला बचा ले कहत हे । चन्द्रकला देवी बचा नई पावव, पसीना से लथपथ हो जथे । का अपसुगन सपना देखे हंव । ठीक रात के चार बजे रहय, उठ के एक गिलास पानी पीईस अउ पसीना ल पोछीस । चन्द्रकला देवी सोंचिस, अब दाई ह जादा दिन के मेहमान नई ए । रात म नींद नई पड़ीच, समाचार पत्र पढ़े लगीस । दू-चार पत्रिका ल पलट के देखथे । बँगला म मार्निंग वाक घास म पैदल चलत रहय । मन म सोचत रहय, अब घर म का होत हे, अभी सात बजे टेलीफोन से बात करहूँ ।

चन्द्रकला देवी ह रायगढ़ फोन लगाईस, पुस्पा देवी ह फोन उठाईस । दाई परनाम चन्द्रकला देवी कथे । पुस्पा देवी कथे, जीयत रह बेटी । घर के हाल-चाल पूछथे, सब ठीक के कहिस । पुस्पा देवी कथे, बेटी दौनामांजर ह लदबदाय हे, नव महीना होवत हे । चले-फिर नई सकत हे । पेट ह बने जुड़वा लइका हे अइसे लगत हे । आधा घंटा से फोन म बात करिच । फोन ल काट देते । चन्द्रकला के हाय जीय होइच । सब बने-बने हे । सपना म का सपना डारे हंव, मन थोड़ा हलका लगिच । चपरासी चाय ले आथे, चन्द्रकला देवी चाय बिस्टिक खाथे । समाचार पत्र पढ़े लगथे, पलंग म जाके सो जाथे । हलका नींद पड़ जाथे । दस बजे सो के उठथे । स्नान ध्यान करके कार्यालय म आ के बईठ जाथे । दस बीस झन भेंट करईय़ा से मुलाकात करथे । बंगला म मंत्रालय जाके फाईल निपटाथे । साम 5 बजे बंगला आ जाथे चन्दा देवी के फोन आथे, दीदी मंय घर जाथंव, जय सतनाम । चन्द्रकला कथे जय सतनाम । चन्दा देवी भोपाल से छत्तीसगढ़ एक्सप्रेस से बिलासपुर से रायगढ़ ट्रेन म जाथे, रायगढ़ से सारंगढ़ बस म जाथे ।

चन्दा देवी जईसे घर पहूँचथे, पता चलथे सब झन काठी म गय हे । चन्दा देवी के सास काल साम 7 बजे के मर गे रहय । रमसीला ह चन्दा भउजी के गला मिलके खूब रोईच । चन्दा देवी घलो बहुत रोईच । रोवई म आँखी फूल गे रहय अड़ोसी-पड़ोसी मन ढांढस बंधाईन, सांत्वना देईन । टूरा-पिला, पूरस मन काठी देके, माटी देके आके तरिया म बईठे हे कहिच । समारू अउ ओकर भाई दुकालू ह दाई ल माटी देके आय रहय । बड़ दुःख लगत रहय । दाई के मरे ले घर सुन्ना होगे रहय । दाई ह लाठी धरे दुवारी म बईठे रहय, सटका धरे रहय त कोई दुवारी म घूस नई पावय । डोकरी बने कड़क रहय । कोई बदमासी करय तेला सटका म मार देवय । समारू सोच-सोच के आँसू ढरकावत रहय । अब घर के रखवारी कोन करही । अतका कन धन दौलत, खेत-खार, कुँआ बारी ल कोन देखही । मन झुंझवावत रहय । समारू के नाता-गोता मन समाझाईन । तरिया के पार म पीपर छाँव म बईठे अगोरत रहय ।

रमसीला कईथे, भउजी दाई के काठी पड़गे हे, चला नहाय ल तरिया । घर के बड़े सियान ह आगू रथे । चन्दा देवी बड़की हे । आगू-आगू चन्दा, रामसीला पाछू पाछू लाईन से पचास झन महिला मन नहाय निकलीन । तरिया घाट गईन । रमसीला के आदमी ह उरई ल लाके गड़िया दे रहय । चन्दा ह नहा के उतई म पाँच चुरूवन पानी सिंचिस अउ परनाम करिच । कहिस, दाई अतका दिन ले तोर अचरा के छाँव म रहेन, जुड़ावा, सितरावा । दुःख तकलीफ म सहायता करव । माई लोगन के नहाय के बाद म पुरू, मन असनादीन अउ उरई म पाँच चुरूवन पानी डारिन, परनाम करके जुड़ावा, सितरावा पुरखा मन कहीन । सब पुर्ष मन पानी सिंचथे, परनाम करथे, समारू ह आगू-आगू गईच, पाछू-पाछू सब झन । घर के दुवारी म बाल्टी म पानी रखे रहय । पानी म पाँव धोईन अउ सरीर म सिंचिन । समारू ह हाथ जोड़ परनाम करीच । सब झन अपन अपन घर चल देथे । घर म परिवार के मन बाच जथे । रमसीला अउ चन्दा मिलके भोजन पकाथे । मेहमान-पहुना मन ला जेवाथे । जेवन से पहिले समारू ह पत्तल दोना म दार-भात, पानी दुवारी म दाई के हिस्सा रख देथे । पहुना मन संग बईठ के जेवन जेथे । पुरूस के बाद महिला पहुना मन ल खवाथे । खवा-पिया के अंगना म बईठ जथे ।

चन्दा देवी ह समारू ल कथे, दस नाहवन कब होही । समारू बताथे रविवार पड़ही । चन्दा कथे सोक-पक्ष छपवा ले । सारंगढ़ अउ सरिया क्षेत्र के महिला मन ल खवाय ल पड़ही । समारू ह शोक पत्र लगभग पाँच सौ धापे बर प्रिंटिंग प्रेस म बोल देथे । समारू ह घर के दुबराज धान, पच्चीस बोरा कुटवा लेथे । एक बोरा उड़द, एक बोरा राहोर दार अउ दू बोरा तिवरा दार दरवा ले रहय । दसकरम के तियारी चलत रहय । चन्दा देवी ह फोन म चन्द्रकला देवी ल निमंत्रण देथे । पूरनिमा ल जबलपुर फोन करथे । चन्द्रप्रकास अउ डॉ. प्रेमलता के पिताजी एम. एल. भारद्वाज, डिप्टी कलेक्टर दुर्ग ल फोन से सूचना देथे । जतका नता-गोता अउ जान पहिचान वाले हे, ओमन सोक-पत्र देथे । समारू ह सारंगढ़ से टेंट मंगाथे, पंडाल लगवा दे रहय । रायगढ़ से रसोईया बुलवा ले रहय । लगभग तीन हजार आदमी के भोजन बेवस्था करे रहय ।

समारू अउ चन्दा के नेता-गोता मन सुकवार, सनिवार के आगे रहय । घर ह भरे रहय । ईतवार के दिन बारह बजे महिला मन नहा के तालाब से आगे रहय । पुरुष मन घलो नहा के आगे । ठीक एक बजे मंगल, चौंका आरती के कार्यक्रम बिलासपुर से आये पंडित रामाधीन सुरू करथे । मंगल गीत भजन एक घंटा चलिस । चोकहार म अंगन म भोजन करे बईठ जाथे । नरियर प्रसाद चढ़ाथे । नरियर के प्रसाद बांटे बर देथे । एक दोना पत्तल म खीर, पूड़ी, दाल भात, लड्डू, बरा, सोंहारी, मोहन भोग पंडित रामाधीन देथे । समारू ह दुवारी के बाहर गली म रखे देथे । दोना म पानी दे देथे, दाई तंय पहिली परसाद पा । अतके दिन के संग म रहे बर रहिस । अंगना म आके भोजन परसागे रहय । समारू ह दूनों हाथ जोड़के भोजन करे बर परनाम करिच, भोजन पावा कहिस । सब पहुना मन ल परछी, कोठार म बईठार के भोजन कराथे ।

चन्दा देवी ह सब महिला मन ल भोजन कराथे । चन्द्रकला देवी ह चार बजे आथे । सब महिला मन से मिलथे अउ संग म बईठ के भोजन करथे । चन्दा देवी ह पूछ पूछ के भोजन कराथे । लगभग पाँच हजार आदमी मन भोजन करथे । चन्दा देवी के वाहवाही हो जाथे । अतका आदमी ल कोई नई भोजन कराय रहीन । भोजन करके सब महिला, पुरूस मन पहुना मन घर चल देथे । दिन म खाना पीना होगे रहय । समारू ह दसकरम के संग भांजा अउ गुरू बिदा घलो कर दे रहय । चन्द्रकला देवी ह रात दस बजे तक रहीस, रात म रायगढ़ चल देथे ।

रात आठ बजे से चौका आरती, मंगल भजन के कार्यक्रम सुरू होथे । रात भर चौका होथे, जय सतनाम, गुरू घासीदास बाबा के गुनगान होथे। घर, गाँव सतनाम मय होगे रहय । मंगल भजन सुबह पाँच बजे तक चलत रहीच । सब चौकहार मन ल पाँच सौ एक रूपिया चन्दा देवी ह भेंट देथे । जीप म बईठ के बिलासपुर भेज देथे । सब पहुना मन चाय पीके अपन-अपन घर चल देथे । समारू के सगा संबंधी मन रूक गे रहय । समारू ह टेंट अउ रसोईया के हिसाब-किताब कर देथे । चन्दा देवी रात भर जागे रहय । दिन के बारह बजे तक सोवत रहय । समारू ह खाय बर जगाईच । आँखी ल रमजत उठीच । सब पहुना चले गिन, चन्दा पूछीच । समारू कथे, हाँ सब चल दीन ।

चन्द्रप्रकास अउ एम. एल. भारद्वाज जीप म रायपुर अउ दुर्ग चल देथे । सब पहुना एकेक करके झर जथे । घर सुन्ना के सुन्न हो जथे । चन्दा देवी चुनाव के तियारी घलो करत रहीस । चन्दा देवी ह मधु, सरला, क्रांति ल लेके सारंगढ़ क्षेत्र के गाँव के दउरा कर बर गीच । लगभग बीस गाँव के महिला मन से मिलिच । सब समर्थन दीन । गाँव-गाँव के मतदाता सूची घलो कार्यकर्ता मन ल दिवाईच । चुनाव के तियारी सुरू होगे । गाँव-गाँव के दीवार म लिखे के सुरू हो रहय । चन्दा देवी ह धूल-धक्का म सनाय रहय । गाँव-गाँव, घर-घर, दुवारी म हाथ जोड़ के वोट माँगय । अच्छा समर्थन मिले ल लगिच । चन्दा देवी के पक्ष म हवा चल गिस । सरपंच अ पंच मन चन्दा देवी ल टिकट देय पर पार्टी से माँग करीन । चन्दा देवी टिकट बर आस्वस्त होगे । रायगढ़ म जिला कमेटी से वर्तमान विधायक मन ल टिकट देय बर प्रस्ताव पारित करके हाई कमान ल दिल्ली भेज देथे । चन्दा देवी अउ चन्द्रकला देवी के टिकट पक्का होगे रहय ।

चन्दा देवी सारंगढ़ क्षेत्र के दउरा करके चन्द्रकला देवी से मिले रायगढ़ बस म चल देथ । संग म मधु भी रहय । चन्द्रकला देवी निवास म मिल जथे । चन्द्रकला कथे, चल बहिनी पार्टी कार्यालय जाके देख लेथन, काकर नाव भेजे गे हे । पार्टी के निरदेस अनुसार जिलाध्यक्ष ह वर्तमान विधायक मन ल टिकट देय के अनुसंसा करके भेज देय रहय । ओकर कापी चन्द्रकला देवी अउ चन्दा देवी ल देथे । मधु कथे, महूँ ल सरिया से टिकट देवव । चन्द्रकला देवी ल नई मिलही त मोला टिकट देवावव । अध्यक्ष महोदय कथे, वर्तमान विधायक, मंत्री के रहत दूसर ले टिकट नई मिलय । चन्द्रकला देवी अउ चन्दा देवी के टिकट पक्का होगे । पार्टी ओही मन ल टिकट देही । चन्दा देवी कथे, बहिनी मधु दीदी के रहिते कईसे तोला टिकट मिलही । मधु कथे, मंय तो मजाक करत हंव । मंय तो अभी नगर पालिका के अध्यक्ष हंव । तीन साल अभी कार्यकाल बांचे हे । चन्द्रकला देवी कथे, बहिनी अभी काम करे के अवसर मिले हे । नगर के बिकास के काम करावव । भोपाल चलके अनुदास रासि स्वीकृत करावव । मधु कथे दीदी बिना कुछ दिये अनुदान रासि नहीं मिलय । चन्द्रकला कथे, बहिनी जो भी लगय रासि ले आवव । एडजेस्ट करा लेहा । कोन अपन घर से देहा, नगर पालिका से निकाल लेहा । मधु कथे, जब भोपाल जाहा त महूँ ल ले जाहव ।

चन्द्रकला देवी अपन निवास आ जाथे । पुस्पा देवी, रमौतीन, बेटी के भोजन के अगोला म बईठे रहय । पुस्पा कथे, बेटी अतका देरी कईसे कर देय । चन्द्रकला कथे, दाई पार्टी कार्यालय गे रहेन, देरी होगे । चन्दा अउ मधु घलो साथ म हे । दू थाली अउ लगा । चन्दा पूछथे, बहू के का होईच । दौनामांजर ह थाली म भोजन ले के आईच । बड़ पेट निकले रहय । चन्दा के पाँव परिस । दीदी अब दिन लकठियागे, आठ दिन के भीतर हो जाही । चन्दा कथे, चन्द्रकला दीदी ऐकर पेट म जुड़वा बच्चा हावय अईसे लगत हे । दौनामांजर कथे, चन्दा दीदी देक तो कहाँ लुकाय हे । चन्दा ह कान लगा के सुनथे पेट ल छूथे । दू मुड़ी जानत रहय । दौनामांजर चलत फिरत बच्चा जनमही कहत रहय । चन्दा कथे, अब ऐला अस्पताल म भरती करा देवव, पेट ह सिंधियागे हे, दू-चार दिन म पीरा उठ जाही । पुस्पा अउ रमौतीन दाई ह भोजन परोसथे । खाना खाके चन्दा अउ मधु रायगढ़ से सांरगढ़ चल देथे ।

दौनामांजर के रतिहा पीरा उसल गे । कहिना रमरमावत (दरद) रहय । पुस्पा रमौतीन दाई, चन्द्रकला ह दौनामांजर ल चलावत रहीन । दरद बाढ़बे नई करीच । बिहनिया होगे । दौनामांजर ल नहवाईन, शौच कराथे । चाय-नास्ता घलो कराईन । दरद ह थोड़-थोड़ बाढ़त रहय । चिल्लाई शुरू कर दीच । चन्द्रकला कथे, दाई हो दौनामांजर के पीरा ह बाढ़त हे, अस्पताल म भरती करा देथंव । रमौतीन कथे, बेटी लईका के मुड़ी हे तीरम आगे हे । बने जोर से कांखही त लईका बाहर आ जाही । चन्द्रकला सिरहाना म बईठ के ढांढस बंधावत रहय । दौनामांजर बने जोर के धक्का दे, लईका के मुड़ी ह दिखत हे । चन्द्रकला ह छू के देखथे । पुस्पा दाई ह दूनों हाथ ले रास्ता ला चौड़ा करथे, जेमा बच्चा लउहा निकल जाय । दौनामांजर प्रसव पीड़ा म कल्पत रहय । पसीना-पसीना होत रहय । पुस्पादेवी अउ रमौतीन कथे, बेटी पीरा ह बाढ़गे बने जोर से धक्का दे । दौनामांजर दाई मन के हिम्मत से बने जोर के चिल्लाईच, मंय मर गेंव दाई हो, जोर से धक्का दीच । लईका के मुड़ी बाहर होगे । रमौतीन दाई ह दूनों हाथ डार के लईका ल बाहर निकालथे । दौनामांजर के हाय जी ह हलका लगिच । पाँच मिनट के बाद म पीरा उठगे । कसके धक्का लगाईच, दूसर लईका बाहर आगे । दाई, माँ बचावव । पुस्पा ह लईका ल पकड़के खीचिस, नोनी बेटी आय रहीस । रमौतीन ह बड़े लईका के हाथ पाँव ल दबावत रहीस । लईका ह ऐंव-ऐंव रोय लगीच । दूनो लईका ह स्वस्थ, सुन्दर, तगड़ा रहय । पुस्पा अउ रमौतीन लईका ल सम्हारत रहय । चन्द्रकला ह गरम पानी गिलास म दौनामांजर ल पिलाईच पसीना अउ पीरा म अधमरा होगे हरय । चन्द्रकला ह हवा देईच कुछ देर बाद म होस आईच ।

रामदेव ह सुनईन दाई बुलाय हे कहिके बैकुंठपुर चल देथे । दाई नवा पत्ती से नाल काट के दूनो लईका ल अलग-अलग करथे । दौनामांजर के चेत पानी सींचे ले आथे । कपड़ा ल सम्हारे लगथे । चन्द्रकला कथे, अभी सोय रहय । दाई ह साफ-सफाई करके दौनामांजर ल कपड़ा पहिना के पलंग म सुला देथे । चन्द्रकला ह चाय बिस्कुट खवाथे । दौनामांजर एकदम ठीक होगे रहय । बातचीत घलो कर लगीच । दाई ह दूनो लईका ल दिखाथे अउ पास म सोवा देथे । दौनामांजर ह दूनों लईका ल छूईच अउ पियार करीछ । दूनों लईका मन माँ के स्पर्श ले गरम-गरम हवा ले नींद म सो जथे । तब तक दाई हर घर के साफ सफाई कर डारे रहय । चन्द्रकला ह लेडी डाक्टर अउ सिसु रोग विशेषज्ञ ल फोन करके बुलवा ले रहय । डॉक्टर मन जच्चा-बच्चा ल स्वस्थ कहीन । यदि कोई तकलीफ होही त बुला लेहा । डॉक्टर मन समझा के चल देथे । चन्द्रकला देवी दौनामांजर के सेवा म लग गे रहय । पुस्पा अउ रमौतीन दाई ल खिलौना अउ वंस चलाय बर बेटा मिल गे रहय ।

रामदेव अउ कामदेव, चन्द्रसेवन बहुत खुस होईन । रमौतीन आस-पड़ोस म लड्डू बंटवाथे । बच्चा मन ल मिठाई देथे । बड़ दिन के बाद म घर म लईका जनम होय रहय, ओहू म जुड़वा बेटा अउ बेटी । दुगुना खुसी होय रहय । चन्द्रसेन बहुत खुस रहय । तीन घंटा बाद लईका मन जागीच अउ ऐंव-ऐंव रोय लगीन । रमौतीन ह कथे, लईका मन भूख म रोवत हे । दौनामांजर ल जगाईच, बेटी उठ अ लईका मन ल दूध पिलाव । दौनामांजर ल कथे, बेटी ढेठी ल गरम पानी म धोले मईल ह निकल जाही । थोरक दबाके ढेंठी ल । दूनों ढेठी म धूध भरे रहय । एक ढेंठी ल बेटा के मुँह मा डारिच । चुमुल-चखल के दूध पीय लगथे । मस्त दूध पी के सोय लगथे । दूसर ढेंठी ल बेटी के मुँह म ओधाथे । चखल-चखल करके दूध पीये लगथे । पेट भर दूध पी के दाई के गोदी म सो जाथे, दौना मांजर ह दूध पिलाके सो जाथे ।

चन्द्रकला देवी ह फोन करके दुबारा पूरनिमा ल बताथ, चन्द्रसेन के जुड़वा लईका होय हे । कालि तंय ह रायगढ़ आ जा । चन्द्रप्रकास ल रायपुर फोन म बताथे । दुर्ग म चन्द्रप्रकास के ससुन ल छट्ठी के नेवता देथे । चन्द्रसेन ह दमउदहरा जाके ससुर अउ सास ल बताथे, बड़ खुस होथे । छट्ठी के नेवता चन्द्रकला देवी ह सरिया अउ सारंगढ़ के महिला मन ल देथे । चन्दा देवी ह मधु के संग पहिली के आगे रहय । सबे सगा-संबंधी, जान-पहिचान वाला मन ल नेवता दे देथे । चन्द्रकला देवी ह छट्ठी के तियारी म लग जथे । टेंट वाला ल पंडाल लगाय बर बोल देथे । रसोईया ल दू हजार आदमी के पकवान, भोजन बनाय के आदेस दे देथे । छट्ठी के तियारी पूरा हो जथे । दौनामांजर ल छः दिन म गरम पानी से ओखद जड़ी बूटी डाल के पकाय पानी म नहवाथे । नवा लूगरा, पोलखर पहिना के घर के कुल देवता, तुलसी चौरा म अगबत्ती, धूप-जला के पूजा कराथे । दौनामांजर ह पुस्पा, रमौतीन, रामदेव, कामदेव, चन्द्रकला देवी, चन्दा देवी, पूरनिमा, अपन ददा अउ दाई अउ सब बड़ सियान के पाँव छू के पैलगी करिच । सब आसीस दीन, दूधो नहाओ, पूतो फलो । चन्द्रकला देवी ह छाती से लगा के माथा ल चूम लेथे । घर म आनंद मंगल होत रहय । घर म धून-धड़ाका होत रहय । दौनामांजर ल दूबराज धान के भात-दार, मुनगा-बड़ी के साग भोजन म देईन । घर म सुद्ध घी से बनाय लड्डू जेमा काजू, किसमिस, बादाम छोहारा, लौंग, इलायची डाले गे रहय । करायत, तिल, अलसी, सोंठ के लड्डू, घी म बनाय रहय । माँजर ह थोरिक थोरिक चीख के देखिच । कांके पानी बड़े ओखद जड़ी-बूटी, खस औसधियुक्त पेय पीईच । सब पहुना मन ल काके पानी, लड्डू, दार-भात, सब्जी, हजार आदमी मन ल खवाईच । मस्त सुवागत सतकार करीन । चन्दा देवी अउ मधु मन बढ़िया सोहर गीत घलो गाईन अउ नाचिन । पूरनिमा, प्रेमलता, चन्द्रकला देवी लईका मन ल गोदी म ले के मस्त नाचिन, आनंद मंगल मनाईन ।

रायगढ़ सहर के नेता, अधिकारी, कर्मचारी अउ कलेक्टर, पुलिस अधीक्षक, तहसीलदार, एस. डी. एम., थानेदार सब मैडम ल बधाई दीन । चन्द्रसेन ल बधाई दीन । भोजन करके सब अपन-अपन घर जल देथे । निकट के नातेदार मन रात रूकथे । बांचे मनखे मन रात तक घर चल देथे । चन्दा देवी अउ मधु सरिया के मन जीप म सांरगढ़, सरिया चल देथे । मस्त चहल-पहल घर म रहय । चन्द्रप्रकास अ पूरनिमा के चार-चार बच्चा मन धमा-चौकड़ी मचाय रहय । घर भरे लगय । घर म खुसी आनंद मंगल रहय । बहुत अकन भेंट, रूपिया-पईसा, कपड़ा, खिलौना, लूगरा मिले रहय । छट्ठी के खवाई-पियाई रात तक चलत रहीच ।

चन्द्रकला देवी ह सबके हिसाब-किताब चुकता करथे । सब पहुना मन ल चन्द्रसेन ह धोती, लूगरा, गमछा, लूंगी भेंट म देथे । दौनामांजर के दाई-ददा मन ह खुस होगे । अतका खरचा करबो त हमर खेत बेचा जाही । हमन तो गरीब किसान ठेठवार आन । अईसे ताम झाम नई कर सकन । बहुत अच्छा, बड़ नाम कमाही बेटी मंतरी ह । मजा आ जथे, देख के आदमी मन ल । खुसी म फूले नई समावत रहय, रामदेव अ कामदेव । पुस्पा देवी ह बेटा ल पावय अउ रमौतीन ह बेटी ल बढ़िया लोरी सुना-सुना के सुलावय, बढ़िया खिलौना मिल गे रहय, दूनों दाई के रहत माँजर ल कोई तकलीफ नई होवय ।

दौनामांजर ल बारा दिन म बरही नहवाईन । महिना भर गरम पानी म नहावय । धीरे-धीरे सरीर पक्का होत गईच, पहिली जईसे सरीर होगे । बढ़िया पुष्टिवर्धक लड्डू दवाई खाईच जल्दी देह ह भर गय । शरीर ह पेट ह पहिली जईसे होगे रहय । दूनो लईका मन पेट भर दूध बी के सोवत रहय । माँजर ह घरके काम बूता घलो करे लागय । माँजर के दूनों ढेठी म दूध भरे रहयष कमी नई होवय । चन्द्रसेन डेयरी के धन्धा म लग जाथे । फार्महाउस से अनाज, धान, राहर, चना, सरसों, गन्ना, फल, केला, पपीता आ जावय । बढ़िया खाता-पीता घर होगे रहय । पुस्पा अउ रमौतीन डोकरी मन लईका ल रोये नई देवय, बारी-बारी ले सब झन पावय ।

चन्द्रकला देवी ह नगर पालिका के जन्म-मृत्यु पंजीयन के कर्मचारी ल बुला के पंजीयन करवा देथे । बेटा के नाम राजेन्द्र प्रसाद अउ बेटी के नाम कमलाबाई लिखवा दीच । चन्द्रकला देवी के घर टिकट मंगईया मन के भीड़ जुटे लगीच । पूरा छत्तीसगढ़ से पारटी कार्यकर्ता मन आय लगीन । सबो के आवेदन ले के बायो डाटा लेके, पारटी कार्यालय भेज देवय । हर समय भीड़ बने रहय ।

चुनाव आयोग ह चुनाव तिथि के घोसना कर देथे । पैंतालिस दिन पहिली राजपत्र म छप जथे । चुनाव के तारीख पक्का हो जथे । नामांकन के तारीख म चन्द्रकला देवी अउ चन्दा देवी अपना समर्थक महिला नेता मन ल ले के नामांकन परचा भर देथे । दिल्ली म कार्यसमिति के बैठक म पूरा विधायक मन ल टिकट देय के घोसन हो जाथे । दूर दिन समाचार पत्र म चन्द्रकला देवी ल सरिया क्षेत्र से अउ चन्दादेवी ले सांरगढ़ से टिकट मिले के खबर छपे रथे । पुरूस वर्ग के नेता मन बहुत विरोध करके पारटी छोड़ देथे, पर पारटी ह नीतिगत निरनय ल नई छोड़य । वर्तमान विधायक ल पारटी टिकट देथे । चन्द्रकला देवी अउ चन्दा देवी के नामांकन ल सही पाथे । विरोधी पक्ष के नेता मन नया चेहरा ल टिकट देथे । सरिया विधानसभा क्षेत्र से चन्द्रकला देवी, रामचन्द्र चौधरी, जवाहर-नायक उम्मीदवार रहय ।

सारंगढ़ विधानसभा क्षेत्र से चन्दा देवी वारे, सत्ता पक्ष से, विपक्ष से सेरसिंह, निरदलीय राम भजन जोलाहे उम्मीदवार रहय । नामांकन वापस ले बर सोचें रहय । कई निरदलीय महिला मन भरे रहय । मान-मनोवल से नाम वापस ले लेथे । चुनाव के महासमर म चन्दा देवी कूद जाथे । पहिली चुनाव के अनुभव ह काम आईच । गाँव-गाँव, गली-गली, घर-दूवारी म वोट मांगय । रात-दिन धूल-धक्कड़ म फदके रहय । बड़ भिनसार चाय पी के निकल के रात 12 बजे के बाद रात म घर आवय । न खाये पीये के फिकर न नहाय धोय के । चन्दा देवी चुनाव के महासमर म कूद पड़ीच । समारू ह चुनाव के कमान ल सम्हारे रहय । मधु ह नगर पालिका क्षेत्र के जवाबदारी लेय रहय । गाँव गाँ के महिला मंजल ल सक्रिय करके चुनाव के प्रचार म लगा देय रहय । सारंगढ़ क्षेत्र के हर गाँव के एक राउंड दउरा एक हफ्ता म चन्दा देवी पूरा करीच । पाँच ठन जीप, टेक्टर, कार, चुनाव प्रचार म लगाय रहय । चुनाव कार्यालय गाँव गाँव म गाँव के महिला मन चंदा देवी के पक्ष म पीरा कसके चुनाव समर म कूद गे रहय । चन्दा देवी ह पोस्टर, बेनर के बेवस्था अउ रूपिया, पईसा, खाय पीये के बेवस्था घलो कर देय रहीस ।

चन्द्रकला देवी ह रायगढ़ से सरिया म निवास बना ले रहीस । सरिया म चुनाव कार्यालय खोल दे रहिस । चुनाव के कमान पुस्पा दाई सम्हारे रहाय । पूरनिमा ह जबलपुर से आ गे रहय । कामदेव कका, गफ्फार चाचा, अमृत जोसी चुनाव प्रचार करत रहय । लगातार गाँव गाँव घर-घर अंगना म बईठक, आम सभा लेवय । परछी, चंउरा, चौपालगुड़ी, म धुआंधार प्रचार करत रहय । चन्द्रकला देवी ह दस जीप, सायकल, मोटर सायकल, टेक्टर, बैलगाड़ी चुनाव प्रचार म लगाये रहय । सरिया क्षेत्र, चुनावी पोस्टर बैनर से पट गे रहय । सरिया क्षेत्र म चन्द्रकला देवी के पक्ष म हवा चल गीस । सब महिला मन चुनाव प्रचार म कूद गीन । बहुत बढ़िया समरथन मिलत रहय । चन्द्रकला देवी ह महिला ससक्तिकरण बर अच्छा-अच्छा काम करे रहय । गाँव के विकास, उद्योग, कृषि, बागवानी, सिंचाई, स़ड़क, रोजगार धंधा म बहुत काम कराय ले चन्द्रकला देवी के जय जयकार होत रहय । सरिया म एक तरफ हवा बह गे । चारों मुड़ा चन्द्रकला देवी ल जीताय के समर खाईन, बढ़िया चुनाव प्रचार चलत रहीस ।

सरिया म चुनाव कार्यालय म भंडारा खोल दे रहय, कार्यकर्ता मन भोजन कराय अउ चुनाव प्रचार म जावय । सुबह खाना खा के जावय अउ आधा रात म आवय । अच्छा माहौल बन गे रहय . चन्द्रकला देवी ह बड़े नेता के संग सभा म रहय । चुनाव मतदान दिन सब मतदान केन्द्र म महिला एजेंट रहय । जादा से जादा महिला मन मतदान करीन। सरिया क्षेत्र म महिला मतदान के प्रतिसन 90 होईस अउ पुरूस मन के 60 प्रतिसत वोट पड़ीच । चन्द्रकला देवी, मतदान केन्द्र के वोट के धांधली झन होवय कहिके देखत रहीस ।

सारंगढ़ विधानसभा क्षेत्र म मतदान पचास प्रतिसत वोट पड़ीच । चन्दा देवी के पक्ष म हवा चले रहय । महिला मंडल के सदस्य मन अधिक से अधिक महिला मन वोट डालवाय रहय । चन्दा देवी जीत के प्रति आस्वस्त होगे । मत पेटी, सांरगढ़ से रायगढ़ कलेक्टर कार्यालय म जमा हो जथे ।

चन्द्रकला देवी के भाग्य के फैसला, मत पेटी म बंद हो जथे । सरिया क्षेत्र म जबरदस्त मतदान के चरचा समाचार पत्र अउ टी. वी. म आय रहय । चन्द्रकला देवी जीत के प्रति आस्वस्थ रहय । पुस्पा दाई ह चुनाव के कोसाध्यक्ष रहीस । बढ़िया सब कार्यकर्ता मन खुस रहय । सब ला भोजन, डीजल, पेट्रोल के पईसा माँग अनुसार देवय । कार्यकर्ता मनु के उत्साह ह बढ़े रहय । चन्द्रकला देवी पस्त हो गे रहय । धूल धक्कड़, धाम म चेहरा मुरझा गे रहय । छप्पन साल म एकदम सौ साल के डोकरी कस दिखत रहय, सब कोई पहिचान नई पावय । दूसर दिन सुघ्घर साबुन से रगड़ रगड़ के नहाईच । केस ल सेम्पू से धोईच अउ काला रंग के मेंहदी लगाईच, चेहरा म क्रीम लगाईच अउ भोजन करके मस्त एक नींद सोईच । एक महीना के थकान ह दूर होईच ।
चन्दा देवी के चुनाव के कोसाध्यक्ष समारू रहय । पहिली चुनाव म घलो समारू ह देखे रहिस । अच्छा अच्छा चुनाव के काम निपट गे रहय । चन्दा देवी थकान से चूर हो गे रहय । दरद के गोली खाके सोईच । दिन भर सोवत रहिगे । समारू ह सबके हिसाब किताब करिच ।

कलेक्टरेट, रायगढ़ म मतगनना होईच । प्रथम चक्र से चन्दा देवी अउ चन्द्रकला देवी आगू चलत रहीस । आखिरी चक्र म कई वोट मिले रहीस । चन्दा देवी ह बारह हजार से अधिक मत से जीत हासिल करीछ । चन्द्रकला देवी ह बीस हाजार मतों से विजयी होईच । दूनों महिला मन अपन सीट ल बरकरार रखीन । जय जयगार होगे, चन्द्रकला देवी के । भारत निर्वाचन आयोग से विजयी होय के परमाण पत्र कलेक्टर जिला निर्वाचन अधिकारी ह चन्द्रकला देवी ल देईच अउ बधाई दीच । चन्दा देवी ल विजयी घोसित करीच । प्रमाण-पत्र देईच अउ बधाई घलो दीच ।

चन्द्रकला देवी अउ चन्दा देवी के जीत के खुसी म विजयी जुलुस रायगढ़ नगर म निकलिच । बधाई देवईया मन के तांता लगे रहय । रंग गुलाल, बैंड बाजा सहित विजय जुलूस पारटी कार्यालय से बाजार होके निवास स्थान समाप्त होईच । चन्द्रकला देवी सबो झन ल लड्डू बांटथे । जबरदस्त जुलूस रहय । पूरा सहर उमड़ पड़े रहय का लईका अउ का सियान । मजा आगे । घर म खुसी छा जथे । पुस्पादाई, रमौतीन, चन्द्रसेन, रामदेव, कामदेव, एम. ए. गफ्पार भाई, कृस्नचंद भारद्वाज झूम झूम के नाचिन, गाईन अउ मौज मस्ती मनाईन । चन्द्रकला देवी सब ल धन्यवाद करीच । सरिया अउ सारंगढ़ से आये महिला मंडल के सदस्य मन हिरदे ले आभार व्यक्त अउ धन्यवाद देईच । सब अपन घर जीप म बईठ के चल देथे ।

चन्दा देवी ह सांरगढ़ के महिला अउ पुरूस कार्यकर्ता मन ल तीन जीप म ले जाथे । सारंगढ़ म विजय जुलूस रात म निकलिच । रंग, गुलाल, ढोल-तासा बाजत रहीस । जुलूस, सहर घूम के रानीसागर निवास म खतम होईच । सब ल चन्दादेवी ल लड्डू बांटिच । हाथ पांव के अंगना के जैतखाम म अगरबत्ती जला के पूरा करीच । माटी के दीया जला के रखीच । जय सतनाम बाबा गुरू घासीदास जी की जय बोलाईच । आकास गूंज उठीस । बाबा जी के परनाम माथा टेक के करीच अ माँगिच, बाबा जी सहायता करबे । मय तो तोरे भरोसा हंव, समारू अउ पूरा परिवार मिलके पूजा आरती करथे । घर म आनंद खुसी छा गे रहय ।

दूसर दिन अखबार म सत्ता पक्ष के करारी हार के समाचार पत्र छपे रहय । मध्यप्रदेश के मुख्मंत्री सहित आधा दर्जन मंत्री, विधायक चुनाव हार गे रहय । सत्ता प के करारी हार से मुख्यमंत्री के जवाबदारी लेते हुए मंत्रीमंडल भंग करके मुख्यमंत्री पद से इसतीफा, राज्यपाल महोदय ल भेज देथे । राज्यपाल महोदय ह मुख्यमंत्री के निर्वाचन तक काम चलाऊ मुख्यमंत्री बने रहे के आग्रह करथे ।

चन्द्रकला देवी ह मंत्री पद से इसतीफा भेजवा देथे । प्रोटोकाल के कार अउ स्टाफ ल वापस कर देथे, विधायक रहिहूं कहिच । चन्दा देवी ह सब हिसाब किताब अउ सब कार्यकर्ता मन ल धन्यवाद घलो गाँव गाँव जाके देईच । पाँच साल के बात फेर वोट देहा कहिके निवदन करीच । चन्दा देवी ह भोपाल जाय बर रायगढ़ आ जाथे । चन्द्रकला देवी के निवास म आ जथे । पुस्पा देवी, रामदेव, कामदेव, रमौतीन, चन्द्रसेन, दौनामांजर मन विधायक जीत के आय ले बधाई दीन । चन्द्रकला देवी ह चुनाव आयोग ल व्यय के हिसाब घलो भेज देथे । दूसर दिन रायगढ़ से भोपाल जाय बर बिलासपुर चल देथे . बिलासपुर से भोपाल छत्तीसगढ़ एक्सप्रेस म चल देथे । ट्रेन म नव निर्वाचित विधायक मन से परिचय होते । नवा-नवा विधायक चुन के जात रहय । चन्द्रकला देवी अउ चन्दा देवी वारे, वरिष्ठ विधायक बनगे रहय । सब कोई नमस्कार परनाम करीन । गपसप करत बिलासपुर से भोपाल सुबह 6 बजे पहुँचीन । चन्दा देवी के संग समारू रहय . दो आटो म विधायक विसराम गृह पहुँचीन । चन्द्रकला देवी ह चाय पी के अपन बँगला, चौहत्तर बँगला चल देथे । चौकीदार, चपरासी मन दरवाजा खोलथे । चपरासी ल चन्द्रकला देवी बोलथे, सब समान ल पेक करके रख दो मंय बंगला एक-दू दिन म खाली कर देहूँ । पूरा बँगला खाली रहय । सुनसान, भूत बँगला जईसे खाली लगत रहय । मंत्री के बोर्ड, झंडा निकल गे रहय । स्टाफ के घलो ट्रांसफर होगे रहय ।

चन्द्रकला देवी ह लउहा स्नान करके पूजा पाठ, अगरबत्ती जलाईस । तियार हो के विधान सभा भवन चल देथे । विधानसभा सत्र म सपथ ग्रहण, नव निर्वाचित विधायक मन ल राज्यपाल महोदय, विधानसभा अध्यक्ष महोदय ह सपथ दिलवाथे । साम के वक्त विधायक दल के बैठक म बहुमत वाले पारटी के नेता ल मुख्यमंत्री चुने जाथे । दूसर दिन राजभवन म राज्यपाल महोदय ह मुख्यमंत्री अउ मंत्रीमंडल के सदस्य ल सपथ कराथे । चन्द्रकला देवी विपक्ष म जाके बईठ जाथे ।

चन्दा देवी अउ चन्द्रकला देवी, विधानसभा भवन के बंगला आ जाथे । चन्द्रकला देवी ह विधायक विसराम गृह म चन्दा देवी के पास के कमरा ल आबंटन करा लेथे । चन्द्रकला देवी ह सब समान ल पेक करा डरे रहय . एक मेटाडोर म समान विधायक बिसराम गृह भेजवा देथे । बंगला के चाबी पी. डब्ल्यू. डी. के आफिस म जमा कर देथे । चन्दा देवी अउ चन्द्रकला देवी, न्यू मार्केट से साग भाजी, मीठा, खारा, नमकीन लेके निवास म पहुँच जथे । समारू ह सब समान ल जमवा देथे । चन्द्रकला देवी पड़ोसिन हो जथे ।

चन्दा देवी कपड़ा बदल के रंधनी म पहुँच जथे । बढ़िया दार-भात, सब्जी पकाथे । चन्द्रकला देवी ल भूरी ह खाना खाय ल बुलाथे, चल बड़ी माँ भोजन खाय बर । चन्द्रकला देवी, भूरी, कुसुवा, चन्दा देवी, समारू एके संग बईठ के भोजन करीन । खाना खा के गप मारत बईठे रहय । लईका मन सोगे । समारू घलो सोवत रहय । चन्दा देवी अउ चन्द्रकला देवी गप मारत-मारत सोचे लगथे । चन्द्रकला कथे चन्दा बहिनी, हमर दाई-ददा मन हमन के नाव चन्द्रकला ला सोच के धरीन होही, सोंच तो भला । चन्दा कथे दीदी मंय तो सउघे चन्द्रमा मोर नाव हे । चन्दा के सीतल किरण से सांति मिलथे । दिन के सूरज के घाम म आदमी तप जथे, परेसान हो जथे । सोचथे कब सूरज डूबे अउ चन्दा के सीतल, ठंडी किरण मिले । चन्द्रकला कथे बहिनी, तंय समूचा चन्दा आच, पर मंय तो ओकर कला आँव । जईसे परिवार, दूज, तीज, चौथ, पंचमी, षष्टी, सप्तमी, अष्टमी, नवमीं, दसमी, अकादशी, द्वादसी, त्रयोदसी, चौदस, अमावस, पूरा अंधकार, कृष्ण पक्ष । सुक्ल पक्ष फिर वही क्रम अंतिम म पूनम के चांद । जईसे चन्दा के कला हावय वईसे ये मोर जीवन म अंधियार उजियार होईस । चन्द्रकला के आँखई ले आँसू झरर-झरर बहे लगथे । चन्दा कथे, का बात हे दीदी । चन्द्रकला कथे, बहिनी, मालूराम जी के याद आगे । दू साल से जादा होगे, संसार ल छोड़े । जब तक जीयत रहिस, का नई करे हे । सब कुछ ओकरे बनाय आय । मंय तो मंवरी रहेंव तभो ले एक ठन कुरिया घलो नई बनाय सकेंव ।

चन्दा देवी कथे, दीदी, मालूराम जी बने आदमी रहिस । तब तंय ह लोग, लईका के परयास काबर नई करे । चन्द्रकला कथे बहिनी, ओह पहिली ले बाल-बच्चेदार आदमी रहीस । ओला बच्चा नई चाहत रहीस । मंय भी सोचेव मंदिर के बिहाव ल समाज नई स्वीकारय । ओकरे सेती मंय ह नसबंदी आपरेसन करा डारे हंव, नई तो मोरो कई ठन लईका दनादन हो जातिच । चन्दा बहिनी, मोर किस्मत म प्रसव पीड़ा अउ लईका के सुख नई लिखे हावयष तब तो मंय बगठी हंव । उल्ला सांड़ जईसे घूमत-फिरत हंव . अब मरे के बेला मोला कोन पानी देही । मोर जतन कोन करही । सरीर अभी चलत-फिरत हे, जे दिन थाउ, अचल पड़ही त कोन जतनही । अब तो परिवार के जादा जरूरत हे, जवानी म खा पी लेंव ।

चन्दा कथे दीदी, जईसे जवानी कटिस, वईसे बुढापा घलो कट जाही । अब पेंसन घलो बढ़िया मिलही जीये लाईक ।कई झन पाले पोसे बर सेवा करईया मिल जाही । चन्द्रसेन भाई तो हे । चन्द्रकला कथे बहिनी, पुस्पा दाई, रमौतीन, रामदेव अउ कका कामदेव के उमर सौ बरिस जादा एक सौ पाँच बरिस होगे हे । सब एक संग आगू पाछू जाही । चन्दा कथे दीदी, सबे ल एक दिन जाना हे । अब तो पाँच साल तक राज कर सकत हन । पाँच साल तक भोपाल म रह सकत हन । चन्द्रकला कथे बहिनी, जब ले मोर संग धरे हंव मोला फायदा होय हे । चन्दा कथे दीदी, ऐ तो सतनाम साहेब के किरपा हे । कहाँ सोचत रहेन कि हमू मन एक दिन गोबर थपई से विधानसभा पहुँच जाबो । ऐ तो हमर किस्मत म लिखे रहीस, विधायक बन के ।

चन्द्रकला देवी ह गपसप मारत-मारत कलाई के घड़ी ल देखथे, रात के साढ़े दस बज के रहय । चन्दा बहिनी चल सोबो, काल जल्दी विधान सभा जाना हे । चल आज अतका गपसप मारे काली अ बईठको । चन्द्रकला देवी अपन कमरा म जाके सो जाथे । चन्दा देवी बाथरूम से हाँथ-पाँव धोके जाथे । समारू के नींद पड़गे रहय । चन्दा हे जगाथे, सोगे का जी । समारू कथे, हां थके रहेंव नीदं पड़गे । चन्दा ह कथे बच्चा मन सोगे के नहीं, देखथे सब सोगे रहय । चन्दा कथे, आज तेल मालिस कर भई । दो-तीन महीना म आज मिल हे । चन्दा देवी ह नरियर तेल निकाल के रखथे समारू ह आंखी ल रमजत-रमजत उठीच । चन्दाकथे मोर पीठ, कनिहा म तेल लगा के मालिस कर जी । चन्दा ह उलाट सो के मालिस पीठ, कमर म कराथे । बने दबा-दबा के मालिस कराईच । समारू कथे थक गेंव जी । चन्दा कथे, दे मंय तेल मालिस कर देथंव । पीठ, कमर, हाथ पाँव म तेल मालिस करथे । चन्दा के देंह एकदम गरम हो जाथे । मस्ती करके चंदा सांत हो जाथे । आत्मिक सुख के अनुभव करथे । समारू घलो आनंद लेके सो जाथे ।

चन्द्रकला देवी के रात म नींद नई पड़ीच, रात ऐती ल ओती कलथस करीस । चन्द्रकला देवी ह दिमाग म सेसे जीवन के काली छाया के चिंता सताय लगिच । चिंता के कारन रात म नींद नहीं पड़ीच । बिहंचे उठके मार्निंग वाक म सड़क म निकलगे । दो-तीन किलोमीटर घूमे गईच अउ वापिस आगे । तब तक चन्दा देवी के दरवाजा खुल गे रहय । समारू ह अखबार पढ़त हय । भूरी अउ कुसी ब्रस करत रहय । चन्दा देवी रंधनी म चाय बनावत रहय । अदरक, लौंग, इलाइची, कूटत रहय । चन्द्रकला देवी रंधनी म पहुँच जाथे । पीढ़हा म बईठ के रंधनी मचाय पीईन । समारू बर चाय भेजथे । भूरी अउ कुसुवा रंधनी म आ के बईठ के चाय संग म पीइन । बहुत बढ़िया चाय बनाय रहय, मजा आ गे चाय पीये म ।

चाय पीके चन्द्रकला देवी ह फ्रेस होय चल देथे । चन्दा देवी अउ समारू साग-भाजी के तियारी म लग जथे । लईका मन बर पोहा के नास्ता बनाथे । चन्दा देवी ह विधानसभा जाय बर स्नान करके तियारी करे लगथे । चन्द्रकला देवी लूगरा पोलखर पहिन के आ जाथे । चन्दा देवी अउ चन्द्रकला देवी पोहा के नास्ता करके विधानसभा जाय बर सड़क म आ जथे । पैदल चल के विधानसभा पहुँच जाथे । विधानसभा म मुख्यमंत्री ह सब मंत्री मंडल के सदस्य मन के परिचय कराथे । विधायक मन टेबल पीट के सुवागत करथे । विधानसभा म पूर्ण बहुमत मिल गे रहय । विधानसभा अध्यक्ष घलो सत्ता पक्ष के रहय । विधान सभा उपाध्यक्ष, विपक्ष के वरिष्ठ सदस्य ल बना दिये जाथे । विधान सभा म मुख्यमंत्री जी द्वारा भोज दिये जाथे । दोपहर भोजनावकास म हास-परिहास कर भोज समाप्त हो जाथे । चन्दा देवी अउ चन्द्रकला देवी हर रेल्वे कूपन, बस कूपन, टेलीफोन एवं अन्य सुविधा के माँग करथे । अउ विसराम करे बर विसराम गृह आ जाथे । चन्द्रकला देवी कथे बहिनी, नींद लगत हे मंय जांथव सोहंव । चन्दा कथे ठीक हे महूँ सो जाथंव एक घंटा सो जाथे । चन्द्रकला ह पाँच बजे तक सोवत रईथे ।

चन्दा देवी के फोन नम्बर म चन्द्रसेन, रायगढ़ से फोन करथे अउ रोवत-रोवत बताथे दीदी, रायगढ़ सहर म रबड़ी खाय ले पचास आदमी बीमार हो के अस्पताल म भरती हे । होटल से पुस्पा दाई ह रबड़ी लाके, सियान मन चारों झन खाईन । फूड पायजनिंग होगे, उल्टी, दस्त, होगे । पूरा जहर सरीर म फईल गे । अस्पताल म चारों झन के मृत्यु होगे हे । मंय तो अनाथ होगे हंव । चन्द्रकला देवी ल आज छत्तीसगढ़ एक्सप्रेस से रायगढ़ भेज दे । चन्द्रसेन रोवत रोवत फोन रखिच । चन्दा देवी के गला सूख गे । झटपट चन्द्रकला देवी ह सांकल खटखटाईच, बेल घलो बजाईच । चन्द्रकला आँखी रमजत उठीच, का होगे चन्दा बहिनी । चन्दा बहिनी ह रोवत रोवत चन्द्रसेन के बात बता देथे । चन्द्रकला देवी गस खा के गिर जाथे । चन्दा देवी छींटा मारके होश म लाथे । चन्द्रकला देवी आँखी ले आँसू के धार बहत रहय । रूके के नाव नई लेत रहीस । चन्दा देवी कथे दीदी, चल रायगढ़ जाय ल पड़ही । चन्द्रकला कथे बहिनी, मोर तो रायगढ़ से दाना पानी अउ मातृ छाया उठगे । सब सियान मन मरगे । मोर घर ल कोन देखही, बम फारके होईच ।

समारू ह दूनों के सूटकेस म लूगरा, साया कुछ सामान भरके तियार कर देथे । रात के भोजन बर पराठा, सब्जी बना के रख देथे । चन्दा देवी ह चन्द्रकला ल पकड़ के रेल्वे स्टेसन ले जाथे । गाड़ी ह आधा घंटा लेट रईथे । चन्दा देवी ह दो टिकट कूपन से कटवाथे । ए. सी. म बर्थ आरक्षित मिल जाथे । भोपाल से रायगढ़ व्हाया बिलासपुर के टिकट बन जाथे । चन्द्रकला के हालत खराब होत रहय । चन्दा ह दरद के गोली डिस्प्रिन खवाथे अउ सो जा कहिथे । चन्द्रकला कथे जेकर घर चार-चार झन मर गे हे, कईसे नींद आही । मोर दाई-ददा, कका, मोर माँ पुस्पा के अकालमृत्यु होगे । चन्द्रसेन, चन्द्रप्रकास अउ मय अनाथ होगेन । चन्दा कथे दीदी, तोर तबियत खराब हे, थोरिक आराम करले । छत्तीसगढ़ एक्सप्रेस भोपाल से प्रस्थान करथे ।

चन्द्रसेन ह टेलीफोन से चन्द्रप्रकास ल बताथे । जल्दी काल आ जावव । चन्द्रप्रकास के हालत खराब हो जाथे । एक ठो माँ रहीस ओहू ह छोड़ के चले गे । चन्द्रप्रकास ह अपन ससुर ल दुर्ग टेलीफोन करथे । सब छत्तीसगढ़ एक्सप्रेस से बिलासपुर पहुँचथे । चन्द्रसेन ह पूरनिमा ल सूचना देथे, पूरनिमा के हालत घलो रोवई म खराब होगे रहय । पूरनिमा, सुनील जबलपुर से कार म रायगढ़ तीन बजे तक पहुँचथे । चन्द्रकला अउ चन्दा, चन्द्रप्रकास, एम. आर. भारद्वाज अउ रिस्तेदार मन बिलासपुर से रेल म रायगढ़ तीन बजे पहुँचीन । चन्द्रसेन ह अपन ससुराल घलो पता भेज दे रहीस । दौनामंजर के रोवई म आखी सूज गे रहय, दूनों दाई के मरे ले । दौनामांजर के बच्चा मन अनाथ जईसे होगे । काबर दूनों मन गोदी म पावत रहय, खेलवाय, सोवावय, नहावावय, बढ़िया लईका मन बाढ़ता रहीन, अब कोन सहजोग देही । अड़बड़ रोईच । आस-पड़ोस के मन जुट गे रहय । चन्द्रसेन अउ दौनामांजर ल ढांढस बंधाईन ।

चन्द्रसेन ह चारों लास ल अस्पताल के मरचुरी म रखवा दे रहय । फूड पायजनिंग के पचास आदमी भरती होय रहय । होटल के रबड़ी के जाँच म पता चलथे, रबड़ी ठंडा करत समय छिपकली गिर के मर जाथे । रबड़ी के साथ मिल जथे अउ छिपकली के जहर से रबड़ी जहरीला हो जाथे । जतका झन रबड़ी खाय रहय मौत के मुँह म समा गे रहय । होटल मालिक ल गिरफ्तार कर जेल भेज दे जाथे । पुलिस ह एफ. आई. आर. दर्ज करके कारवाही करथे । रायगढ़ सहर अ पूरा परदेस म तहलका मच जाथे । दूसर दिन विधानसभा म ध्यानाकरसन के माध्यम से सरकार के धियान आकरसित करे जाथे मुख्यमंत्री ह जाँच के आदेश देथे । मृतक के परिवार ल आर्थिक सहायता एक एक लाख रूपिया के घोसना घलो करथे । पूरा देस भर रबड़ी खाय से पाचस आदमियों की मौत, खबर छपथे । टी. वी. न्यूज में घलो आ जाथे ।

चन्द्रकला अउ चन्दा देवी तीन बजे रायगढ़ पहुँचथे । वहाँ से सब झन अस्पताल लास लाये बर चल देथे । अस्पताल म कोहराम मचे रहय सब रोवई म मातम, सन्नाटा रहय । चन्द्रकला देवी ह लास ल देख के बहुत रोईच । दाई-ददा, कका, दाई के लास ल देख के बमफार के रोईच । सज के आँखी ले आँसू बहत रहय । घर के सियान के मौत होगे रहय । हजारों के भीड़ अस्पताल म रहय । अस्पताल से एम्बूलेन्स गाड़ी से लास गोसाला पास के निवास म लाथे । चन्द्रप्रकास, चन्द्रसेन, सुनील, एम. आर. भारद्वाज, गफ्फार भाई, बलदेव साव, डॉ. बिहारी लाल साहू, शिवरतन पांड़े, बिहारी लाल उपाध्याय, ठाकुर लक्ष्मण सिंह, जगदीस मेहर अउ सब झन मिल के लास ल घर के अंगना म ले जाथे ।

चारों लास ल दू खटिया म सुला देथे । पानी से स्नान कराथे, शरीर म हरदी, चन्दन लगाथे । नया लूगरा, धोती पहिराथे । पुस्पादेवी अउ रमौतीन दाई ल टिकली, फुंदरी, चुरी पहिराथे । चारों झन के लाश ल चार मयाना म राम नाम सत्य हे, सबका यही गत्य हे । चन्दा देवी अउ चन्द्रकला, चन्द्रप्रकास, चन्द्रसेन के आँसू नई रूकत रहीस । रूंधे गला से चन्द्रसेन अउ चन्द्रप्रकास चारों मयाना म कंधा लगाथे । हजारों के भीड़ काठी म जाय बर जूटे रहय । कोतरा रोड के समसान घाट म चारों लाश ल जला के दाह संस्कार चन्द्रप्रकास अउ चन्द्रसेन करथे । चन्द्रकला देवी अउ चन्दा देवी विधायक, कलेक्टर, पुलिस अधिक्षक, एस. डी. एम., तहसीलदार, थानेदार, नेता, अधिकारी मन पाँच लकड़ी डाल के दाह संस्कार पूरा करथे । लाश धू-धू करके जलत रहय । समासान घाट म दो मिनट मौन धारनकर श्रंद्धाजलि देथे । तरिया म नहाके कर घर आ जाथे । घर से सब अपन निवास स्थान चले जाथे । चन्द्रप्रकास अउ चन्द्रसेन हाथ जोड़ के परनाम, सब पहुना जो काठी म आय रहय, करथे ।

दौनामांजर घर वाला मन बर भोजन बनाथे, बुझे मन से सब भोजन करथे । चन्द्रकला देवी अउ चन्दा देवी विधायक से भेंट कराईया, सोक व्यक्त करईया मन के तांता लगे रहय । घर ह एकदम सुन्ना पड़गे रहय । छोट छोट लईका मन दादी माँ के कोरा बर अड़बड़ रोवय । चन्द्रकला अउ चन्दा देवी के कोरा म लईका मन चुप हो गीन . चन्द्रकला ह दूनों लईका मन ल चुमीच । मस्त हांस लगीन । चन्द्रप्रकास ह बहुत रोईच । दीदी, अब रायगढ़ सहर से मोर दाना पानी उठगे हे । अब ऐ संसार म कोई नईये । चन्द्रकला कथे भईया, अभी तो मंय जीयत हंव । चन्द्रसेन घलो हावय । तीनो भाई बहिनी हांवन । चन्द्रप्रकास कथे दीदी, पुस्पा दाई ह दू-तीन दिन पहिली टेलीफोन करे रहीस, कहिस बेटा, रायगढ़ के आधा मकान, घर, खेत-खार ल चन्द्रसेन के नाव म चढ़ा देहे हेव । आधा ह तोर नाव म हे । तोर ददा ह इंदौर के मकान ल बेच के रायगढ़ म मकान अउ खेत, फार्म हाउस खरीदे रहीस । तोर पिताजी तो कई बछर होगे हे मरगे हे । चन्द्रकला बेटी के ददा ह तोर धरम पिता ऐ । अउ रमौतीन ह तोर दाई ऐ । काबर ओकर दूध पी के पले बढ़े हच ।

चन्द्रप्रकास बताथे दीदी, पुस्पा दाई बह जानत रहीस कहिस बेटा मंय जादा दिन के संगवारी नो हंव । चन्द्रकला देवी ल अच्छा मानबे मुनबे । ओही ह माँ बाप के दुलार देही । चन्द्रकला के घलो लोग लईका नईये । तोर लईका के संग रईही । चन्द्रप्रकास बताईच दीदी, मंय तो पहिली से बता दे रहें । मोला रायगढ़ के धन-सम्पत्ति नई चाही । दीदी के नाव म चढ़ा हव । मोर कहे अनुसार चन्द्रसेन के नांव चढ़वा दे । चन्दा देवी ह लईका ल कोरा म लेके खेलावत रहीस, मस्त हांसत, रोवत, खेलत रहय ।

चन्द्रकला कथे भाई हो तीन दिन के अस (हड्डी) बीन लेथन । पुस्पा दाई के इच्छानुसार अस ल महानदी म चन्द्रपुर म सरो (विसर्जित) देथन । दस दिन म दसकरम खात-खवई कर देबो । चन्दा देवी कथे, ठीक कहत हे दीदी ह । सब सुनता हो के काम ल निपटाबो । तीन दिन म चन्द्रप्रकास अउ चन्द्रसेन, सुनील, कंठी राउत मारघट्टी जा के अस बीन लेथे । एक माटी के बरतन म रख लेथें । चारों झन के अस ल एके बरतन म रख लेथे । घर आ जाथे । जीप किराया म दू ठन ले लेथे । चन्द्रकला देवी अउ चन्दा देवी, पूरनिमा, प्रेमलात अउ चार महिला मन एक जीम म । दूसर जीप म चन्द्रप्रकास, चन्द्रसेन, सुनील, भारद्वाज, कंठी राउत अउ चार पाँच झन बईठ के चन्द्रपुर के घाट म महानदी म अस ल सरो देथे । चन्द्रकला देवी, चन्द्रसेन, चन्द्रप्रकास के आँखी ले आसू के धार फट पड़थे । आँसू टप-टप महानदी के जल म मिल जथे । जईसे पुस्पा बाई, रमौतीन दाई, रामदेव ददा, कामदेव कका के शरीर ह पंचतत्व म मिलगे । महानदी के जल म मिल के समुद्र म समा जाही, ओकरे संग चन्द्रकला देवी के आँसू ह जल म मिल जाथे । चन्द्रकला देवी ह बहुत रोथे । चन्द्रसेन, चन्द्रप्रकास, पूरनिमा के सर ले दाई ददा, कका के छाया ह उठ जाथे । घर के सियान मन खतम होगे । छत्तीसगढ़ के विख्यात कवि, भाई लक्ष्मण मस्तुरिया के गीत “मोर संग चलव ग” याद आगे –

कहाँ जाहव बड़ दूर हे गंगा,
सब जुर-मिल यही तरव ग,
मोर संग चलव ग ।

महानदी के सीतल जल धारा म स्नान करथे अउ गरीब मन ल भोजन कराथे । दसकरम के काम पूरा करथे । चन्द्रप्रकास अउ चन्द्रसेन दान घलो देथे । चन्दा देवी ह कथे दीदी, सब ल एक दिन जाना हे जो धरती म जनम लेय हे ओला एक दिन मरना होही । सबके आत्मा ह परमात्मा म जाके मिलगे । जईसे नदिया के पानी ह समुद्र म मिल जाथे, पता नई चलय कहाँ समा जाथे । चन्द्रसेनी देवी के दरसन पहाड़ी म करथे । पूजा पाठ करके चन्द्रपुर से रायगढ़ आ जथे । चन्द्रसेन ह घर के लिपई –पोताई घलो करवा लेथे । दू-चार दिन चंद्रप्रकास, डॉ. प्रेमलता ह दिया दिखाथे । पूरनिमा घलो बहुत रोथे । घर ल उज्जर करके पूजा पाठ घलो कराथे । सब पहुना मन अपन-अपन घर चल देथे । चन्द्रप्रकास ह चन्द्रसेन ल सब घर-द्वार सौंप के रायगढ़ से रायपुर, सुन्दर नगर आ जथे । चन्दा देवी घलो रायग़ से भोपाल चल देथे । बांच गे घर म चन्द्रकला देवी, चन्द्रसेन, दौनामांजर अ जुड़वा लईका मन । जुड़वा लईका मन ल कोरा नई मिलय सुन्ना होगे रहय . चन्द्रसेन डेयरी के धन्धा म लग जाथे । फार्म हाउस घलो देख लेवय । पुस्तैनी धंधा गउ माता के सेवा करई ह मुख्य धंधा बन जाथे । चन्द्रसेन दूधवाला, रायगढ़ अउ आसपास म बहुत परसिद्ध हो जाथे । चन्द्रकला देवी, दूनों लईका के पालन-पोसन म लग जाथे । सबके जीवन चक्र ह, समय चक्र के संग चले लगथे ।

क्रमशः

by-http://www.srijangatha.com

भाग- सोलह

2006-06-27T13:06:00.000-07:00

च

न्द्रकला देवी सो के उठिस, फ्रेस होके बेडरूम ले निकलिस । अंगना के कुरसी म बईठ के समाचार पत्र पढ़त रहिस । रायगढ़ संदेश अखबार चार दिन बाद पहुँचय । मुख्य पृष्ठ म समाचार देय रहय कि गोसाला के गाय, बैल, अज्ञात बीमारी से मृत्यु । बैकुण्टपुर स्थित गोसाल के लगभग एक सौ से जादा गाय अज्ञात बीमारी के चपेट में आने से अकाल, काल के गाल में समा गये । विगत एक मास से गायों के मरने का सिलसिला जारी था । अब एक भी जानवर नहीं है । गोसाला प्रबंधन कमेटी न चौकीदार, जो पुस्तैनी गाय की सेवा करते आ रहे थे को हटाकर दूसरे चौकीदार नियुक्त कर दियें है । चन्द्रकला देवी के आँखी ले आँसू आ जाथे । पीढ़ी दर पीढ़ी गउ माता के सेवा करत रहीन, आज खतम होगे । पुस्पा देवी भी रो डारथे । बेटी गोसाला के गाय के दूध पी के पले-बढ़े रहेंव । चन्द्रप्रकास, पूरनिमा, चन्द्रसेन, रामदेव, कामदेव सब झन दूध पी के रहेंव । चन्द्रकला देवी कथे, दाई पूरा परिवार के जीये के आधार रहीस, कम से कम गो माता के सेवा करत रहीन, आज अनाथ हो गेन ।

पुस्पा देवी कथे बेटी अनाथ कईसे होही । चन्द्रप्रकास डिप्टी कलेक्टर बनगे हे । ओहा अभी पाँच-सात-साल अभी अऊ नौकरी करही, का पता कहा बसही पता लगे हे ओहा रायपुर सुन्दर नगर म मकान ले डारे हे । चन्द्रकला कथे, ठीक हे दाई तभो ले । पुस्पा कथे, बेटी अभी जाके चन्द्रसेन के नाम म चार एकड़ जमीन ल चढ़वा देथंव । मकान के आधा चन्द्रसेन के नाम म हो जाही त सब झंझट ले मुक्त हो जाही । वईसे घलो चन्द्रप्रकास रायगढ़ म नई रहय, रायपुर म बसही । डॉ. प्रेमलता ह सरकारी डॉक्टर बन गे हे । अभी ओकर पन्दरा बछर नौकरी बांचे हे, चन्द्रप्रकास ओकर संग रईही । चन्द्रप्रकास ल धन सम्पत्ति के लालच नईये । पुस्पा कथे, बेटी चन्द्रप्रकास ह मोला कई बार बोल चुके हे माँ रायगढ़ के सम्पत्ति ल दीदी के नाम कर दे । मंय ओकर करजा ल नई चुका सकंव । ओकर परसादे मोला नौकरी मिले हे । यदि दीदी नई होतिस त मंय बेरोजगार घुमत रहितेंव । यदि मंय सारी उमर करजा उतारिहंव त नई उतरही । चन्द्रकला कथे, दाई मोर सगा भाई भी अईसना नई सोंचय ।

पुस्पा कथे, बेटी चन्द्रप्रकास ल दूसर काबर मानत हस, तोर दाई के दूध पी के बड़े होय हे । मोर कोख म दस महीना जरूर रहीस, फेर रमौतीन के दूध पी के जीये हे । दाई के दूध के करजा अभी नई छुटाय हे । रमौतीन बहिनी धन्य हे, अईसे माता बहुत कम होथे जऊन अपन लईका ल कम दूध पिलावय अऊ चन्द्रप्रकास ल जादा । चन्द्रप्रकास के नानपन म पेट नई भरय काबर, जादा उमर के बच्चा होय म दूध नई आवत रहीस । मंय दूध जरूर-जरूर पियावंव । मोर दूध नई आवत रहीस । मय रात-रात रोवत रहेंव । मोर बेटा ह कईसे बांचही । गाय के दूध पिलावव, पेट भर नई पीयय । मंय संसों म सूख के कांटा बन गे रहेंव, फेर भगवान के किरपा ले रमौतीन ह तोला जनम दिस । मोर जी ह हलका होगे । मोला उपाय सूझिस, मंय नौकरी म चल देथंव त लईका ल कोन देखही । डरावत-डरावत एक दिन रमौतीन बहिनी के पास गयेंव अऊ परेसानी बतायेंव । तोर बुआ घलो रहय, कहिस भउजी तंय कुछ पईसा महीना म दे देबे । हमन लईका ल पोस देबो । मोर बात बनगे मंय पहिली दिनी ही दू सौ रूपिया रमौतीन ल दे देंव । तोर बुआ टेटकी ह चन्द्रप्रकास ल गोदी म लिस, रमौतीन कहिस टेटकी दे दूध पीला देथंव । जईसे गोदी म लिस, चन्दा हांसे लगिस । मस्त दूध पेट भर भी के खेले लगिस । पहिली बार भर पेट दूध पाय रहीस । मंय मुस्कावत अपन सिक्षकीय काम म चल देंव । साम के आंव त मस्त खेलत मिलिस । रमौतीन कहिस, दीदी मस्त दूध पीयत हे पर मोर टूरी के पेट नई भरत हे । मय कहेंव बहिनी तोर टूरी के जूठा बांचे दूध ल पिया देकर । मोर बेटा बांच जाही । अईसे करके चन्दू अऊ चन्द्रकला बड़े होय हे । पुस्पा के आँखी ले आँसू टपक जथे, चन्द्रकला घलो सुन के रो डारथे ।

चन्द्रकला कथे, दाई कालि रायगढ़ जाबो, पी. ए. ल टिकट आरक्षण कराये बर कहि दे हंव । दूसर दिन छत्तीसगढ़ एक्सप्रेस से बिलासपुर जाय बर रेल्वे स्टेसन पहुँच जाथे, चन्दा देवी विधायक घलो स्टेसन म मिल जथे । भोपाल से बिलासपुर गप मारत, सोवत पहुँच जाथे, चन्दा बिलासपुर से रायगढ़ अहमदाबाद एक्सप्रेस से पहुँच जाथे । प्रोटोकाल से कार आय रहय, चन्द्रकला देवी, पुस्पा देवी बईठ गे कार म अउ चन्दा देवी ह जीप म सांरगढ़ चल देथे । चन्द्रसेन ह सूटकेस अउ समान ल दूसर जीप म भर के ले आथे । विभागीय अधिकारी, कर्मचारी एस. डी. एम. मन मैडम से भेंट करके चल देथे । रमौतीन दाई ह बढ़िया नीबू के चाय पीलाथे । रमौतीन कथे, बेटी गोशाला के सब गाय मन बीमार म एक महीना के भीतर मरगे । एक महीना होगे, दूध कईसन होथे नई जानन । तोर ददा ह उदास-उदास बईठे हे । तोर कका घलो के पास कोई काम नईए । एक सांस म रमौतीन अपन दुःख ल सुना डारथे । गोशाला ह जीये के आधार रहीस, ओहू लसेठ जी ह छोड़ा दे हे । चन्द्रकला कथे, दाई मोला सब मालूम होगे हे ओकरे सेती आय हंव । घबराय के जरूरत नईए । कोई उपाय सोंचत हंव, आज रात खाये के बेरा बिचारबो ।

पुस्पा कथे रमौतीन बहिनी काबर हदरत हव, घर म खेती किसानी हे ओला एक जूर मिलके करव । खाय के पुरता धान, गेहू, चना हो जाही । रहे बर दुमंजिला मकान हे । रमौतीन कथे, दीदी ये सब तो चन्द्रप्रकास के हे, हमर पास तो ये खपरा वाला मकान रहे बर हावय । सिर छिपाय के जगा हे । पुस्पा कथे, बहिनी ये सब तो मोरे आय चन्द्रप्रकास घलो तोर बेटा आय । चन्द्रप्रकास के सब धन सम्पत्ति ल चन्द्रकला दीदी के नाम करे ल कहे हे । चन्द्रकला ह कथे, माँ भाई के हिस्सा ल मंय नई खांव । यदि देना हे तो आधा हिस्सा ल चन्द्रसेन के नाम म करवा दे । पुस्पा कथे, ठीक हे बेटी जईसे चाही वईसे हो जाही । रात 9 बजे भोजन के बर परछी म पीढ़ा म लाइन से बईठथे । चन्द्रकला कथे, बाबूजी काबर मुँह ल ओरमाय हस, मंय तो हंव न । चन्द्रसेन ल एक बेटा कहिथस, बेड़े बेटा मंय हंव । बाबूजी मंय भोपाल ले सोंच के आय हंव के तुमन बर दूध डेयरी खोलिहंव । का विचार हे सब झन बतावव । चन्द्रसेन कथे, दीदी बहुत बढ़िया सोचे हस । ओतका म हम जीबो-खाबो । रामदेव, कामदेव अउ रमौतीन मन हाँ में हाँ मुड़ ल हला देथे । चन्द्रकला कथे, घर के पीछवाड़ा म पसुपालन बर एक परछी उतरवा देथंव, जेमा दस भईसी बाँधे जा सकय । चारा, भूँसा, पानी के बेवस्था रहय । फर्स ह पक्का रहय । भईसी के दूध ले बेचहा अऊ गोबर ल खाद बना के खेत म डारिहा, धान घलो जादा होही । सबके सलाह मसविरा हो जाथे, भात खा के सो जाथे ।

चन्द्रकला देवी ह पी. ए. ल बुला के भारतीय स्टेट बैंक कृसि साखा, रायगढ़ से डेयरी उद्योग के लिये मैनेजर ल बुलवाथे । मैनेजर ह डेयरी के लिये एक लाख तक लोन देबर तियार हो जाथे । पचास हजार रूपिया सेड बनाये बर अउ पचास हजार रूपिया भंईसी खरीदे बर । चन्द्रकला देवी बैंक के मैनेजर ल फार्म चन्द्रसेन के नाव म भरवा देधे अउ गारेंटर अपन बन जाथे । पचास हजार रूपिया मार्जिन मनी जमा भी कर देथे । दूसर दिन मिस्त्री बुला के घर के पीछवाड़ा म परछी बनवा देथे । बैंक लोन म दस भंईसी मुर्रा नस्ल के हरियाणा से दो ट्रक म मंगवाथे । बैंक मैनेजर ह भैंस मालिक ल एक लाख के ड्राफ्ट दे देधे । भईसी मन के बीमा भी करवा देथे । सब भंईसी के कान म छल्ला पहिना देधे । दस भंईस के एक सौ बीस लीटर दूध होत रहीस । मस्त चारा-दाना, रामदेव अउ कामदेव अउ चन्द्रसेन खिलावय । दूध डेयरी चल निकलिस, एक साल भर म एक लाख रूपिया बैंक लोन ल छूट दीस । अच्छा दूध के धंधा ह चल निकलिस ।

चन्द्रकला देवी ह डेयरी के नाम – ‘सतनाम डेयरी’, प्रोप्राइटर ‘चन्द्रसेन यादव’ रखे रहय । ऐ बछर गेबर खाद डाले ले धान के फसल घलो जादा होईस । घर म धरे के जगा नई रहय । आयीस त लक्ष्मी ल बम्फर के, एकदम चकाचक होगे । रायगढ़ सहर म चन्द्रसेन दूधवाला के नाम से फेमस होगे । सुद्ध दूध, दही, मही, घी भी बनाय लगीन । आस-पास के सहर म घी, दही के माँग बहुत रहय । सतनाम डेयरी नाम के अनुसार काम भी करय । दूसर से दाम भी कम लेवय । पूरा परिवार जईसे गोसाला म काम करय वईसे सब जुर मिल के साफ सफाई, गोपर फेंकाई, दूध दुहाई अउ बेचाई । सतनाम डेयरी से ग्राहक मन संतुष्ट रहय । रामदेव यादव परिवार कई बछर ले गोसाला के दूध बेचत रहीन, सब सेठ, साहूकार, अधिकारी मन जानत रहिन ।

चन्द्रकला देवी ह दउरा म सरिया जाथे । गाँव-गाँव घर-घर लोगन से सम्पर्क करथे । कई विरोधी पार्टी वाला मन कहय, अब चुनाव आवत हे त घर घर घूमत हे अउ पाँच साल कहाँ रहीस । चन्द्रकला कथे, भाई हो तुमन जीतवाय रहय त मंय मंत्री बनगे रहेंव, मंत्री तो पूरा परदेस के होथे । मोर चुनाव क्षेत्र के साथ पूरा मध्यप्रदेस ल देखत रहेंव । मंय तो हर महीना आवत रहेंव, भले ही आप लोगन से नई मिल पायेंव । चन्द्रकला देवी नमस्कार करके आगे बढ़ जावय । महिला मंडल के सदस्य मन कर्मठ कार्यकर्ता रहय । जिंहा जावय महिला मन, उहाँ आरती उतार के सुवागत करय । महिला मंडल के सदस्य मन फेर चुनाव म खड़े होय बर कहीन । एक चुनाव म अ जीतवाबो । सरिया क्षेत्र म चन्द्रकला देवी के पक्ष म माहौल रहय । जतका बिकास चन्द्रकला के कार्यकाल म होईस, आज तक नी होय रहीस । चन्द्रकला देवी एक हफ्ता गाँव-गाँव के भारी दौरा करके सरपंच मन के दस्तखत कराके रख लेथे । चुनाव तियारी के शुरूआत कर देथे ।

गाँव के महिला मंडल के प्रमुख सदस्य मन ल पिछले चुनाव म प्रचार करे बर सायकल देय रहिस । सब कहीन ए साल अच्छा सायकल देबे, चन्द्रकला देवी । चन्द्रकला देवी कहिस, टिकिट मिले के बाद सब झन ला सायकल देहूँ । सब झन गाँव-गाँव, गली-गली परचार करीहव । चन्द्रकला देवी जनसंपर्क करके सारंगढ़, चन्दा देवी विधायक के पास जाथे । मधु, निर्मला, गुंजा सब महिला मंडल के सदस्य मन ल बुलवा लेथे । मधु नगरपालिका के अध्यक्ष बन जाथे । मधु अउ महिला मंडल के सदस्य मन एकमत हो के चन्दा देवी ल विधायक के टिकट फेर ए साल मिलय के प्रस्ताव पारित करीन । पूरा राज्य म महिला उत्थान के काम म सरिया अउ सारंगढ़ माडल बने हे । चन्दा देवी के मार्गदरसन अउ मेहनत के बल पर माडल बने हे । चन्दा देवी ह चाय नास्ता कराथे । सब झन संझौती बेरा म घर चले जाथे ।

चन्द्रकला कथे, मंय रायगढ़ जाथंव बहिनी । कार म बईठ के रात 10 बजे पहुँचथे । गनमेन अउ पी. ए. रेस्ट हाउस म रूक जाथे । चन्द्रकला देवी अपन घर म रूकथे । पुस्पा अउ रमौतीन दाई ह रस्ता देखत रहीन । चन्द्रकला कथे, माँ मंय जेवन जे के आये हंव । चन्दा बहिनी जेवन बिना आन नई देवय । मोला एक गिलास गरम दूध देवव। हाथ मुंह धो के कुरसी म बईठ जाथे । पुस्पा दाई ह हाल चाल पूछथे, सब ठीक हे बताथे । चन्दा देवी विधायक हे ओकर घर म सब चीज उपजथे । मंय आधा दिन तो ओकर घर खाय हांवव, बढ़िया प्रेम से खिलाथे । गपसप मारत चन्द्रकला सो जाथे ।

रामदेव ह दूसर दिन रेल से सक्ती जाथे, सक्ती म दमउरहरा जाथे । उहा राउत परिवार म टूरी बाढ़े रहय, उमर तीस साल के उपर होगे रहय । सुन्दर गोरी नारी, ऊंच पूर, नाक-नक्शा बने रहय । रामदेव ह कंठी राउत ल कहिथे, तोर नोनी ल पसंद कर लेंव, मोर लड़का ल लेके रविवार के दिन आवत हंव । ओही दिन फलदान, सगाई, मुँह देखाई कराबो । रामदेव के बढ़िया सुवागत करथे । रामदेव दूसर दिन रेल से रायगढ़ आ जथे । रमौतीन अउ चन्द्रसेन ल बताते, कंठी राउत के दस एकड़ जमीन अउ पचास से जादा गाय, बईला हे, एक बदरी जंगल म चरे गय हे । बने-बने घर द्वार हे, पूरा घर ल ओही सम्हारत हे । बने चोर होगे हे । रमौतीन कथे, चन्द्रसेन घलो तो जादा उमर के होगे हे । पुस्पा देवी ह सुन के खुस हो जाथे । चन्द्रकला देवी घलो मीटिंग से आ जथे, बहुत खुस होथे । चला बहुत दिन के बाद म घर म बिहाव होत हे । रामदेव ह चन्द्रकला ल बताते कि बेटी ईतवार के दिन चन्द्रसेन ल लेके जाबो । फलदान के समान खरीद लेबे, एक जीप किराया म ले लेबो । चन्द्रकला कथे, बाबूजी तंय फिकर झन कर सब ठीक हो जाही ।

चन्द्रकला देवी ह पुस्पा देवी दाई ल बाजार ले के जाथे । बाजार से लूगरा, पोलखा दू जोड़ी सोना के अंगूठी, पैर पट्टी, झुमका खरीद लेथे । ईतवार के दिन सब झन कपड़ा पहिर के तियार हो जथे । चन्द्रकला देवी ह होटल से पाँच किलो मोतीचूर के लड्डू मंगवा लेथे । सेवफल पाँच किलो, केला, संतरा घलो डाली म रखवा लेथे । जीप अऊ कार म रायगढ़ से निकल जथे, सड़क खराब होय के कारण से दू घंटा म दमउदहरा पहूँच जथे । ठीक बारह बजे पहुँचथे । कंठी राउत, ह अपन सगा, संबंधी मन ल गाँव वाला मन ल बुला के रखे रहय । लगभग बीस आदमी जूरे रहय । घर के परसार म खटिया बिछा दे रहय, घर के भीतर परछी म खटिया चार पाँच ठन बिछा दे रहय । कंठी राउत अउ ओकर भाई महिंगल, सुधेराम, बुधेराम, गाँव वाला मन एक-दूसर के पायलगी करके जोहार करीन । महिला मन के घर के अंदर दौनामांजर ल लेके बैठाईस । बने घर समरे पकड़े रहय । दौनामांजर ह सबके टपाटप पाँव परिस । चन्द्रकला ह पहिचान लेथे, तंहि ह हमर बहू बनत हस । दौनामांजर लजावत हाँ म सिर हला देथे । महिला मन ललोटा म पानी देथे । गोड़ हाथ धोये बर कुआँ बारी कोती ले जाते, कुआँ से पानी निकाल के पैर धोवाथे । दो तीन एकड़ म बारी अउ खलिहान, कोठार रहय । बरे किसान, पसु पालक रहय । घर घलो चारों ओर घेराय रहय, अंगना के बीच म तुलसी चौरा रहय । अंगना म पथरी फरसी लगे रहय । कंठी राउत, आस-पास के सम्मानित किसान रहय । चन्द्रकला, पुस्पा देवी देख के खुस हो जथे । अंगना के परछी म बईठारते । दौनामांजर के दाई मंगली कथे दूकलहीन, समारीन, देवकी चार-पाँच महिला मन गाँव के आ जथे । पायलगी करके खटिया अउ पीढ़ा म बईठ जथे ।

कंठी राउत के घर के दूवारी म लाल बत्ती के कार देख के लईका मन के भीड़ लग जथे । गाँ म सोर उड़ जथे, कंठी राउत के घर मंत्री आय हे । गनमेन अउ पी. ए. गाड़ी म बईठे रहय । ड्राईवर ह लइका मन ल भगावत जाय, सब झन ह कार ल छू-छू देखय । धीरे धीरे स्कूल के गुरूजी, पटवारी, ग्राम सेवक, नर्स सबआ जाथे । कंठी राउत सब ल परछी म बईठाथे । सब झन ल चौंगी, बीड़ी देईस । सब झन जाग गे कि लड़खी देखे आये हे, आज फलदान हे । कंठी राउत ह बताईस कि रायगढ़ से आय हे, लड़का के बहिनी मंत्री हे । दौनामांजर के भाई सुखराम अउ कका महिंगल ह चाय-पानी लेके आईस । सब झन ल पिलाईस, कंठी राउत भोजन के पहिली से तियारी कर डारे रहय ।

रामदेव चन्द्रकला ल कईथे, बेटा चाय पानी तो पी डारेन, फलदान के नेंग करके जेवन जेबो । कारज हो जाय तो खाबो । कंठी राउत ल कईथे, बाबूजी ह कहत हे फलदान हो जावय, ओकर बाद खाना खाबो । कंठी राउत कईथे, बेटी पंड़ित महराज ल नई बुलाय हन, दूसर गाँव म रईथे । चन्द्रकला कईथे, बाबूजी हमन लाय हन न । पुस्पा पांड़े हावय, कारज पूरा कर देही । तुमन जईसे चाहत हंव । कंठी राउत ह अंगना म परछी म चादर बिछा देथे । एक डहार लड़की वाले, एक डहार लड़का वाले मन बईठ गे । पुस्पा पांड़े ह महाराज बनके कारज करीस । बीच म चौंक पुर के कलस मढ़ाईस, भगवान के फोटो रखीस, अगरबत्ती धूम के हूम दीस । वर-वधू ल बईठाइस । चन्द्रकला देवी ह कार से लट्टू, केला, सेव, जेवर-गहना ल मंगाईस । पुस्पा पांड़े ह दूनों झन ल अगरबत्ती जला के पूजा कराईस । एक-दूसरे के अंगरी म सोना के मुंदरी पहिनाईस, सब कोई ताली बजा के बधाई देईन । लड़की के गोदी भराई के रस्म घलो पूरा करीन । वर पक्ष के मन रामदेव ह सबसे पहिली दो सौ रूपिया वधू ल देईस अऊ आसीस देईस । दौनामांजर ह पाँव परिस । चन्दा देवी, कामदेव अउ पुस्पा देवी ह पईसा धराईन । वधू पक्ष के मन चन्द्रसेन ल रूपिया देईन । बर-वधू ल कहिन, सबके पाँव छू के आसीरबाद ले लेवव ।

पुस्पा देवी ह लड्डू, केला, सेव ल सब झन ल बंटवा देथे, बांचे लड्डू, केला, सेव ल घर म भेजवा देथे । समधी भेंट रामदेव, कामदेव, कंठी, महिंगल गले मिल के करथे । समधी भेंट के बाद सब जुटे सगा संबंधी मन ल जेवन जेय ल कहिथे । परछी म चादर बिछा के लाइन से बईठा देथे । महिंगल, सुधेराम, बुधेराम अउ ओकर लड़का मन भोजन परोसथे । इक्कीस प्रकार के पकवान, रोटी पोरसिन । छत्तीसगढ़ी भोजन खा के तृप्त हो जथे । गाय के शुद्द घी म पकाय रहय, फेर उपर के राहेर दार म चम्मच भर के घी डालय । कंठी राउत के जय जायकार होगे । सब झन भोजन करके बईठक म आ जथे । चन्द्रकला देवी ह सादी के मुहुरत कब करबे कहिस । पंचांग देख के पुस्पा पांड़े ह कहिस, बसंत पंचमी के दिन सादी के मुहूरत हे । कंठी राउत कहिस, ठीक हे । चन्द्रकला देवी कहिस, बाबूजी गायत्री परिवार के रीति रिवाज से नेंग होही, यदि तुमन चाहत होहू त गायत्री मंदिर म बिहाव कर डारबो जादा खर्चा नई होही । कंठी राउत कहिथे, तेल हरदी तो चढ़ाय ल पड़ही । चन्द्रकला कथे, अपन-अपन घर म वर-वधू के तेल-हरदी चढ़ाबो बस सात फेरा गायत्री मंदिर म होही । बिहाव तय हो जाथे ।

चन्द्रकला कथे, अब छुट्टी देवा जाय बर । दौनामांजर कथे दीदी दमउदहरा ऋषभदेव तीर्थ थोरकन दूरिहा म हे, चला देखा देथंव । कार, जीप म बईठ के दमउदहरा देखते, बहुत मनोहारी दृस्य रहय । पहार से जल प्रपात बन के पानी गिरत रहय । दहरा के रूप म पानी बारो महीना भरे रथे । साफ पानी, सीतल जल रहय । सामने के पथरा, पत्थर के चट्टान म पाली भासा म लिखे हावय । पं. लोचन प्रसाद पांड़े जी ह प्राचीन महाभारत, रामायण काल के बताय हे । बहुत प्राचीन सिलालेख हे । जैन धर्म के ऋसभदेव महाराज यहाँ तप किये थे । मैकाल पर्वत श्रंखला बहुत प्राचीन है जो कि अमरकंटक से रायगढ़ा, उड़ीसा, बिहार चले गय हे । बहुत मनोहारी स्थान हे, पर्यटन के लिए देस विदेस के पर्यटक आथे । दौनामांजर कथे, दीदी मंय रोजिना झरना म स्नान करे आथंव, बहुत मजा आथे । हमर कई बरदी गाय, गौरा ले चराय बर पहाड़ के अन्दर ले जाय गे हे, गरमी म नीचे लाहय । चन्द्रकला देवी कथे, तोर बिहाव अब होवत हे अच्छा लउहा-लउहा आबो । अब हमन ल रायगढ़ जाना हे, छोड़व । कंठी राउत ह सब झन ल धोती, लूगरा भेंट करथे । साम के पाँच बज गे रहय, दमउदहरा से सक्ती रात आठ बजे पहुँचथे । रात म जेवन जेके सो जथे । रमौतीन ल रामदेव कथे, बिहाव के तियारी कर, बसंत पंचमी म भांवर परही । रमौतीन कथे, कतका दिन बांच हे । रामदेव कथे, एक हफ्ता बांचे हावय । रमौतीन कथे, डोकरा अतका लउहा कईसे करबो तियारी । बिहाव पत्रिका छपवाय ल लगही । रामदेव कथे चन्द्रकला ह सब कर डारही, तंय संसो फिकर झन कर । तोर मईके मंय चल जाथों, पूरनिमा ल टेलीपोन से बुला लेबो । चन्द्रप्रकास ल टेलीफोन से सूचित करबो, सब आ जाही संसो झन कर । सब बढ़िया अच्छा ढंगसे हो जाही । रमौतीन कथे, बेटा के बिहाव करिहंव त संसो तो करना चाही । रामदेव कथे, बेटा के बिहाव बुढ़ापा म होत हे, मड़वा म बने नाचबे डोकरी । रमौतीन कथे, बेटा के बिहाव होथे काबर नई नाचिहंव, पागी छोर के नाचिहंव । मोर आखिरी बेटा के बिहाव होते हे । मोर दू टूरी मन के बिहाव म नाचे नई पायेंव । जरूर चन्द्रप्रकास के बिहाव म नाचे रहेंव । रामदेव कथे डोकरी सब ठीक हो जाही । रात म गप मारत सो जथे ।

चन्द्रकला देवी ह प्रिंटिंग प्रेस वाला ल घर म बुला के पत्रिका छापे बर आदेश दे देथे, दूसर दिन छापके देथे । चन्द्रकला के पी. ए. अउ स्टॉफ कर्मचारी मन नाम व पता लिख के डाक म डाल देथे । रायगढ़ के पत्रिका ल चपरासी अऊ चन्द्रसेन खुद जाके बाँट देते । चन्द्रसेन के कपड़ा घलो सिल के तियार आ जथे । बसंत पंचमी से तीन दिन पहले मड़वा गड़ जाथे । पूरनिमा ह जबलपुर से रायगढ़ चार दिन पहिली आ जथे । सुनील घलो साथ आ जथे । चार बच्चा के आय से घर किलकारी से गूंजे लगथे । चन्द्रप्रकास रायगढ़ आ जथे । डॉं प्रेमलता अउ चार लईका संग म लाय रहय । डॉ. प्रेमलता के माँ पिताजी घलो आय रहय । रमौतीन के मायके के भाई भौजी आगे । पुस्पा देवी ह सब लईका संग मस्त खेले लगिस । चन्द्रकला ह बिहाव के पूरा समान खरीद लिस । भोजन पकाय बर रसोईया चमन हलवाई ल लगा देधे । घर के अँगना म मड़वा गड़ गे, टेंट लग गे । घर के सामने बड़े टेंट म एक सौ कुरसी घलो लग गे रहय । एकदम झकास घर दिखत रहय । दूनो घर म झालर झिलमिलात, चमकत रहय । लाउडस्पीकर म बिहाव गीत बजत रहय । घर अंगना म आदमी, औरत, लईका भर गे रहय । बढ़िया खुसी के माहौल रहयष आसपास के पढ़ोसी मन आवत रहय ।

पुस्पा कथे, चूलमाटी के समय होत हे । चन्द्रकला ह रमौतीन दाई बर पोतिया लूगरा (कोसा), पुस्पा पांड़े बर पोतिया लूगरा, लूगरा कांध के डार के पाँव परिस । पूरनिमा, प्रेमलता अउ चन्दा देवी ल बनारसी लूगरा देईस । जतका पहुना आय रहय, सब ल लूगरा धोती देईस । पूरनिमा ह पर्रा म दीया जला के नवा लूगरा पहिर के निकलिस । प्रेमलता, चन्दा देवी, रमौतीन, पुस्पा देवी घलो नवा लूगरा पहनीस । जतका महिला पहुना रहीन सब लूगरा पहरिन । सुनील ह कुदारी, सब्बल माटी कोड़े बर चपराली ल पकड़वाईस । मुंडहर घर से पर्रा बोह के पूरनिमा निकलिस, पाछू-पाछू रमौतीन सब महिला मन संग बिहाव गीत गावत मड़ला ले निकलीन । चन्द्रकला देवी देवी ह चन्दा देवी के संग चलत रहीस । तरिया के पार म पहुँचीन । पीपर रूख तरी माटी के पूजा अगरबत्ती, धूप जाल के पूरनिमा ह करथे । प्रेमलता, चन्दा सब झन धरती माँ के पूजा करथे । सुवासा बने सुनील ह गैंती, सब्बल रखथे ओकरो पूजा, आरती उतारथे । गैंती ल पाँच हाथ पकड़ के माटी कोड़ के नेंग करथे ।

बिहाव गीत –
तोला माटी कोड़े ल नई आवय सुवासा धीरे-धीरे
अपन तोलगी ल छोर धीरे-धीरे

पाँच कुदारी मारके माटी खोदते । माटी ल रमौतीन दाई ह अपन अंतरा म झोंकथे । पुस्पा, प्रेमलता ह माटी अंचरा म झोंकथे । माटी पूजा के बाद गीत गावत, मंगल गीत गावत घर आ जथे ।
सुवासिन पूरनिमा ह बढ़ई घर से मंगरोहन लाथे । पहिली से बाजार ले कूड़ा, करसा खरीद के रामदेव ले आथे । रात आठ बजे चन्द्रसेन के तेल-हरदी चढ़ाते । तेल, हरदी, दाई, भउजी, काकी, मामी बहिनी सब तेल चढ़ाथे । बिहाव गीत से अंगना गमकत रहय । सब लईका मन खेलत-कूदत रहय । तेल चढ़ाय के बाद चन्द्रसेन ल मड़वा ले पूरनिमा अउ सुनील ह घर म ले जाथे । घर म बहुत दिन के बाद मड़वा गड़े रहय । घर म खुसी छागे रहय ।

बिहाव गीत –
एक गाँठ हरदी पीसे चक चंदन हो पीसे चक चंदन,
होत मोर दुलरू के बिहाव ।
एक तेल चढ़गे, लाला अहिबरन के हो,
लाला अहिबरन के ।

चन्द्रसेन के कपड़ा धोती, बनियान भींग गे रहय । हरदी, तेल से कांपत रहय । टावेल से पानी ल पोछिस अउ उपर से साल ओढ़िस । चन्द्रसेन घलो चरेर होगे रहय । रात म भोजन करके सोगे । जेला जहाँ दूनों घर म जगा मिलिस, सूतगे रहय । चन्द्रकला देवी, चन्दा अऊ प्रेमलता, पूरनिमा अलग कमरा म लईका मन ल लेके सूतगे । चन्द्रप्रकास, सुनील, समारू सब झन अलग कमरा म सूतगे । बांच गे रहय रमौतीन, पुस्पा रंघनी घर के परछी म सोगे । रामदेव अउ कामदेव, प्रेमलता के पिताजी एम. आर. भारद्वाज परछी म सूतगे । रात के बारा बज गे रहय, रसोईया मन घर चले गीन ।

बिहाव के दूसर दिन भर कई तेल हरदी चढ़ाईन । दोपहर म महिला मन हरदाही खेलिन । एक दूसरे ल हरदी, तेल लगाईन । पूरनिमा ह सुनील ल कस के हरदी लगाईस, सुनील घलो कम नई रहय ओहू ह कस के हरदी तेल लगाईस । चन्द्रकला देवी ल चन्दा देवी ल प्रेंमलता अऊ पूरनिमा हरदी लगा के तेल मालिस करीन । घर भर म लोग, लईका मन हरदी म पहिचान नई आवत रहय । सिरफ आँखी ह जुगुर जागर बरत दिखय । रामदेव, कामदेव ल रमौतीन लगाईस । एम. आर. भारद्वाज ल पुस्पा देवी ह समधी कहिके लगाईस, मड़वा म समधीन ल छुये के छुट रहिथे । पहिली बार तो समधी ल छुवत हंव, मंय तो बुढ़िया हंव समधी जी लगाय देवव हरदी । प्रेमलता के माँ आ जथे, कथे बने लगावव ह समधी । बुढ़वा ह जवान हो जाय । पुस्पा देवी ह परणाम करके चल देथे । प्रेमलता के माँ ह घलो हरदी-तेल पीठ म लगा देथे । सब झन मिल के तरिया म नहाय ल चल देथे ।

चन्द्रकला देवी अउ चन्दा देवी, प्रेमलता ह घर म स्नान कर लेथे, बाकी सब झन नहाय बर तरिया, नदिया चल देथे . सब झन अंगना म बईठ के जेवन खाथे । ठाढ़ बेरा म सरिया ले जमुना, महिला मंडल के सदस्य मन सारंगढ़ से मधु जीप म दस महिला के आ जाथे । चन्द्रकला देवी ल बधाई देथे, भाई के सादी बर । मधु महिला संगीत के बेवस्था म लग जाथे । सब पुरूष मन घर से बाहर चल देथे । फेर सुरू हो जाते महिला गीत संगीत । सिनेमा के धुन म बिधुन होके सब महिला मन मड़वा म नाचत रहय । पुस्पा देवी अउ रमौतीन घलो पर्रा धरके झूम के नाचिन । मधु कहिस, चन्दा अउ चन्द्रकला दूनो दीदी चलव नाचव । भाई के बिहाव करत हव, फिल्मी गीत म नचवाथे . घर म संगीतमय वातावरण म महिला मन आनंद लेथे । हास परिहास, नाटक, साहेब, दरोगा, कलेक्टर बन के मनोरंजन करीन । चन्द्रकला देवी ल कहीन दीदी तोर बिहाव नई होय हे, तेल हरदी नई चढ़े ऐ । आज तोला हरदी तेल चढ़ा देंथन । मधु, जमुना देवी, महिला मंडल के दस सदस्य अउ चन्दा देवी ह अंदर-बाहर कपड़ा के तेल हरदी लगा के किचकिचवा के नहवा देथे । सब महिला मन तेल-हरदी चढ़ा के नचवाईन, मस्त ठुमका लगा के नाचिस ।

मधु ह कथे, दीदी घर जाथन, मजा आगे आज । बहुत दिन म खेले कूदे म, नाचे गाय म । चन्द्रकला कथे, भोजन करके जावा न । रसोईया ल कथे, भईया सब झन ल भोजन करावव । दार-भात, सब्जी-पूरी खवाथे । खाना खा के सब महिला मन सरिया, सारंगढ़ चल देथे । चन्द्रकला कथे, परसो रिसेप्सेन रखे हन, सब झन ल लेके आबे । चन्द्रकला देवी से आफिस के कर्मचारी, अधिकारी मन बधाई देय आत रहय । पार्टी के नेता, कार्यकर्तागण मन बईठे, आवत जात रहय । कामदेव सब ला चाय नास्ता, फल मीठा खवावय, चाय पिलावय । मस्त धमा चौंकड़ी, लईका मन करत रहय । घर, अंगना, दूवार भरे रहय, घर म आनंद ही आनंद रहय ।

तीसर दिन दो बर अउ जीप, कार पाँच-छ ठन म लगभग दो सौ बराती ले के दमउदहरा पहुँच जाथे । बैण्ड बाजा स्पेसल ले जाय रहय । चन्द्रकला देवी ह पुस्पा देवी, चन्दा देवी अउ कई बड़े अधिकारी, नेता मन ल कुरसी म बईठाय रहयष बाकी बराती मन ल दरी म बईठाईस । मस्त चाय पान, नास्ता कंठी राउत ह कराईस । बारात ल बाद म परघाईस । बिहाव के नेंग गायत्री मंदिर म गायत्री परिवार के अनुसार कराईस । सात फेरा म सात वचन लिन । पति पत्नी के अटूट बंधन म चन्द्रसेन अउ दौनामांजर बंध गे । चन्द्रकला देवी ल सब अधिकारी मन बधाई दीन । नेता, अधिकारी, कर्मचारी सब झन बधाई दे के अपन-अपन घर चल देथे । दिन म बिहाव पूरा हो जथे । दोपहर म भोजन कंठी राउत बढ़िया छप्पन भोग बनवा के रखे रहय । सब बरतिया मन ल अंगना अउ कोठार म बईठाय के शुद्ध घी के पकवान खवाईस । बरतिया मन छप्पन भोग खा के तृप्त हो जथे । घरतिया, बरतिया सब एक संग बईठ के दोना-पत्तल, पतरी म खाईन ।

दाईज म टीके रहय, झांपी, टुकनी, पाँच हजार रूपिया, पचहर दाईज, पाँच गाय लागत, पाँच बोरा धान, एक एकड़ जमीन देय रहय । चन्द्रकला कथे, बाबूजी हमन ल दाईज म कुछ नई चाही, ए मन ल हमन का करबो । रामदेव कथे, बेटी जो ले जा सकत हन ओला ले जाबो, बाकी धान, गाय ल रहेन देथन । जमीन ल चन्द्रसेन के नांव म चढ़ा देहा । दौनामांजर ल बिदा कराय के समय बहुत रोथे । दौनामांजर, माँ, भाभी, सहेली सबो के कले मिलके बहुत रोथ । लड़की मन आज से पहुना बन जाथे । बिदाई के नेंग करके चल देथे । बस, कार, जीप म बईठ के बराती मन दमउदहरा से रायगढ़ रात म आठ बजे पहुंचथे । सब अपन-अपन घर चल देथे । घर के पहुना मन बांचे रईथे, रात के भोजन करके सो जाथे ।

रामदेव रमौतीन ल कथे, कस डोकरी घर सुन्ना रईसे । मड़वा म बने डींड़वा नाचे के नहीं । रमौतीन कथे, काबर मंय डींडवा नई नाचिहंव, मोर बेटा के बिहाव होत हे । मोला अड़बड़ मजा डींडवा नाचे म आईस । अड़ोस-पड़ोस के महिला मन आ गे रहिन । बड़ नाचेन, सब महिला मन बने नाचिन, मजा आ गे । रामदेव कथे, ठीक हे टूरा के बिहाव म आनंद-मंगल मन म उछाह तो होना चाहिए । अब अंगना म कब मड़वा परही पता नहीं । रात म गपशप करत डोकरा डोकरी सो जाथे ।

दूसर दिन रिसेप्शन रखे रहय, चन्द्रकला देवी ह सरिया क्षेत्र के महिला मन ल निमंत्रण दे रहय । चुनाव होने वाला रहिस । सारंगढ़ अउ सरिया क्षेत्र के महिल मंडल के सदस्य मन बरदी के बरदी दल के दल आय रहय । चन्द्रकला देवी ह बढ़िया भोजन के बेवस्था करे रहय, बहुत पंडाल लगे रहय बिजली के रोसनी म जगर-मगर बरत रहय । पंडाल अउ सड़क म कई हजार के भीड़ जुटे रहय । गाँव वाला मन पंगत म बईठाय के, दरी म बईठाय के दोना पत्तल म भोजन खवाईस । दो से तीन हजार आदमी औरत मन खाना खाईन । चन्द्रकला देवी ल भाई के बिहाव के बधाई देत रहीन । वर-वधू ल गिफ्ट अउ लिफाफा घलो पकड़ावत जावय । रात के बारह बजे तक भोजन के बेवस्ता चलत रहीस । सहर के मेहमान मन ल एक पंडाल म बफे पद्धति से भोजन करवाईस । चन्द्रकला देवी के वाहवाही हो गे । रायगढ़ सहर म धूम-धाम से बिहाव होईस । अतका भीड़ कभू नही होय रहीस । पुस्पादेवी, रमौतीन, प्रेमलता, पूरनिमा, सुनील, चन्द्रप्रकास अऊ घर के पहुना मन सबसे आखरी म भोजन करीन । लईका मन बढ़िया सिनेमा के गाना म नाचत-झूमत रहीन, टूरा-टूरी मन डिस्को डांस नाचत रहीन । बड़े मन हांस-हांस के लोटपोट होगे रहीन । रात के एक बज गे, भोजन करके वर-वधू ल घर म ले जाथे ।

रमौतीन अऊ पुस्पा कथे, आज बने दिन हे सुहागरात बर, घर दे दव । पूरनिमा ह एक कमरा ल बढ़िया सजा देय रहय . चन्द्रसेन अऊ दौनामांजर के जीवन के सुरूवात सुहागरात से हो जथे, दो सरी अउ एक प्राण हो जथे । संग-संग जीये, मरे के कसम खाथे, दौनामांजर बहुत खुस हो जाथे । चरेर उमर के बिहाव होय रहय, गाँव के दुनियादारी ल सीख गेरहय . रात म गपसप करत सोगे । रात म देरी से सोय म बिहनिया 9 बजे जागीस । पूरनिमा ह चाय लेके गईस । पूरनिमा ह गुडमार्निंग कहिस, चाय बिस्कुट ल स्टूल म रख के आगे । दौनामांजर अऊ चन्द्रसेन फ्रेस हो के चाय पीईन । चन्द्रसेन कमरा म बाहर, सुनील, चन्द्रप्रकास अउ पहुना मन संग आके बईठ जथे । सुनील ह बधाई देथे । चन्द्रसेन कथे, सब ठीक-ठाक हे । अच्छा हे, चरेर उमर के बिहाव कतका जोर मारही, सुनील हांसत-हांसत लोटपोट हो जथे ।

चन्द्रसेन सब पहुना मन चाय-पानी पिलाय लगथे । मड़वा ह भरे रहय . लईका मन घलो सोय रहय . अड़बड़ नाचे-कूदे रहय । दस गियारा बजे तक सोवत रहीन । रमौतीन दाई ह दोपहर के भोजन के तियारी म लग जाथे । पूरनिमा ह दौनामांजर ल कथे, भउजी नहा धो के, पूजा-पाठ करके रंधनी म चल भात रांधे ल परही । दौनामांजर लउहा तियार हो जाथे । रमौतीन ह घर के देवता-धामी ल अगरबत्ती, धूप, होम देवाथे । तुलसी चौरा म दीया, अगरबत्ती से पूजा कराथे । फेर रंधनी घर ले जाथे समझाथे, बेटी मोर सास ह जो मोला बताय रहीस तोला बतात हंव, घर के चाबी ले । आज ले तंय घर के मालकिन अस । जो पका के देबे ओला मंय खा लेहूँ । पुस्पा देवी घलो समझाथे । दौनामांजर दूनों झन के पाँव म गिर जथे । पाँव परत हो दाई हाँ, मोला आसीस देवव । दूनों झन, दूधो-नहाओ, पूतो फलो के आसीस देथे । दौनामांजर ल उटा के छाती म लगा लेथे । रमौतीन कथे, बेटी हमन कतका दिन के पहुना आन, कतका दिन जीयत हन । तोर बेटा के मुँह देख के मरबो, तभे हमन ल मुक्ति मिलही । दौनामांजर ल रंधनी घर म सब समझा देथे ।

पूरनिमा ह भउजी के संग खाना बनाय लगथे । भउजी के कान म पूछथे, भउजी भईया ह बने मया करीस । भउजी हां म सिर हला देथे । पूरनिमा कथे दीदी जाग गे, रंघनी घर म आवत हे । चन्द्रकला देवी रंधनी घर म पीढ़ा म बईठ जथे । दौनामांजर पाँव छूथे, आसीस देथे । बछर भर म गोदी म बाबू खेलय । दौनामांजर ल छाती म लगा लेथे । खुसी के आँसू छलक जथे । चन्द्रकला देवी पीढ़ा म बईठ के चाय पीथे । साग ल पूरनिमा के संग साफ करे लगते, मटर ल छीले लगथे । बढ़िया ताजा मटर मीठ-मीठ लगत रहय । पूरनिमा घलो खात जावय । थोरिक देर रंधनी म बईठ के चन्द्रकला अपन कमरा कोती आ जाथे । सब पहुना मन संग अंगना म बईठ के काम बूता भोजन के बेवस्ता म लग जाथे ।

चन्दा देवी ह कथे दीदी अब बिहाव ह निपट गे, मंय ह घर जाहंव कहत रेहेंव . चन्द्रकला देवी कथे, बहिनी नवा बहुरिया के हाथ के जेवन जेय के जाव । बेचारी ह कतका मेहनत करके भोजन बनावत हे । खीर, तसमई, पुड़ी, दार-भात, साग कतेक जिनिस के व्यंजन बनावत हे । चन्दा देवी कथे, दीदी बने हुसियार पतोथिया हस । मोर जहुरिया होही दौनामांजर ह । चन्द्रकला कथे, तंही ह उमर ल पूछ के बता । रंधनी घर म जा के दौनामांजर ल पूछथे, बहनी तोर जनम तिथि का हे । बताथे दीदी मोर उमर ह उन्तालीस, चालीस चलत हे । चन्दा कथे तब हो बहिनी पाँच बछर छोटे अस । चन्द्रकला कथे बहिनी एक बछर म दू लईका बिया डारही । जुड़वा होही त चार लईका मिल जाही । दौनामांजर सरमा जथे, दीदी काबर चार-चार लईका होवात हव ।अभी मंय खेले खाहंव, मौज मस्ती करे के बाद लईका बियाहंव । चन्द्रकला कथे, बहु तोर सास ह तोर लईका के मुँह देख के मरहूँ कहत हे, नई तो मोर आत्मा ह भटकही कहत हेत कईसे करबे । दौनामांजर कथे, भगवान जईसे हमन राजी हन ।

चन्दा देवी अउ चन्द्रकला देवी रंधनी घर म पीढ़ा म बईठ के खीर-पुड़ी, बरा-भजिया, दार भात, साग खाते । बढ़िया सुवादिष्ट खाना पकाय रहय, दूनों झन मस्त भरपेट भोजन खाके आसीस, देईन . घर भर के पहुना मन ला भोजन कराथे । पूरनिमा, प्रेमलता, दौनामांजर बईठ के संग म खाथे । पूरा परिवार भोजन करके संतुष्ट हो के बधाई देथे । दौनामांजर मन लगा के जेवन बनाय रहय । लईका मन के किलकारी के घर-अंगना गूंजत रहय । भोजन करे के बाद म चन्दा देवी ह सारंगढ़ चल देथे । चन्द्रकला देवी पुहना, प्रेमलता, पूरनिमा के संग बईठ के गपबाजी ठट्ठा करेय लग जथे । दूसर दिन चन्द्रप्रकास, सुनील रायपुर अउ जबलपुर रेल से परिवार सहित चले जाथे । घर ह सुन्ना होगे रहय । घर के सामने पंडाल ह उजड़ गे रहय, बचे खुचे समान ल टेंट वाला मन ले जात रहय ।

चन्द्रकला देवी ह सबके हिसाब चुकता करीस । बिहाव म लगभग एक लाख के ऊपर खरचा होय रहय । चन्द्रसेन अपन डेयरी चलाय लगथे, डेयरी के धंधा से बने फायदा होत रहय । बैंक के करजा हर महीना किस्त म जमा करत जावय, दूध के धन्धा चल निकलथे । बढ़िया फायदा होवत रहय । खेती-किसानी से खाय बर आनाज धान, गेहूँ, चना तिंवरा हो जावय । घर म धन्य-धान्य के भंडार भर गे ।

चन्द्रकला देवी ह बिहाव के बाद सरिया विधानसबा क्षेत्र के भ्रमण म जाथे । सरिया के सारंगढ़ चन्दा देवी से मिले जाथे । सरकारी कार से जाय रथे, चन्दा देवी कथे दीदी चल तुरतुरिया वाल्मीकि आसरम देख दे । सब महिला मंडल ल ले के पिकनिक मनाबो । चुनाव घोसना होवईया हे, चुनाव के महासंगराम म कूद पड़बो । चन्दा देवी के बात मान के दूसर दिन सुबह से तीन जीप, कार म ले के सारंगढ़ से तुरतुरिया के लिये निकल पड़थे । सारंगढ़ से मिधौरी, भटगाँव, कसडोल से तुरतुरिया, बारनवापारा के जंगल म पहुँचथे । नदी के किनारे भोजन पकाय के जुगाड़ कर लेथे । सब समान उतार के रख देथे, सब कोई नदी नहाक के काली देवी के पहाड़ के मंदिर के दरसन करथे । वाल्मीकि आसरम म पूजा करथे, प्राकृतिक झरना से पानी तूरूर-तूरूर बहत रईथे बारों महीना ओकरे सेती नांव ह तुरतुरिया पड़गे ।

वाल्मीकि आसरम बहुत अच्छा, मनोरम स्थान घनघोर जंगल म हावय । पहिली जमाना म कईसे लोगन मन पहुँचत रहीन, बड़ चरज के बात ऐ । सीत ह लव-कुस ल ईंहें जनम दे रहीस । लव कुस के शिक्छा बाल्मीकि आसरम म होय रहीस । आसरम दरसनीय स्थान हे । तुरतुरिया के पास म बारनवापारा राष्ट्रीय उद्यान, अभ्यारन्य हे । सब महिला मन मिल-जुल के-भोजन पकाते । खेल-तमासा, नाच गाना घलो करथे, पिकनिक म मजा आ जथे । बढ़िया भोजन पत्तल म बईठ के खाथे । प्रकृति के गोद म, नदी के रेत म, अर्जुन पेड़ के जुड़ छांव म बईठ के मजा लेत रहिन । देस दुनिया के दूर, जंगल म मंगल मनावत रहीन । पिकनिक मनाय बर कालेज के छात्र मन रायपुर से आ जथे, महिला मन से धींगा-मस्ती करे लगथे । चन्द्रकला देवी कथे दीदी, बहिनी हो लउहा खाके घर चलव, सझौंती बेरा होत हे । फेर सांरगढ़ पहुत दुरिहा हे । चन्दा देवी सब महिला मन ल सकेल के कार जीप म बईठार के तुरतुरिया से अभ्यारन्य म सेर, भालू, हिरण, बनभईसा देखे चल देथे । अभ्यारन्य से एक घंटा बाद निकल के सारंगढ़ बर रवाना हो जथे ।

तुरतुरिया पिकनिक से महिला मन प्रसन्नचित रहय बहुत मौज मस्ती करीन । सब महिला मन चन्दा देवी अउ चन्द्रकला देवी विधायक, मंत्री ल धन्यवाद देईन । रात नौ बजे सारंगढ़ पहुँचीन, सब अपन-अपन घर चल देथे । चन्द्रकला देवी ह चन्दा देवी के घर रात रूक जाथे । चन्दा देवी ह गरम-गरम दू गिलास दूध केसर डाल के लाथे । बढ़िया सुंगधित दूध मीठा, दू गिलास चन्द्रकला देवी ह पी जाथे । बहिनी कुछु मंय खांव पींयव नहीं । ड्राइवर, गनमेन रेस्ट हाउस म सोये बर चल देहे, तहूँ थक गे होबे चल बिस्तर लगा सोबो ।
चन्दा देवी ह कोलाबारी कोती हाथ-पाँव धो के जैत खाम म दीया रख के परनाम करथे, हे सतपुरूष साहेब, गरू घासीदास बाबा सहायता कर, छीमा कर बाबा जी । ऐ बछर अउ टिकट दिलवा दे । चन्द्रकला देवी ह आरम करत रहीस । समारू अउ लईका मन भोपाल म रहीन । समारू के बहिनी रमसीला ह कथे भउजी तेल लगा देथंव । चन्दा कथे, हाँ तेल ले के आजा । दीदी के पीठ, कनिहा के मालिस बढ़िया दबा-दबा के करथे । चन्द्रकला देवी ह हल्का, आराम लगथे । चन्दादेवी ह मालिस करवाथे, गपसप मारत कब नींद पड़ जथे, पता नई चलय । बड़ भिनसार कुकरा बासत नींद चन्दा देवी के खुलथे । पानी, पेसाब जाके फेर सो जाथे । रात म थोरक ठंड, जाड़ बढ़गे रिहिस । कम्बल, रजाई ओढ़ के सोगे । सुबे आठ बजे सूरज देवता ह चढ़गे रहय, अंगना म घाम बगर गे रहय । आंखी रमजत-रमजत उठिस, चन्द्रकला अउ चन्दा देवी ह । रमसीला कते भउजी हो आज बने नींद पड़े रहीस, अईसे लगते चन्दा कते, हां तय तेल मालिस हाथ, पाँव रगर के करे रहे, बहुत अच्छा लगीस । चन्द्रकला देवी ह ब्रश करके फ्रेश हो के आ जथे । रमसीला ह तुलसी पत्ता, अदरक डाल के दूध के चाय बना के गिलास भर के लाथे । तीनों झन पीढ़ा म बईठ के गुनगुना धूम चाय पीथे ।

चाय पीयत पीयत चंदा देवी कथे, दीदी चुनाव म टिकट मिलही के नहीं । सारंगढ़ अउ सरिया विधानसभा सीट के पुरूष कई दावेदार मन सक्रिय होगे हे । दिल्ली, भोपाल के चक्कर लगा के हजारों रूपिया खरचा कर डाले हे । चन्द्रकला देवी कथे, बहिनी जब पारटी ह टिकट देही त चुनाव लड़बो, नई तो नई लड़न, का हमन अपन औकात म नई जीत सकन । भले बहुत काम कराय हन पर काम कतको करवाव पर वोट डाले के समय रूपिया,पईसा ल देखथे । जब तक गाँव-गाँव म दारू, मुरगा, बकरा नई देबे, तब तक वोट नई देवय । आजकल गाँव के लोगन मन बहुत चालाक, हुसियार होगे हे । विरोधी पारटी से मिल के पईसा घलो ले लेथे । चतुर चालाक नेता मन गली मोहल्ला के नेता मन पईसा ले के अपन पाकिट म धर लेथे, वोटर मन ल कुछ छोट मोट दे देथे । बाकी बचे रूपिया जेब म । यदि ई मन ल नई पूछबे त हरवा देथे, चुनाव के समय करुता, धोती सफेद पहिर के झकास निकल पड़थे । चुनाव के समय पूछ-परख बढ़ जथे । चन्दा देवी कथे, दीदी यदि टिकिट मिलही त लड़हूँ नई तो निर्दलीय नई लड़व । आजकल गाँव गाँव म विधायक बने ललक जागृति बढ़गे हे । बहुत लम्बा कतार हे, गलाकाट प्रतिस्पर्धा होगे हे । एक दूसरे के कमजोरी ल बढ़ा-चढ़ा के नेता के समक्ष रखथे । विधानसभा क्षेत्र म यदि मोला टिकट नई देहा त चुनाव हार जाहा । मंय ह जीत जाहंव, मय विनिंग कण्डीडेट हंव । बने लम्बा चौड़ा, ओवरू सब नेता के चरण छू के था देथे ।

चन्दा देवी कथे, दीदी चल हमन दिल्ली जाके टिकट के जुगाड़ म लगबो । चन्द्रकला देवी कथे, बहिनी माननीय मुख्यमंत्री जी ह कहीस, क्षेत्र म काम करव टिकट मिल जाही । चन्दा कथे, दीदी सांसद अउ केन्द्रीय मंत्री मन हमन के विरोध म हे । मुख्यमंत्री के विरोध म हे । सायद मुख्यमंत्री ह अपन आदमी ल टिकट दिलवा पाथे के नहीं, मोला संका हे । चन्द्रकला कथे, बहिनी मंय तो ओकरे भरोसा करे हंव, तहूं ह ओकरे भरोसा म हावस । चुनाव तियारे के संबंध म चरचा करत दस बजगे रहय । कार आगे रहय, रमसीला कथे भउजी चलव कुआँ म गरम-गरम पानी निकाल के नहवा देथंव । चन्दा अउ चन्द्रकला कथे चल लउहा नहा लेथन । रमसीला कुआं से बाल्टी म पानी निकारत जाय, दूनों झन के ऊपर म डारत जाय । लक्स साबुर म नहाईन । रमसीला ल कथे, पीठ म साबुन लगा के पथरा म रगड़ दे । चन्दा कथे, दीदी ईहाँ तरोई के रगड़े के बनाय रथें, बढ़िया रगड़-रगड़ के नहा ले । बढिया रगड़-रगड़ के नहाथे । जब तक तेल फूल लगाथे, तियार होथे, तब तक रामसीला ह चीला रोटी, पताल के चटनी बना लेथे । बढ़िया गरम-गरम चीला रोटी परोसथे । पताल के चटनी म मजा आ जथे । चार चार चीला रोटी म पेट भर जाथे, मजा आ जथे ।

अब मंय चलत हंव, रमसीला कथे, भउजी ड्राइवर अउ गनमेन ल रोटी देय हंव तब तक चहापी न । चन्दा कथे लउहा ला चहा ल । चन्द्रकला देवी चहा पीके कार म बईठ जथे । चन्दा देवी हाथ जोड़ के जय सतनाम, नमस्कार करथे । सारंगढ़ से रायगढ़ दू घंटा म पहुंच जाथे । पुस्पा दाई दुवारी म बईठ के रद्दा देखत रहय । रमौतीन दाई ह रंघनी घर म जाके दौनामांजर ल समझावत रहय, दाल म लहसून अउ लाल मिरचा के तड़का (फ्राई) लगाय बर बतावत रहय । जोर से छनाक ले जले के आवाज आथे, मिरचा के जले ले घर भर म मिरचा तेज ह हवाम फईल गे । सब आंक छीं-आंक छीं कर के छींके लगथे । घर से बाहर अंगना म आ जथे, सब कोई साथ म छींकत रहित । चन्द्रकला कथे, दाई का पकावत हंव, अड़ोस-पड़ोस के धम छींक पहुँच गे । रमौतीन कथे, बेटी बहरिया ला तड़का लगाय बर सिखावत रहेंव । दौनामंडर आँखी रमजत, आँसू पोंछत पाँव छूथे, चन्द्रकला कथे बाबू-लईका लउहा होय । दीदी, तोर आसीरबाद ले तीन महीना होगे महावारी नई होय हंव । चन्द्रकला ह माथा ल चूम लेथे, चल बहुत-बहुत बधाई । घर म वंस चलाय बर बाबूजी आवत हे । बलराम बाबूजी चन्द्रसेन ल बहुत चाहत रहीस, ओकरे सेती बेटा बन के आवत हे ।

रमौतीन, पुस्पा देवी दादी बने के खुसी म झूम जथे, नाचे लगथे । घर म खुसी आनंद ही आनंद हो जाथे । चन्द्रसेन डेयरी से आथे त ओहू ल पता लग जथे । बाप बने के खुसी म दौनामांजर के चुमा ले लेथे । रामदेव अउ कामदेव सुन के खुस हो जाथे । दौनामांजर के ओ जिन ले सेवा-सत्कार, देख-रेख सुरू हो जथे । पुस्पा अउ रमौतीन कोई गरू वाला जीच उठाय नई देवय । बढ़िया फल-फूल, दूध-मिठाई दौनामांजर ल खवावय, दौनामांजर ह गदबिदाय गे रहय ।

चन्दा ह टेलीफोन से चन्द्रकला देवी ल कथे, दीदी काली मंय भोपाल जात हंव, तहूँ जाबे तक संग चलव । चुनाव घोसणा होवईया हे । चन्द्रकला कथे, बहिनी सरिया अउ सारंगढ़ के महिला मन ल दिल्ली ले जाय पड़ही, तंय सब झन ल पूछ लेबे । चन्दा कथे दीदी ठीक हे मंय दस बारा महिला मन ल तियार कर लेथंव । चन्दा देवी ह मधु, अनिता, चन्द्रिका, रामकली, निर्मला ल भोपाल, दिल्ली जाय बर कथे । सब महिला मन घर म पति से पूछ के बताबो कथे । सरिया से जमुना देवी अउ संगवारी मन ल पूछिथे, ब मना कर देथे । मधु दिल्ली के घटना से डर गे रहे बोलथे पिछले बार दिल्ली म बहुत मुस्किल से जीव बांचे रहीस । अब हमन अपन जान ल जोखिम म नई डारन । आप मन जावव । पार्टी टिकट ले के आहव त चुनाव के प्रचार कर देबो । हमन तो कोई पार्टी म नई आन, जेहा हमन ल पूछही, ओकरे काम करबो । चन्दा देवी अवाक रहि जाथे, चन्दा देवी ह सब बात गोठ ल बता देथे ।

चन्दा देवी भोपाल जाय बर रायगढ़ जीप म जाथे । सारंगढ़ से चन्द्रपुर महानदी के रपटा से नदी पार करत रथे, जीप बीच रपटा म फंस जथे । बीच धार म चक्का फंस जथे । चार-पाँच झन मिल के निकारथे । रपटा से बड़ मुस्किल से जीप पार हो जथे । रायगढ़ रेल्वे स्टेसन म चन्द्रकला देवी ह इन्तजार करत रहय । अहमदाबाद एक्सप्रेस से बिलासपुर आ जथे । ट्रेन ले उतार के भोपाल जाय बर छत्तीसगढ़ एक्सप्रेस बर प्लेटफार्म नं. चार म जाके बईठ जथे । छत्तीसगढ़ एक्सप्रेस के डिब्बा ठीक 12 बजे लग जथे । ए. सी. एक नं. कोच म बर्थ नं. एक अउ दो म समान, सूटकेस रखवाथे । चन्द्रकला देवी ल विभागीय अधिकारी अउ कार्यकर्ता मन छोड़े आय रहय । छत्तीसगढ़ एक्सप्रेस ठीक समय म छूट जथे । बिलासपुर से रायपुर, दुर्ग, राजनांदगाँव, गोंदिया, नागरपुर से भोपाल सुबह 6 बजे पहुँच जाथे । चन्द्रकला देवी अउ चन्दा देवी कार म बईठ के बंगला चल देथे । चन्दा देवी चाय पी के अपन विधायक बिसराम गृह चल देथे । भूरी अउ कुसुवा स्कूल जाय के तियारी करत रहय, समारू चाय-नास्ता तियार करत रहय । चन्दा देवी सीधा रंधनी म चल देथे । भूरी, दाई आगे कहिथे । भूरी कहिथे, दाई अतका दिन कईसे लगा देय । चन्दा कथे, बेटी चुनाव घोसणा होवईया हे चुनाव यदि लड़ना हे विधानसभा क्षेत्र म रहे बर पड़ही । कुसुवा बाथरूम से निकल के आ के दाई के पाँव छूथे । चन्दा आसीस देथे, बड़े साहब बनव, खूब पढ़व लिखव । भूरी अऊ कुसुवा लउहा तियार हो के अपन-अपन स्कूल चल देथे ।

चन्दा देवी अउ समारू बाच जथें, दूनों झन मिल के सब्जी काट के तियार करथे । दार-चावल, सब्जी पकाथे, चन्दा देवी कथे, मंय नहा लेथंव । नहानी घर म घूस जाथे । समारू कथे, गाँव म गे रहे त बने चिक्कन चिक्कन दिखत हस । चन्दा हंस देथे । चन्दा कथे, अउ मोर डउका गाँव म हे ते हर खवाय-पियाय हे, त चिक्कन दिखत हंव । समारू कथे, का भरोसा औरत मनके मन सब ललचा जाय । चन्दा कथे अतका भरोसा तो करना चाही, कम से कम मंय तो नई करेंवा । समारू कथे, मंय कहाँ करत हंव तंय करे हस । मंय तो अतकेच कहेंव हंव बड़ सुघ्घर दिखत हस । चन्दा देवी कथे, चल ठीक हे, आ पीठ म साबुन लगा दे, रगड़ दे । समारू पीछ म साबुन लगा के कपड़ा म रगड़थे । चन्दा कथे, हाँ भरभरावत हे । काल कुआँ म नहावत रहेंव त रमसीला ह बने रगड़ दीस । समारू कथे, करिया गे हे । चन्दा कथे, बस-बस जादा तहूँ झन रगड़, नई तो करिया जाही । चन्दा नहा के तियार हो जथे ।

चन्दा अउ समारू भोजन करके आराम करथे, नींद पड़ जाथे । समारू ह पत्रिका पढ़त रईथे, दू बजे भूरी अउ कुसुवा आ जथे । लउहा कपड़ बदल के भात खा लेथे । भूरी दाई के संग म सो जाथे, कुसुवा समारू के संग पत्रिका, टी.वी. देखथे । समारू घलो दरवाजा बंद करके आराम करे लगथे । भोपाल के हवा पानी सूट करत रहय, पूरा परिवार अंगरेज मन जईसन दिखत रहय । भूरी अउ कुसुवा कक्षा 11 वीं अउ 12 वीं म पढ़त रहय, बोर्ड परीक्छा के तियारी म लग गे ।

चन्द्रकला देवी ह बंगला म हजारों महिला-पुरूष कार्यकर्ता से भेंट करथे, रात दस बजे तक भेंट करके सिकायत के आवेदन लेत रहय । जब सब चले गिन तब चन्द्रकला देवी ह आफिस, कार्यालय से निवास गईस । हाथ पैर धोके भोजन करके सो जाथे ।

क्रमशः

by-www.srijangatha.com

भाग- पन्द्रह

2006-06-27T13:04:00.000-07:00

चन्द्रकला देवी, सरिया क्षेत्र के बरमकेला के महानदी के किनारे के गाँव म दउरा म निकले रहय । रायगढ़ से सरिया फोन पुस्पा देवी चन्द्रसेन करथे । महिला बैंक के मैनेजर फोन उठाथे । मैनेजर ल बताथे, मालूराम अउ वोकर गोसाईन के चाम्पा स्टेसन के पहिनी नदी के पुलिया म एक्सीडेंट होगे हे । पति-पत्नी के मउत होगे हे । तुरंत खबर भेज दे रायगढ़ आ जावय । बड़ भारी एक्सीडेंट होय हे । करीबन सौ आदमी मर गे हे, हजार भर आदमी, बच्चा घायल होगे हे अउ महिला बैंक के मैनेजर ह सरिया से बरमकेला फोन से संदेस भिजवाथे । संदेस बहुत लेट म मिलथे । चन्द्रकला देवी के सब कुछ खतम होगे । रोवत-रोवत, आंखी सूझ गे । आँसू के धार थमत नई रहीस, जमुना देवी ह ढांढस बंधाईस । सब महिला मन चुप करावय, के चन्द्रकला देवी रोवत रहीस । सब के टप-टप आँसू चुचवावत रह । बड़ मुशिकल ले हि, तुमन कार द्वारा रायगढ़ पहुँचाईन चन्द्रकला के हाल, बेहान हो गे रहय पुस्पा माँ ल पोटार के खूब रोईस । रमौतीन दाई ह समझाईस, बेटी भगवान ले अतके दिन के संगवारी रहीस, झन दुःख कर । चन्द्रकला विधुन हो के रोवत रहीस । पुस्पा कईथे, चुप हो जा बेटी, तंय मंत्री अस । बड़े पद म हस । ठीक हे हमन जानत हन, फेर समाज ह थोड़े मानत हे । समाज के नदर म तंय रखैल हस । रखैल के कोई सामाजिक अधिकार नई रहय । ओकर घरवाला, परिवार वाला मन नई मानय । जतका दुःख मन म करना हे त कर ले । पुस्पा कथे, चल चांपा रेल्वे स्टेसन जा के देख, का हालत म लास हावय । पुस्पा दाई के बात ल मान के जाय बर तियार होगे ।

चन्द्रकला देवी ह पुलिस अधीक्षक, कलेक्टर से जानकारी पूछिस । रायगढ़ सहर के पचास आदमी के मृत्यु के समाचार रहय । अउ लगभग आदमी घायल होय रहय । मालूराम अग्रवाल अउ पत्नी हा ट्रेन के डिब्बा म फंसे हे बताईस । रेल्वे के स्टेसन मास्टर से पूछताछ करिस । चन्द्रकला देवी ह पुस्पा दाई के संग चाम्पा रेल्वे स्टेसन बर कार द्वारा निकलिस । चन्द्रकला देवी ह दूनों हाथ के चूरी ल पथरा म कुचरिच, माँग के सिंदूर ल पोंछिस अउ रंगीन लूगरा के जगा सफेद लूगरा, बिलाउज पहिन के गईस, दो घंटा म चाम्पा रेल्वे स्टेसन, नदी के पुल के पास पहुँच जथे । दुर्घटना स्थान म आदमी मन के रेला लगे रहय । अपन अपन रिस्तेदार मन के पता लगावत रहय । लाईन से दू सौ लास रखे रहय । दुर्घटना ठउर के चीख-पुकार माते रहय । मातम छाए रहय । सबके आँखी म आँसू बोहात रहय । कलेक्टर, कमिस्नर, पुलिस अधीक्षक अउ बड़े अधिकारी मन आ गे रहय । रोटरी अउ लायन्स-रेडक्रास के कर्मचारी घायल मन के सेवा म लगे रहय । चीख-पुकार के वातावरण गमगीन रहय । सब कोई उत्सुकता से देखत रहय । रेल के डिब्बा ल काट-काट के लास मन ल निकालत रहय । रात होय के कारण दिक्कत होत रहय । रहि-रहि के बादर-पानी भी बरसत रहय । करिया बादर ह लउकत, घपटत रहय । जोर से बिजली कड़कत, चमकत रहीस । खराब मौसम के कारण बहुत दिक्कत होत रहीस । अहमदाबाद के लगभग पाँच डिब्बा ह एक-दूसर के ऊपर चढ़ गे रहिस । एक डिब्बा ह पुल से नीचे नदी म झूलत रहीस । नदी म झूलत डिब्बा ह अब गिरिस, तब गिरिस दिखय़ । बहुत मुस्किल से क्रेन द्वारा खींच के जमीन म लाईस । लोग सर्च लाईट, कंडील, टार्च के रोशनी म रेल डिब्बा ल देखत रहय । जे डिब्बा म मालूराम के परिवार बईठे रहीस, डिब्बा ह चिपट गे रहीस । रेल के डिब्बा ल कटर, वेल्डिंग मसीन से काट के लास ल निकाले रहीन । दो सौ लास के आखिरी म मालूराम अउ ओकर डउकी के लास रहय । के चेहरा तो बुरी तरह से चपट गे रहय । दूनों के सरीर से पहचान म आवत रहय । चन्द्रकला देवी ह फूट-फूट के रोवत रहय । कलेक्टर अउ अधिकारी मन चुप कराईन । रात के तीन बजे तक डिब्बा काट-काट के लाश निकालिन । घायल मन के बिलासपुर, कोरबा के सासकीय अस्पताल म भर्ती करके इलाज करात रहीन । पूरा देस भर म सोक मनावत रहीन ।

रेल मंत्री ह दुर्घटना के जाँच के आदेस दे देथे । टी. वी. समाचार पत्र म दूसर दिन मुख्य समाचार देत रहय । चन्द्रकला देवी ह दूसर दिन लास के पोस्ट-मार्टम कराके ट्रम म लाश ल रायगढ़ भिजवा देथे अउ संग म घलो जाथे । मालूराम अग्रवाल के घर में लास उतरवाथे । दुःखी परिवार ल धीरज धराथे । ओकर बेटा-बेटी बाप के संग चीरकार मारमार रोथे । वोकर बड़े बेटा ह साफ कहि देथे, चन्द्रकला देवी दुःख म जरूर हमर साथ म हस फेर हमन तोला माँ के दरजा नई दे सकन । चन्द्रकला देवी अउ अपमान झन होवय कहि के अपन निवास स्थान गोसाला लहुट जाथे । चन्द्रकला देवी ह आँसू के घूंट पी के रहि गइस । पुस्पा दाई ह समझाते, बेटी ओमन तोला स्वीकार नई करय, जादा दुःख मत कर । अग्रवाल जी के साथ, अतके दिन के रहीस । जादा तोला माना हे त गया, बनारस, इलाहाबाद जाके गंगा नहा ले । मुंड़ मुड़ाय के जरूरत नई हे । चन्द्रकला कथे, दाई तंय ठीक कहत हस । मय कालि गया जाय बर ट्रेन के टिकट आरक्छण करा लेथंव । गनमेन अउ पी. ए. चार टिकट रेल के आरक्छण टाटानगर, टाटानगर से डेहरी आंसन से गया करा लेथे ।

चन्द्रकला के संग पुस्पा अउ गनमेन, पी. ए. गया पहुँच जथे । गया म होटल म रूक जथे । गया घाट गंगा नदी म स्नान करके मृत आत्मा के लिए पिण्डदान माँ, बेटी सिर मुण्डवा के बाल ल गंगा नदी म प्रवाहित कर देथे । पुस्पा देवी ह स्व. बलराम पांड़े के नाम से पाँच झन पंडित, भिखारी, गरीब ल भोजन कराथे । चन्द्रकला देवी ह मालूराम अग्रवाल के नाव अंतिम क्रिया दसकरण के नाव के इक्कीस झन गरीब मन ल भर पेट पुड़ी-सब्जी, दाल-भात खवाथे । मालूराम के आत्मा के सांति के लिये पूजा पाठ भी कराथे । गंगा मईया के पवित्र पानी म स्नान करके मन के मईल घलो ल साफ कर लेथे । मन म जो भाव, प्रेम, पियार मालूराम के प्रति रहीस, ओला आँसू बहा के गंगा नदी म बहा देथे । एक हफ्ता गया म निवास करथे । भागवत, गीता, रामायण के पाठ करथे अउ सुनथे । चन्द्रकला देवी के दुःख ह हल्का होथे । गया से बैजनाथ धाम भी भगवान भोले संकर के दरसन करे चले जाथे । बैजनाथ धाम म मन ल सांति मिल जथे । पुस्पा देवी ह बहुत समझाथे । बेटी एक दिन सब ल जाय बर हे । ऐ संसार नस्वर हे । चल अब घर रायगढ़ जाबो, बैजनाथ धाम से रेल से रायगढ़ आ जथें ।

रायगढ़ म मालूराम अग्रवाल अउ पत्नी के दाह-संस्कार अउ क्रिया-कर्म निपट गे रहय । पन्दरा दिन सोक म दुकान बन्द करे रहय । घर के मुखिया के मउत के बाद घर सम्हाले बर बड़े लड़का दुकान, व्यवसाय ल शुरू करीस । फेर ओही कठिन काम करे लगीन । स्व. मालूराम अउ ओकर पत्नी के कमी रहय । चन्द्रकला देवी ह टेलीफोन से सांत्वना देईस, कहिच यदि कोई काम होही त बताहा, जरूर मय सहयोग देहंव । चन्द्रकला देवी ह मुड़ ल मुड़ाय रहय । ऐकर सेती घर से एक महीना निकले नई सकय । चन्द्रकला देवी रायगढ़ से भोपाल चल देथे । भोपाल के निवास-कार्यालय म आफिस के काम निपटाथे । माननीय मुख्यमंत्री जी से मुलाकात भी करथे । मुख्यमंत्री ह चुनाव तियार, क्षेत्र म करे बर निर्देस भी देथे ।

चन्द्रकला देवी ह निवास कार्यालय से ही मंत्रालय के काम-काज निपटावय । सिर मुंड़ाय रहय, कहीं जावय त पूछय त बतावय कि मित्र के देहावसान होगे हे । मोर साथ बचपना के जिगरी दोस्त रहीस, मोर मितवा रहीस । चन्द्रकला देवी ह विधवा जईसे सफेद लूगरा-पोलखर पहिनत रहय, माथे म चंदन के टीका लगावय । दिन तो काम-बूता म कट जावय फेर रात बइरी ह नई कटय । आँखी ले आँसू टपक जावय । काबर जब ले मिले रहीस, वोमन दू सरीर एक परान रहीन अब महकाय कोन खरे होही ? अभी तक एक खूंटा म बंध के आय हंव, ओकर रहत ले कोई आँखी उठाय के देखे नई सकत रहीन । अब मंय अधूरा हो गेंव । आँसू ह टपाटप बहे लगय । एक मन ह कहै उठो संघर्ष करो । पुरूष समाज ल बता देवय, तोर बिन जीनकी कट जाही । मन ल ढांढस बंधावय । सोंचत-सोंचत नींद कब पड़य, पता नई चलय ।

पुस्पा दाई ह सुबे ले चाय-नास्ता करके रखे रहय । चन्द्रकला ह फ्रेस हो के बईठक रूम म आ के पेपर पढ़े लगथे । चुनाव तियारी के समाचार, सबो पार्टी मन प्रमुखता से कहत रहय । चाय के चुस्की लेत चन्द्रकला कथे, दाई चुनाव के कमान कोन सम्हालही । पुस्पा कथे, बेटी चिंता झन कर कोई भगवान द देही, नई तो मय देखिहंव । तोर बाबूजी अउ कक, भाई चन्द्रसेन घलो हावय । दाई मालूराम जी ह चुनाव बर चन्दा घलो वसूल करके देवत रहीस । बेटी कोई सेठ, बैपारी मन जरूर सहजोग करही । तहूँ ह पईसा, रूपिया ल जोड़ कर रूख । चन्द्रकला देवी ह विभागीय अधिकारी मन से चन्दा वसूल करे लगथे । कई अधिकारी मन ठेकेदार से रूपिया जुगाड़ करा देथे । चुनाव ल के धन इक्ट्ठा हो जाथे ।

चन्दा देवी विधायक ह मिले बर बंगला म आथे । चन्द्रकला देवी ह गर मिलके जोर से खूब रोथे । कहिथे चन्दा बहिनी, अब मंय अनाथ होगेंव, अब मोला कोन सहारा देही । चन्दा देवी कथे, दीदी तोला सतनाम साहेब ह सहायता करही, सतनाम साहेब म विस्वास कर । मय तो ओकरे अपार म भरोसा करथंव । चन्दा देवी ह बहुत समझाथे । दीदी तंय मुड़ ल मुड़ा के ठीक नई करे हस । नर अउ नारी समान हे, का केस उतारे ले जी गे । चन्द्रकला कथे, बहिनी रीति-रिवाज, अंधविस्वास ल माने ल पड़थे । मंय एकदम टूट गे हंव, जउन दाई मन करत गीन, में करत गेंव । मय गंगा नदी म नहा के केस उतवाय रहेंव, मोला अच्छा लगीस । जीये-मरे के साथ किरिया खाये रहेंव । केस ल उतरवा देंव ता का कम होगे, कुछ दिन म केस बाढ़ जाही । चन्दा देवी कथे, दीदी तंयभले पति मानके विधवा बने हावस, फेर समाज अउ परिवार वाला मन कहाँ मानिस । अग्रवाल जी के बेटा मन साफ माता माने बर इंकार कर दीस, कोई सम्मानजनक बेवहार घलो नहीं करीस । तब तोला कोई बात बर नई पुछीन, उल्टा कोई चीज के माँग करही करिके पूछिन नई हे । चल ठीक हे जतक दीन ले तोर संगलिखे रहीस, ओतका सुख तो मिले रहीस । बहुत अच्छा आदमी रहीस । चन्दा कथे, चिंता-फिकर झन कर, सब ठीक हो जाहय । पहली भी अकेल्ला रहे, अभो अकेल्ला रहबो । ये विधवा के बाना ल छोड़, तयं पढ़े-लिखे नारी हस । आज वैज्ञानिक युग म अईसे झन कर । बढ़िया अपन जिनगी ल जी । काकरो भरोसा झन कर एक ना एक दिन सब ल जाना हे ।

चन्दा देवी ह बहुत समाझाइस । तंय समाज ल कतका समझाबे, नई मानय । तोला तो कुँवारी ही समझत रहीन, ओला मत उधार । तोप दे माटी म, सब मुंदाय जाही अउ पहिली जईसे बन-ठन के निकल । आधुनिक नारी के प्रतिनिधित्व कर अगुवा बन, कब तक पुरातन पंथी बन के जीबो । पुरूष जईसे हमू मन काम-धाम करके, हरहिंछा जीवन जीबो । तभे समाज ह चेतही । मोर कहना मान दीदी, अतका दिन ले सफेद लूगरा पहिरे रहे ठीक हे । अबतो रंगीन कोसा के लूगरा पहिर, माँ म सिंदूर झन लगा । फेर हाथ म सोना के चूरी तो पहिर सकत हस । फेर तोला जीत के मंत्री बनना हे । चन्द्रकला देवी के थोरकिन साहस बढ़िस, हिम्मत करके कथे बने कहत हस बहिनी, तुमन सतनाम आंदोलन के जुड़ के मनुवाद के विरोध करत हेव । हमन अभी घलो मनुवाद ल मानत हन, ओही हमन के बाधक हे । चन्दा देवी कथे, दीदी ओही ल त उखाड़ फेंकना चाही । अंधविस्वास, रूढ़िवाद ले जकड़े समाज ल बदलना चाही । यदि हमन पढ़े-लिखे नारी मन ऐ बेड़ी ल नई तोड़बो त कोन तोड़ही, गाँव के अनपढ़ नारी ह । चन्द्रकला देवी ल बहुत समझाईस, चन्द्रकला देवी ल नारी शक्ति से प्रेरणा मिलिस ।

चन्दा देवी ह अपन हाथ ले विधवा के बाना, सफेद लूगरा, पोलखार ल उतारिस अउ रंगीन चटक पीला छींट के लूगरा-पोलखर पहिनाईस । माथा म बिंदी, हाथ म सोना के चूरी दू ठन डालिस । कान म झुमका, नाक मा लौंग, एक पूरा नारी के सिंगार करके दरपन करा खड़ा करीस । चन्द्रकला देवी खुद सरमा गे । बासंती रंग म चेहरा म चमक आगे रहय । बासंती रंग म नव दुल्हन जईसे दिखत रहय, चन्दा देवी मोहा जाथे । माथा ल चूम लेथे । चन्दा कथे, दीदी यदि मंय पुरूष होतेंव त तोला चूरी पहिरा के ले जातेंव । कतको बिहाती देय ल पड़तीच । चन्द्रकला देवी कथे, थोरकन मोर उमर ल तो देख । पचपन बछर के डोकरी ल कोन पूछही । चन्दा कथे दीदी तोर लईका नई होय ले सरी म कसावट, जवा टूरी मन जईसे हे । चन्द्रकला देवी ह दरपन के पास जाके देखथे, सही म बहुत सुन्दर दित रहय । रंग बासंती म बहुत जचत रहय, चन्द्रकला देवी ह चन्दा ल कस के पोटार के चुमे लगथे । सुख-दुःख के गोठ, बात करके चन्दा अपन विधायक विसराम गृह चले जाथे ।

चन्द्रकला देवी मंत्रालय म जाके बईठ गे । सरकारी काम-काज ल निपटाईस । कई मंत्रीगण अउ माननीय मुख्यमंत्री जी से मिलिस । मुख्यमंत्री जी ह चुनाव के तियारी करे बर कहिस । माननीय मुख्यमंत्री जी, मालूराम अग्रवाल के दुखःद निधन ल बहुत बड़ छति बताईस । चन्द्रकला देवी ल दूसर पार्टी के कार्यकर्त्ता बनाय बर कहिस, मुख्यमंत्री कार्यालय से सड़क, सिंचाई परियोजना बर पचास लाख रूपिया स्वीकृत कराके लाथे । दिन भर मंत्रालय के काम निपटा के शाम 6 बजे बँगला आ जथे । बँगला म दस-बीस झन से भेंट करे के बाद निवास म चले जाथे ।

पुस्पा माँ ह बेटी के रूप-रंग, हाव-भाव म परिवर्तन देख के बहुत खुस होथे । बेटी मरने वाला तो मरगे, ओकर संग हमन काबर मरीन । महूँ ह त जीयत हंव, सौ बछर से जादा होते हे । तोर बाबूजी के बिना पूरी जवानी बितांय अउ अभी घलो जीयत हंव । जब तक जीवन म आस हे तब तक चलत हे । जब सरीर अ थाऊ पड़ जाही तब मर जाहूं ।अभी तो चलत-फिरत हंव । चन्द्रकला देवी कथे दाई मोरो उमर ह लगजावय, दू सौ साल जी दाई । मोर देख-रेख कोन करही । पुस्पा कथे, बेटी मोर उमर तोला लग जाय, तंय जी दो सौ बरस । मंय तो बहुत जी लेंव । चन्द्रकला कथे, दाई आज भूख लगत हे कुछ बनाय हस । पुस्पा दाई ह सब झन नौकर-चारक, पी. ए. गनमेन ल खवाते । गरम-गरम भजिया खाके रात मे थोरकुन दाल-भात खा के चन्द्रकला सो जाथे ।

क्रमशः

by-www.srijangatha.com

भाग- चौदह

2006-06-27T13:02:00.000-07:00

चन्द्रकला देवी रायगढ़ ले जबलपुर दौरा म जाथे । बिलासपुर, इन्दौर नर्मदा एक्सप्रेस ह रात दस बजे जबलपुर पहुँचथे । प्रोटोकॉल से एस. डी. एम. श्री राज कुमार टंडन रेल्वे स्टेसन आय रहय । सुनील अउ पूरनिमा, चार बच्चा धर के आय रहय । चन्द्रकला देवी ह प्लेटफार्म म उतरथे । गनमेन ह सूटकेस, समान ल उतारथे । पूरनिमा ह पाँव छूके परणाम करथे । बारी-बारी से बड़ी माँ के चरण छूके परणाम, बच्चा मन करथे । छोटी गुड़िया रानी ल चन्द्रकला देवी ह गोदी म उटा के पियार करथे । चारों बच्चा मन ल चुमा लेथे । गनमेन अउ एस. डी. एम. ह कार म सूटकेस रखथे । एस. डी. एम. कते, मैडम सर्किट हाउस म रूम नम्बर चार रिजर्व हे, आप सीधे सर्किट हाउस जायेंगे या अपनी बहिनी के घर । मैडम कथे कि मय अपन बहिनी घर रांची जाहूँ । गनमेन अउ स्टॉफ बर कमरा के बेवस्था करा दे ।

चन्द्रकला देवी, पूरनिमा, सुनील, बच्चा मन कार म बईठ के मदन महल के टेलीफोन कॉलोनी म आ जाथे । लालबत्ती के कार देख के लईका मन इकट्ठा हो जते । कॉलोनी भर के निवासी-रहवारी मन आ जथे । पूरनिमा ह एक कमरा ल साफ-सुधरा, चादर बिछा के पलंग म रखे रहय । दू ठन कुरसी घलो रखे रहय । सुनील सुटकेस अउ पेटी मन ला कमरा म रखीस । चन्द्रकला देवी हाथ मुँह धोके फ्रेस होगे । पूरनिमा चूल्हा-चौंकी म दाल, सब्जी गरम करे लगे गे । चन्दा देवी ह गनमेन अउ पी. ए. ल रेस्ट हाउस चले जाय बर कहिते । सुनील चाय, पानी पिला के भेज देथे । कॉलोनी वासी महिला, पुरूष मन भेंट करके चल दीन । चन्द्रकला देवी लईका मन के नाम पूछथे । बड़े लड़की अपन नांव कीर्ति सांडिल्य ओकर बाद के हा वंदना, ओकर के छोटे लड़का ह सूरज सांडिल्य अउ सबसे छोटी ह तोतलावत कथे मोर नाव बड़ी माँ रोमा सांडिल्य अउ मोर माँ के नाव पूरनिमा अउ मोर ददा के नाव सुनील हे । मोर नानी के नाव रमौतीन, मोर दादी के नाव चन्द्रिका देवी, मोर बड़े दाई के नाव चन्द्रकला देवी हे, ओह भोपाल म मंतरी हे । कीर्ति कते तय ओला पहिचानथस रे । रोमा लजा के गोदी म बईठ जाथे । चन्द्रकला देवी ह बच्चा मन संग हंसे खेले लगथे ।

पूरनिमा ह डाईनिंग टेबल म खाना लगा देथे ।खात पियत ले रात के ग्यारह बज गईस । चन्द्रकला कथे, लईका मन नई सोवत हे । पूरनिमा कथे, दीदी बहुत सैतान हे, सब काहत हे बड़ी मैँ के पास सुतबो, आज जागत हे । दूसर दिन सो जात रहीन चलो रात होगे हे, सुतबो ।

पूरनिमा कथे । आज भी बड़ सुन्दर लगत हस । भोपाल म मंत्री बने के बाद म सुन्दरता बढ़ गे । एकदम अंगरेजन अउ कस्मीरी मोहला जईसे दिखत हस । चन्द्रकला कथे भईगे बहिनी आज अतके मालिश कर, काल के ल बचा दे । तहूँ थक गे होबे । सब लईका मन सो गे रहय, पूरनिमा दरवाजा ओधा के अपन कमरा म आके सोय लगथे । नींद नई पड़य, सुनील कईथे का सोंचत हस । पूरनिमा कथे, दीदी ह जीवन ल अईसे काट दीस । ओला पति सुख नई मिलिस । सुनील समझाईस सब के किस्मत एक जईसे नई रहय । तीव्र इच्छा सक्ति खत्म होये के बाद ओला नींद आईस । सुनील भी हट्टा-कट्टा, तंदरूस्त जवान रहय । पूरनिमा भी संतुष्ट रहये । मस्ती म झूमय, हांसत-खेलत चार बच्चा जनमा डारिस, पता नई लगिस ।

चन्द्रकला देवी ल बढ़िया नींद आ जथे । मस्त छुर छिंदहा सोय रहय । बिहनहा सात बजे सो के उठीस । बाथरूम म फ्रेस हो के निकलथे, पूरनिमा ह चाय बना के ले आथे । समाचार पत्र पढ़त-पढ़त चाय पीथे, समाचार पढ़त-पढ़त चाय खतम करथे । सुनील आफिस जाय बर स्नान ध्यान करे लगथे । चन्द्रकला देवी के गनमेन अउ पी. ए. आ जथे । चन्द्रकला देवी विभागीय अधिकारी मन के बैठक बारह बजे से बुलाय रहय । चन्द्रकला देवी ह स्नान करे बर बाथरूम म चले जथे । सेम्पू से बाल धोके निकलथे, बाल ल टॉवेल म लपेटे रहय । बाथरूम से बाहर केस ल टॉवेल म फटकारिस । बढ़िया काला, घना केस रहय । सेम्पू लगाय म चमकत रहय । पूरनिमा भी जल्दी नहा के आ जाथे । दूनों बहिनी अउ लईका मन बईठ के भोजन करथे । चन्द्रकला देवी बारह बजे मीटिंग लेय बर कलेक्टर कार्यालय पहुँच जथे ।

मंत्री जी के सुवागत, कलेक्टर मदर मोहन उपाध्याय करथे । जबलपुर जिला म महिला बाल विकास अउ समाज सेवा विभाग के प्रभारी ठीक नई रहय । चन्द्रकला देवी, मंत्री ह कलेक्टर अउ अधिकारी मन ल खूब फटकारिस, खूब खरी-खोटी सुनाईस । एक महीना के भीतर प्रगति लाय के चेतावनी भी देईस । मीटिंग समाप्त होय के बाद सर्किट हाउस म पत्रकार वार्ता भी होईस दूसर दिन के सबी अखबार म फोटो सहित छपे रहय – “समाज सेवी मंत्री अधिकारियों पर भड़की” । सब्बो जगह एक ही चर्चा, चन्द्रकला देवी, मंत्री जी के वाहवाही होगिस । चन्द्रकला देवी, पूरनिमा के लईका मन के भेड़ाघाट, बंदरकूदनी, घुमांधर, चौसठ जोमनी, मदन महल पूरनिमा संग धूमाथे । चन्द्रकला देवी ल अपन परिवार के संग रहय म विशेष आनंद मिलय । पूरनिमा कथे, दीदी-दू चार दिन अउ रह जाते । चन्द्रकला कथे, बहिनी चुनाव नजदीक आवत हे, सरकार तियारी म लगे गे हे । महूं ह जबलपुर से सतना,रीवा, सहडोल, सरगुजा होके रायगढ़ पहुँचहूँ । पूरनिमा कथे, दीदी दूनों माता मन बने हे । चन्द्रकला कथे, बहिनी नब्बे बछर से सौ बछर के हो गे हे, हमन ले स्वस्थ हे । आंखी ह बटबट ल दिखत हे, मुँह के छत्तीसी भी चमकत हे । बढ़िया रेंगत, बोलत हे । सब अपन-अपन काम करत हावय । पूरनिमा कथे एक बात पूछत हंव दीदी, पूस्पा माँ ह बाबू जी ल देखत-देखत उमर ल काट दीस । का राज हे मोला बता, मोला संका लागथे .

चन्द्रकला कईथे, बहिनी पुस्पा माँ के रायगढ़ म कोनो नई रहीन । चालीस साल तक बच्चा नई होईस त पांड़े बाबू जी ह छोड़ दे रहीस । पुस्पा माँ ह भरी जवानी, आसरा म काट दीस । कामदेव बाबूजी ह दवाई, बईगा-गुनिया, झाड़-फूँक, अघोर साधू के आसीरबाद देवाईस । पुस्पा माँ के नारीत्व ह जाग गे, बच्चा जन्माय के शक्ति आ गे । पुस्पा माँ गर्भवती हो जाथे । चन्द्रप्रकास के जनम मोर ले पहिली हो जाथे, मय एक महीना के बाद म होय हंव । पुस्पा माँ के दूध नई आवय अउ नगर पालिका के स्कूल म पढ़ाय बर जावय । घर म लईका देखईया कोनो नई रहय, त चन्द्रप्रकास ल रमौतीन दाई अउ ददा ह पाले पोसे हे । रमौतीन दाई ह क स्तन के दूध ल चन्द्रबान ल पियावय अउ एक ल मोला । दूनों के पेट भर जावय । चन्द्रप्रकास ल जरूर जन्माय हे, फेर दूध तो दाई के पीये हे । अपन लईका से जादा पियार करत रहय पुस्पा माँ ह । घर के पूरा खरचा चलावत रहय फेर एक औरत ल मरद के सुरक्षा चाही त राम बाबू जी ह ओला पूरा करे हे । रायगढ़ के मन जानथे के चन्द्रप्रकास रामदेव के बेटा आय । खुल्लम खुल्ला बोलथे, पर पुस्पा माँ ह कईथे, चन्द्रप्रकास ह बलराम के अंस ऐ ।

चन्द्रकला कईथे, बहिनी ऐ प्रश्न काबर पूछे तंय हा । पूरनिमा कईथे, रायगढ़ म सब झन अईसे कहय त आज हिम्मत करके संका के निवारण करे हंव । अब सब सम्पत्ति के मालिक तो चन्द्रसेन होगे हे । चन्द्रप्रकास तो अपन नौकरी से फुरसत नई ऐ । चल आज रायगढ़ म फार्म हाउस, मकान दूमंजिला हावय । खाय-पीये के कोई कमी नई हे । पुस्पा दाई के उमर भी जादा होगे कतका दिन के मेहमान हे । मोर ऊपर ओकर मया के छत हावय । ओकर आँचल के छाँव म बहुत ठीक, सांति लगथे मय ओकर करजा ल छूट नई सकंव । एक बामन परिवार ह यादव परिवार के टूरी ल गोदी लेके पाले-पोसे, पढ़ाय-लिखाय के नौकरी लगवाय हे । चन्द्रकला के आँखी ले आँसू बहे लगथे । पूरनिमा भी रो के दुःख हल्का कर लेथे । पूरनिमा कईथे, दीदी तोला मय रोवा देंव । चन्द्रकला कईथे, बहिनी नारी मन अपन दुःख ल आँसू बहा के हल्का कर लेथे । मोला हल्का लगीस, बहुत दिन होगे रहीस इकट्ठा होगे रहीस । अच्छा होईस, बहा दे तंय ह । ऐकरे नाव तो जीवन हे । सुख, दुःख, हांशी, खुसी जीवन, मरण हे ।

मालूरमाम जी पचासी से नब्बे बछर के जवान हे । पूरा जिनगी भर मोर काम आये हे । मोला विधायक अउ मंत्री बनाय म ओकर जादा हाथ हे । मरे के बेर म मय संग नई छोड़व । मय मंदिर म भगवान ल साक्षी मान के पति-पत्नी बने हन । ऐला समाज स्वीकार करय, चाहे सब स्वीकार करय । मय तो अपन पति मान ले हंव । राम म सो जथे ।

पूरनिमा भी थक गे हरय, पति संग मस्ती करके सो जाथे । सुबह उठके चाय नाश्ता पूरनिमा तियार कर देथे । चन्द्रकला देवी ह जल्दी स्नान, पूजा करके तियार हो जाथे । चाय-नास्ता संग म करथे । गनमेन अउ पी. ए. रेस्ट हाउस से आ जथे । सुनील ह चाय नास्ता कराथे । प्रोटोकॉल से कार सतना जाय बर आ जाथे । चन्द्रकला देवी जबलपुर से सतना कार द्वारा प्रस्थान करथे । सतना जिला के मैहर म माता सारदा देवी जी के दर्सन, पूजा पाठ करथे । दो घंटा ल मैहर म रूक के सतना बर चल पड़थे । सतना के सर्किट हाउस म कमरा आरक्षित रहय । मंत्री जी गार्ड आफ आनर, सेल्यूट ले के सर्किट हाउस के कमरा क्रमांक दो म गईस । प्रोटोकॉल से एस. डी. एम. सुवागत करे बर आय रहय । मंत्री जी हा फ्रेश हो के बाथरूम से निकल के सोफा सेट में आराम से बईठ जथे । आधा घंटा आराम करके पत्रकार, विभागीय अधिकारी, नेता मन से मिलथे । कलेक्टर ल सख्त निर्देस देते कि गाँव-गाँव म महिला मण्डल, महिला बैंक के स्थापना करके महिला मन ल आगे बढ़ाय म सासन की नीति के अनुसार काम करव । कलेक्टर ह सब विभागीय अधिकारी ल निर्देस जारी कर देधे । अधिकारी बैठक के बाद भोजन करके सो जथे ।

चन्द्रकला देवी, समाज सेवा कल्याण मंत्री के दौरा कार्यक्रम अनुसार सतना से रीवा के रहय । सुबह चाय-नास्ता करके कार द्वारा रीवा के लिए प्रस्थान करथे । रीवा के सर्किट हाउस म रूप आरक्षण, प्रोटोकॉल आफिस से होगे रहय । दोपहर के समय रीवा सर्किट हाउस पहुँचथे । गार्ड आफ आनर लेथे । मंत्री जी बैठक कक्ष जाथे । कलेक्टर, कमिस्नर, पुलिस अधीक्षक, संयुक्त संचालक, समाज सेवा कल्याण, महिला अधिकारी, अउ नेता, कर्मचारी मन के भीड़ लगे रहय । सब से मिलिस, बात सुनिस । अधिकारी मन ल निर्देश भी देईस, चाय सब के साथ पीईस । रूम म जाके हाथ, पाँव धो के फ्रेस होईस । कलेक्टर ह भोजन करे बर निवेदन करथे । चन्द्रकला देवी दोपहर भोजन के बाद थोड़ा विसराम, आराम करीस । थके, माँदे रहय, नींद पड़ जथे ।

अधिकारी मन के बैठक साम चार बजे से बुलाय रहय । कलेक्टर, कमिस्नर, संयुक्त संचालक, जिला अधिकारी अउ महिला मंडल के पदाधिकारी, महिला नेता मन आ गे रहय । मंत्री जी ह महिला ससक्तिकरण के काम के प्रगति बर नाराजगी व्यक्त करीस अउ सख्त निर्देस घलो देईस, के महिला बैंक, महिला सहायता समूह, महिला मंडल के गठन, गाँव-गाँव म होना चाहिये । कार्य में लापरवाही बरतने वाले अधिकारियों को निलंबित करने के निर्देस भी दिये । मीटिंग के बाद पत्रकार वार्ता भी होईच । चन्द्रकला देवी ह मीटिंग के बाद महल अउ लक्ष्मण बाग म हनुमान मंदिर देखे बर गईस । मंदिर म पूजा अर्चना भी करीस । राम जानकी मंदिर म भी पूजा करीस । रीवा के ऐतिहासिक महत्व के स्थान भी देखिस । रात दस बजे भोजन करके सो जाथे । गनमेन, पी. ए. मन बगल के रूम म सो जाथे ।

चन्द्रकला देवी ह भ्रमण कार्यक्रम के अनुसार रीवा के कार द्वारा सीधी से सरगुजा आ जथे । सर्किट हाउस सरगुजा म रात रुकथे । प्रोटोकॉल से कार भी मिल जथे । सर्किट हाउस म विभागीय अधिकारी, कलेक्टर के बैठक बुलवा लेथे । विभाग के प्रगत के समीक्षा करथे । रात्रि विसराम, सर्किट हाउस म करथे । सुबह चाय-नास्ता करके सरगुजा से रायगढ़ बर प्रस्थान करथे । कार ह सीतापुर के आगे जाय रहीस, टायर ह पंचर होगे । चन्द्रकला देवी कार से उतर के महुंवा पेड़ के छांव म खड़ा होईस । दिन के बारा बजे रहय । बने घाम करे रहय, घास म चन्द्रकला देवी के मुंह ललिया गय रहय । पसीना ह चुचवात रहीस । रूमाल से पसीना पोछिस । रूख के छांव ह जुड़-जड़ लागत रहय । सीतल मंद पवन चले लगिस । चन्द्रकला देवी के पसीना ह सुखिस, दूर से हरियर-हरियर जंगल, पहाड़ दिखत रहय । मेनपाट जाय के सड़क ओही मेरा रहय । मेनपाट म तिब्बती मन ह बसे हे, चन्द्रकला देवी सोंचथे । कार के पंचर टायर ल ड्राइवर अउ गनमेन ह दूसर टायर बलद के लगा देथे । पन्दरा बीस मिनट लगीस । चन्द्रकला देवी ह ड्राईवर से पूछते, मेनपाट ह कतका दूर हे । ड्राइवर ह कथे, मेडम ईंहाँ ले बीस कि. मी. दूर हे । चलिहा त चलव, फेर रास्ता ठीक नई हे । उबड़-खाबड़ पहाड़ी सड़क हे । कार नई चल सकव । चन्द्रकला देवी महुँवा के छाँव म बईठ के दूर से पहाड़ ल देखथे ।

ड्राईवर ह टायर बदल के कार ल सड़क के किनारे खड़ा कर देथे । गनमेन ह बोतल के पानी मेडम ल देथे । गरमी म पानी अच्छा लागथे । पानी पी के पसीना पोंछत-पोंछत कार म बईठ जते । कार सीतापुर से सीधा पत्थलगाँव के रेस्ट हाउस म रूकथे । दोपहर के भोजन पत्थलगाँव म करथे । मंत्री जी से भेंट करे बर सैंकड़ों महिला, पुरूष के भीड़ लग गे । एस. डी. एम. बी. डी. ओ. ल बुला के महिला बैंक, स्व-सहायता समूह गठन, महिला मंडल के गठन बर निर्देस देथे । चन्द्रकला देवी गाँव-गाँव म शासन के नीति से महिला विकास के कार्यक्रम चलाय के निर्देस देथे । महिला मंडल ल अधिक से अधिक अनुदान देय बर कईथे, नेता अउ कार्यकर्ता से मिल के मंत्री जी रायगड़ बर कार द्वारा निकल पड़थे । कार फर्राटा भागथे, तीन घंटा म रायगढ़, गोसाला पारा के निवास म पहुँच जथे . चन्द्रकला देवी दौरा,, टूट के कारण के-मांदे उतरिस । एक हफ्ता के बाद रायगढ़ा आय रहीस । पुस्पा दाई के पाव पड़िस । रमौतीन दाई ह एक गिलास ठण्डा पानी ले के आथे । चन्द्रकला ह पाँव छू के आसीरबाद लेथे । पानी पी के थोड़ा सुस्ता के साथ-मुहँ धो के पलंग म कनिहा सीधा करथे । रात के भोजन खा के सो जाथे ।

चन्द्रकला देवी ह सुबह मुंह-हांथ धो के, प्रेस हो के अखबार पढ़त रहिथे, चाय पीयत-पीयत नवभारत पेपर पढ़थे । चन्द्रकला से रमौतीन पूछते, बेटी पूरनिमा के लईका मन बने-बने हे । चन्द्रकला कईथे सब बने-बने हे । पूरनिमा घलो अच्छा हे ष बने सहबाईन बने हे । कॉलोनी म पूरनिमा बिना कोई काम नई होवय । बने मान-सम्मान हे । ओकर टूरी अउ टूरा मन बड़ सुघ्घर हे । बड़ हांसथे । अंगरेजन मेम होही, रमौतीन दाई हांसथे । चन्द्रकला कथे, दाई चन्द्रसेन के बिहाव कर दे । भात रंधईया एक झन होना चाही । पुस्पा भी हाँ म हाँ मिला देथे । रामदेव ल लड़की ढूंढे ल कहिथे । कामदेव कहिथे, बोल तो सतनामी समाज के लड़की मिल जाही । चन्द्रकला कथे, हमर परिवार तो समता मूलक वर्गविहीन समाज ल मानथे । अच्छा बने सुन्दर, पढ़ी-लिखी लड़की होना चाही ।

रमौतीन कथे, बेटी जो घर ल सम्हाल सकाय वईसे बहु लाहा त बनही । रामदेव ल चन्द्रकला कथे, बाबूजी सारंगड़ खरसिया, झारसुगड़ा, चन्द्रपुर, सक्ती डाहर लड़की देखव कामदेव कका ल घलो ले जावव । ऐ बछर सादी जरूर करव, नई तो भूखन मरे ल पड़ही । चन्द्रकला देवी बाथरूम म नहा-धो के तियार हो जथे । पी. ए. अउ गनमेन आ जथे । प्रोटोकॉल सेकार मंगवाथे । कलेक्टर अउ विभागीय अधिकारी से बातचीत, फोन से करथे । चन्दा देवी विधायक से भोपाल बात करथे । भोपाल के बारे म बातचीत करथे । चन्दा देवी ह चुनाव तियारी के संबंध म बताथे । भूरी अउ कुसुवा से बात भी करथे । चन्दा देवी कथे, दीदी महूँ ह दो दिन न सारंगढ़ जाहूँ कहत हंव । चुनाव लकठियागे, विधान सभा क्षेत्र म घूमे ल पड़ही । चन्द्रकला देवी कथे, पहली टिकट तो मिलय । टिकट मिलही तब चुनाव लड़बो । चन्दा देवी कथे, माननीय मुख्यमंत्री जी ह चुनाव के तियारी करे बर कहि दे हावय । सब विधायक मन भोपाल से क्षेत्र चले गे हावय । भोपाल सुन्ना-सुन्न लगात हे । चन्द्रकला देवी कथे, आज सरिया जात हंव । महुँ जनता से मिलहंव । चार साल होगे, ऐती-ओती करके पाँच साल पूरा होत हे । चन्दा देवी ह परणाम करके टेलीफोन रख देथे ।

चन्द्रकला देवी कार से रायगढ़ से चन्द्रपुर, सरिया जाथे । सरिया म अपन घर म जाके रूकथे । महिला बैंक कुले रहय । बैंक के हिसाब-किताब, देखथे । बैंक मैनेजर ल निर्देस देथे कि अगले साल चुनाव हे, जो माँगय लोन ओला तुरंत स्वीकृत करदेवव । गाँव-गाँव घर घर म महिला बैंक के कर्जदार रहय । जमुना देवी ह महिला मंडल के सदस्य मन ल लाईस । मंत्री के सुवागत करीन अउ बईठ गे, कुर्सी अउ चांवरा म । चन्द्रकला ह सबके हाल-चाल पूछते । चुनाव के तियारी बर चरचा करथे । गाँव-गाँव म मतदाता सूची म नाम जोड़वाय बर कहिस । मतदाता सूची म अपन आदमी के नाम जोड़वावव, सब महिला मन ल अपन सदस्य बनावव, वोट डाले बर बी कहव । गाँव के महिला मंडल एक दरी अउ ढोलक, मंजीरा भी देवव । मय अपन विधायक निदि से रासि स्वीकृत कर देथंव । चुनाव अब लकठियागे हे । सब झन ल घुलमिल के चुनाव जीतना हे । सक्रिय महिला ल एक लेडी सायकल भी देहव । सायकल से चुनाव प्रचार, घर-घर गाँव-गाँव, गली-खोर म करिहव ।

चन्द्रकला देवी सब महिला ल चाय-नास्ता कराथे । घर के अंगला म बईठ के चौपाल लगाय रहय । जमुना अउ सहेली मन ल लेके कई गाँव के दउरा करीस । सब गाँव म मंत्री जी के सुवागत होईस । गाँव के धूल, कीचड़ कार म लदबदा गे रहय । नाक म रूमाल लगाय रहय । फेर अब्बड़ धूल उड़य । चन्द्रकला देवी ह चुनाव लड़े बर सक्रिय होगे । सब महिला मंडल ल सक्रिय करत रहय । चन्द्रकला देवी के विरोधी मन भी तियारी म लग गे रहय । जगा-जगा म सभा, चौपाल म मिल जावय । चन्द्रकला देवी के स्थिति मजबूत रहय ।

चन्द्रकला देवी ह चार-पाँच दिन रूक के गाँव-गाँव दउरा करिस । सब मन भेंट, मुलाकात भी करिस । बने मुखिया मन ल रूपिया पईसा के मदद करीस ।

क्रमशः

by- www.srijangatha.com

भाग- तेरह

2006-06-27T12:59:00.000-07:00

चन्द्रकला देवी विधानसभा सत्र समाप्त होय के बाद रायगढ़, सारंगढ़ अउ सरिया के भ्रमण कार्यक्रम जारी होगे । चन्द्रकला अउ चन्दा देवी, दूनों झन छत्तीसगढ़ एक्सप्रेस से भोपाल से बिलासपुर जाथे । बिलासपुर से रायगढ़, अहमदाबाद एक्सप्रेस से साम 5 बजे पहुँच जाथे । रेल्वे स्टेसन म मंत्री जी ल लेय बर एस. डी. एम. अउ चन्द्रसेन, उप संचालक, पंचायत एवं समाज सेवा श्री पाटले जी आय रहय । चन्द्रसेन सूटकेस कार म रखिस, चन्द्रकला देवी अउ चन्दा देवी रेस्ट हाउस के बजाय घर म रूकना अच्छा समझीस । चन्द्रकला देवी ह पुस्पा दाई, रमौतीन, रामदेव के पाँव छूके आसीरबाद लेईस । चन्द्रसेन सूटकेस ल खोली म रखिस । चन्दा देवी जल्दी नहा धो के तियार हो जाथे । चन्द्रकला देवी ह नहा के तियार होके कपड़ा पहिन के तियाह हो जाथे । तब तक रमौतीन दाई ह बढ़िया चाय, बिस्कुट तियार करथे । चन्दा देवी अउ चन्द्रकला देवी परछी म पीढ़ा म बईठ के चाय पीथे ।

चन्द्रकला देवी घर म बुला के कह घलो देथे, कवि सम्मेलन अउ स्वागत समारोह के तियारी कईसे चलत हे ? चन्द्रकला देवी स्वंय जा के देखथे । चन्दा देवी सारंगढ़ म रूक के बेवस्था देखत रइ । मधु अउ जमुना देवी महिला मंडल के सदस्य मन ला गाँव गाँव जाके सूचना देथे, सबके उपस्थिति जरूरी बताथे ।

मंच अउ पंडाल एक दिन पहिली से लगत रहय । बहुत बड़े पंडाल अउ मंच बने रहय, पूरा मैदान भर छा दे रहय । पूरा पंडाल भर म दरी बिछा दे रहय । अतिथि मन बर तकिया, गद्दा बिछे रहय । थोरिक दूर म भंडारा के भोजन बनाय के बेवस्था करे रहय । रायगढ़ ले साल, श्रीफन, काजू, किसमिस, बादाम, सेवफल, केला, अमरूद पेटी के पेटी ट्रक म भर के ले जाय रहय । कवि सम्मेलन अउ स्वागत समारोह, सरिया म एक दिन के मेला लग गे रहय । लईका मन बर ढेलुवा, रेहंचुल झुलना, गुपचुप, मिठाई, पेड़ा, उखरा के मेला लग गे रहय ।

मधु, चन्दा देवी, सारंग़ पाँच सौ महिला मन ल बस, ट्रक, बैलगाड़ी म ले जाय रहय । सरिय क्षेत्र के गाँव गाँव के महिला मन आके चार बजे पंडाल भरगे रहय । चन्द्रकला देवी अउ चन्दा देवी वारे ह अपन हाथ म परोस के महिला मंडल के सदस्य मन ल भात, दार, सब्जी, चटनी खवात रहय । सरिया गाँव म एक दिनी मेला लगे रहय । झमाझम पंथी नृत्य, करमा, घलो होवत रहय । सरिया गाँव के नार-नारी, टूरा-टूरी मन धक्का पड़त ले देखय । सियान कहय, अतका कन भीड़ महिला मन सौ साल म न होय हे । पूरा गाँव म महिला ही महिला ।

रायगढ़ से कवि मन ला लाय बर जीप रेल्वे स्टेसन म लगे रहय । डॉ. बलदेव साव अउ अनंदी सहाय सुक्ल अगुवानी करत रहय । सब कवि मन बाम्बेहावड़ा मेल से आईन । सर्व श्री लक्ष्मण मस्तुरिया, डॉ. विमल पाठक, डा. विनय पाठक, पवन दीवानजी, रामेस्वर वेस्नव, डी. पी. तिवारी, सुजीत नवदीप, नारायन लाल परमार, नंदू लाल चोटिया, रवि श्रीवास्तव, परदेसी राम वर्मा, सुसील यदु, ममता चन्द्राकर, विसम्भर मरहा, श्रीमती प्रभा सिंह आदि सबे कवि मन ले लेके सरिया आईन । चन्द्रकला देवी के निवास म ठहराय के बेवस्था रहय । सब झन के सुवागत करथे । बढ़िया सुस्वाद भोजन कराके कार्यक्रम सुरू करवाईन ।

स्वागत समारोह पहिली रात के आठ बजे शुरू होईस । चन्द्रकला देवी मंत्री पंचायत एवं समाज सेवा अउ चन्दा देवी विधायक सारंगढ़ के सुवागत मधु ह साल अउ श्रीफल, नरियर अउ बड़े फूल के हार से करथे । पंडाल म करतल ध्वनि से सुवागत करथे । जमुना अउ मधू ह चन्दा देवी ल लाल ओढ़ाके सुवागत करथे । बड़े हार पहिराथे, नरियर तको भेंट करथे । करतल ध्वनि से सुवागत करथे । महिला ससक्तिकरण के माडल पूरा राज्य म प्रतम आय के कारण भारत सरकार से पुरस्कार मिल रथे । ओही खुसी म सरिया म सम्मान समारोह होत रहय । लगभग चार से पाँच सौ महिला मन, फूल माला से सुवागत करथे । लगभग दू घंटा से जादा समय तक सुवागत सम्मान के कार्यक्रम चलिस । चन्द्रकला देवी से सम्मान ल नारी के सम्मान कहिथे । जे समाज म महिला के सम्मान नई होवय ओ समाज ह खतम हो जथे, कहिस । आज तक ओत्तक कन सम्मान काकरों नई होय रहिस । चन्द्रकला देवी अउ चन्दा देवी ह भारी गदगद हो गिस ।

कवि सम्मेलन रात दस बजे सुरू होईस । मंच म सबे कवि मन के पुस्पाहार से सुवागत, चन्दा देवी विधायक अउ चन्द्रकला देवी मंत्री ह बारी बारी से करथे । सर्वश्री पवन दीवान जी, नंदूलाल चोटिया, लक्ष्मण मस्तुरिया, रामेस्वर वैस्णव, अनंदी सहाय सुक्ल, डॉ. विनय पाठक, डॉ. विमल पाठक, परदेसी राम वर्मा, सुसील यदु, डॉ. बलदेव राव, ममता चन्द्राकर, विसम्भर मरहा, श्रीमती प्रभा सिंह, सुरदीप नवदीप । कवि सम्मेलन के संचालन नंदूलाल चोटिया जी करथें । जबरदस्त कवि सम्मेलन के सुरूवात डॉ. विमल पाठक जी के सरस्वती वंदना से सुरू होथे । कवि सम्मेलन म बीस हजार से जादा भीड़ जुटे रहय । आसपास के गाँव के नर नारी टुटे रहय । नंदूलाल चोटिया जी ह अपन निराला अंदाज म संचालन करत रहय । छत्तीसगढ़ी के गीतकार भाई लक्ष्मण मस्तुरिया लाडला कवि के सब झन ताली बजा के सुवागत करय, ताली के गड़गड़ाहट से आकास गूंज उठीस । लक्ष्मण मस्तुरिया जी मंच ल अउ श्रोता मन ल हाथ जोड़के परणाम करथे ।

गीत –
मोर धरती मईया, जय होवय तोर ।
मोर धरती मईया, जय होवय तोर ।।
गीत –
मोर संग चलव ग, मोर संग चलव ग ।
मोर गिरे पटे हपटे मन, अउ परे परे मनखे मन,
मोर संग चलव ग, मोर संग चलव ग ।

सब श्रोता मन झूम उठीस । माहौल कवि सम्मेलन के बन गे । खचाखच भीड़, लक्ष्मण मस्तुरिया जी के वाहवाही होगे ।
नंदूलाल चोटिया जी ह जन कवि अनंदी सहाय सुक्ल, रायगढ़ ल कविता पाठ करे बर बुलाइस । सुक्ल जी ह बढ़िय दू ठन कवित श्रंगार रस के सुनाइस । डॉ. विनय पाठक जी ह छत्तीसगढ़ी कविता सुनाइस । सुसील यदु, रामेस्वर वैस्णव, परदेसी राम वर्मा, डॉ. विमल पाठक, विसम्भर मरहा, डॉ. बलदेव साव, प्रभा सिंह ह नारी ससक्तिकरण बर कविता सुनाइस प्रथम दौर के अंतिम कवि पवन दीवान जी सुनाइस । अपना निराला फकीराना अंदाज म गीत फटकारिस ।

गीत –
मोर गाँव म टूरी रहीच,
चन्दा ओखर नाव ।
गली, खोर घूमत, किंचरय,
चलत त ओहा नागिन जईसे
हांसय त बिजली चमकय ।
करिया बादर कस ओकर केस रहय
कड़कत, घपटत रहय चाल ।
मोर गाँव म टूरी रहय,
चन्दा ओखर नांव ।
पवन दीवान जी ह चार पाँच ठन गीत, कविता सुनाके मन ल मोह डारिस । बहुत वाहवाही लुटिस । वन्स मोर-वन्स मोर कहत रहय । महिला मन हांसत-हांसत मस्त होगे । कवि सम्मेलन सफल होगे । जम के बईठे रहय, कोई टस से मस नई होईन ।

नंदूलाल चोटिया जी दूसर दौर के सम्मेलन चालू करिस । रात तीन बजगे रहय । कवि सम्मेलन सुबह के पाँच बजे तक चलत रहय । सुबह पूरा भीड़ ह एक से बढ़िया कविता, गीत सुनत रहय । मालूराम जी चाय पिलाके सब कवि मन ला रायगढ़ के लिये जीप म बईठा देथे । सब कवि मन गदगद मन से बिदा लेथे । कवि सम्मेलन खतम होय के बाद सब महिला मन अपन अपन गाँव चल देथे । बहुत बढ़िया कार्यक्रम होथे । चन्द्रकला देवी ल कार्यक्रम कराय बर गाँव वाला मन बधाई देथे । चन्द्रकला देवी, चन्दा देवी थोरकुन सो जथे ।

डा. बलदेव साव अउ अनंदी सहाय सुक्ल सब कवि मन ल रेस्ट हाउस, रायगढ़ म रुकवाय रहय । चाय-नास्ता करके थोड़कन झपकी मार के सो जाते । नहा-धो के तियार हो जथे । डा. बलदेव साव कथे चलव पं. मधुकर पांडेय जी ह बैंकुठपुर म निवास करत हे देख लव, अभी तबियत भी ठीक नई हे । जादा दिन के संगवारी नो हय । दो जीम म बईठ के पंडित जी के दरसन करे बर जाते । परछी म लकड़ी के चार कुरसी अउ तखत म बईठारिन । पांडेय जी खटिया म बीमार पड़े रहय । बलदेव साव जाके जगाथे, बबा उठ न ग, जम्मो छत्तीसगढ़ के साहित्यकार अउ कवि मन देखे बर आय हे, कोन अस बाबू, पांड़े जी कथे । मय बलदेव हंव बबा । आँखी ल रमजत उठीस कहिच, बेटा बुढ़ापा म बीमारी नई छोड़त हे । कई दिन ले बुखार आवत हे । बलदेव कथे, बबा दवाई-माँदी खाय हस । बलदेव साव हदूनों हाथ ल पकड़ के उठाथे अउ कुरसी म बइठारथे ।

पंडित जी के दाढ़ी अउ सिर के बाल ह सनपटुवा जईसे सादा होगे रहय । आकर्षक व्यक्तित्व रहय । चिंतक, दार्सनिक, कवि, साहित्यकार झलकत रहय । पंडित स्यामलाल चतुर्वेदी, डा. विमल पाठक, डॉ. विनय पाठक, पवन दीवान, लक्ष्मण मस्तुरिया, रामेस्वर वैस्नव, सुरजीत नवदीप, नंदूलाल चोटिया, श्रीमती प्रभा सिंह, ममता चन्द्राकर, परेदीस राम वर्मा, सुसील यदु अउ बहुत झन कवि मनपांव छू के साहित्य के दिव्य पुरूष से आसीस लेथे । पांड़े जी सब झन ल जानत-पहचानत रहय । कहिस, बलदेव कुछ खिला पिला भई । सब साहित्यकार मन मना कर देथे । स्यामलाल चतुर्वेदी ह तबियत के बारे म पूछथे, पांड़े जी कथे नरम गरम होत रथे । सब झन से साहित्यिक चरचा करथे, प्रेरणा देथे कि जो मन म विचार आवय तेला कागज लेवव । अच्छा से अच्छा साहित्य के सिरजन करव, देश अउ छत्तीसगढ़ के नाम होवय । मोर आसीरवाद हे फलव, फूलव, हरियावव । साहित्य के गंगा म सब झन डुबकी लगा के तरगे रहय । गदगद मन से सबे साहित्यकार मन बिदा लेके अपन अपन घर, गाड़ी से रायगढ़ से चल देथे । कवि सम्मेलन के याद करके आनंदित होत अपन घर चल देथे । छायावाद के प्रवर्तक मुकुटधर पांडेय जी के आशीष के बड़े कई साहित्यकार बन गे हे । रायगढ़ ल पंडित मुकुटधर पांडेय अउ राजा चक्रधर सिंह के नाम से जाने जाथे ।

चन्द्रकला देवी ह अपन विधानसबा क्षेत्र म दौरा, तीन-चार दिन करीस । घर म जाके महिला मन ल धन्यवाद देईस । महिला बैंक से जरूतमंद ल ग्रामीण उद्योग, कुटीर उद्योग, परम्परागत धंधे, रोजगार बर स्वीकृत कराईस । सरिया, रायगढ़ क्षेत्र म कोई महिला बेरोजगार नई रहय । खेती किसानी के बाद घर म कढ़ाई-बुनाई, सिलाई करय । महिला मंडल के माध्यम से उत्पादित माल ल बड़े सहर म बेचे ले जावय । गाँव गाँव म रेडीमेड कपड़ा बनावय । पेटीकोट, लूगरा, पोलखर के फाल, टी शर्ट, जांघिया, लईका मन के कपड़ा भारी मात्र में बेचे बर सहर भेजे ल लेगय । एखर म महिला मन के अतिरिक्त आमदनी होय लगिस । पिसी हल्दी, मिर्चा, मसाला, पापड़, बरी, आचार, सेव नमकीन, सूती कपड़ा लूंगी, चादर पूरा देश भर म जाए ल लगिस । महिला समृद्धि में सराहनीय कार्य होवत रहीस । ग्रामीण अर्थबेवस्था म महिला मन के भागीदारी सुनिश्चित होये ल गाँव के पलायन के समस्या दूर होगे रहय । काबर खेती-किसानी के बाद हर हाथ ल काम मिले ल लगीस ।

चन्द्रकला देवी महानदी से सिंचाई हेतु उद्वहन सिंचाई योजना चारू करवाईस । सरिया बरमकेला म गरमी म धान, मूंगफली, मूंग, उड़द के खेती करे बर सलाह देवाईस । भूमि वैज्ञानिक मन ल ले जाके मिट्टी परीक्षण करवाईस । गरमी म खेती के सलाह भी दिलवाईस । किसान मन गरमी म धान लगाईस । भरपूर फसल होइस । चारों डहार गरमी म हरा भरा रहय । मूंगफली, मूंग, उड़द के फसल भी अच्छा रहय । गन्न के खेती घलो लगवाईस । सरिय अउ बरमकेला क्षेत्र ह, पंजाब अउ हरियाणा के समान फसल उपजावत हे । गाँव के पलायन के समस्या ह दूर हो जथे । आस-पास गाँव के मन ल गरमी भर रोजगार अउ रोजा-मजूरी मिले लगथें । चारों डाहर खुसाली छा जथे ।

चन्द्रकला देवी सरिया से रायगढ़ आ जथे । पुस्पा देवी अउ रमौतीन दाई ह बाट जोहत रहय, कि मोर बेटी ह कब आहि । चन्द्रकला देवी ह गौसाला म जाके गोवंस के पूजा करथे । चन्द्रकला देवी ह बछिया, गाय मन के पाँव पखार के पूजा करथे । गले मिलके रो डारथे । बीते दिन के याद आ जथे, ये ही गाय के दूध पी के जियत रेहेन । मोर पूरा परिवार ह पलत रहय । ये गोसाला म काम नई करत रहतीन त हमन जाने कहा कलकत्ता, इलाहाबाद के गंदी बस्ती म सड़त रहितेन । चन्द्रकला कथे माता हो, तुमन के बहुत उपकार हे । मय जितय भर नई भूल संकव । रमौतीन दाई देख के रो डारथे । चन्द्रकला ह चुप कराथे । बेटी चुप हो जा, चन्द्रकला कथे, दाई कईसे भूल जावंव । एकर करजा तो चढ़े हवाय । रमौतीन कथे बेटी हमन तो सेवा करत हन । सेवा नई करतेन त कब के गाय मन मर जातीन । चन्द्रकला देवी ह फेर पाँव छू के घर आ जथे ।

रमौतीन दाई कते, बेटी काबर जी छोटे करत हस बने तो पाले पोसे हन । ओतके बेर पुस्पा दाई आ जथे । बेटी ल गुमसुम देख के कईथे, का होगे चन्द्रकला । कुछ नोहे दाई, बीते दिन के याद आ गिस । रमौतीन कथे, दीदी तै बने पढ़ा लिखा के नौकरी लगा देय हस । नौकरी छोड़े के विधायक, मंत्री बन गे हे तभो ले हदरत हे । पुस्पा कईथे, बेटी झर हदर जऊन किस्मत म रथे तउन होही । कर म के लेख ल कोई काट नई सकय । पुस्पा ह चन्द्रकला के माथा म हाथ फेर के केस ल सुलहाथे । चन्द्रकला कते, दाई थोरकन आँसू बहाय ले मन हलका हो जाथे । नारी मन के आँसू ह शस्त्र हे । बड़े बड़े ल काबू म ला देथे । कोई चिन्ता, फिकर के बात नई हे । पुस्पा कईथे, बेटी बड़े बड़े कलेक्टर, कमिसनर, एस. पी. साहब मन से लूट अउ नमस्कार करत हे, कम बड़े बात हे । आज काला नमस्ते करथे । बड़ इज्जत, सत्कार होत हे । पूरा मध्यप्रदेश म उत्कृष्ट कार्य करे हस, ओकर सम्मान तोला मिलिस । भविष्य म अच्छा बने काम करबे त तोर नांव होही । दूनो दाई मन सीख देत रहय । बहुत समझाईन ।

चन्द्रकला कथे, देना दाई भात, अब्बड़ भूख लगत हे । ओही मेरन बईठे खाना, भरपेट खाईस । दाई के रांधे भोजन के बड़ सुवाद रहय । भोजना के बाद चार-दस झन आदमी मन से मिल के सो जाथे । सार्वजनिक जीवन में सुख के साथ दुःख घलो हे । सरिया सम्मान समारोह म महिला मन के अत्तेक भीड़ ल देख के पुरूष समाज सोचे लागिन, यदि अईसन भीड़ सब्बो विधानसभा म हो जाही त पुरूष समाज कहा जाही । नारी मन जाग गे रहय । ओकर स्वाभिमान ह जाग गे रहय । ओकरे कारण महिला मन सासन अउ समाज म समान अधिकार मानय । सरिया, सारंगढ़ क्षेत्र के प्रभाव उड़ीसा, बिहार, बंगाल अउ आंध्रप्रदेश में घलो पड़े लग गिस । सबो राज्य म महिला उत्थान के योजना चलत रहय । नारी उत्पीड़न, बलातसंग, दहेज, छेड़छाड़, मारपीट सब बंद होगे रहय । यदि काकरो संग घटना होतिस त सब झन जुरिया जाय अउ विरोध करय अउ जेल भिजवा देवय । गाँव गाँव म महिला मन शराब, जुआ बंद करा दीन । गाँव गाँव साफ सुधरा, स्वच्छ, सांत वातावरण होत रहय । गाँव म कोई छोट-मोट लड़ाई झगड़ा होवय त आपस म पंचायत ह निरनय कर देवय । राम राज्य के संकल्प सरिया क्षेत्र म पूरा होत रहिस । गाँव के चौपाल म सब निरनय हो जावय ।

महात्मा गांधी जी के ग्राम सुराज के सपना ल सरिया म पूरा होत हे । सबे झन राम राज्य के संकल्पना के अनुसार काम पंच-परमेश्वर मन करत रहय । ग्राम पंचायत के सरपंच महिला रहय । महिला पंच मन के सरपंच जादा रहे । सब चुनाव जीत के आ गिन । सासन म भागीदारी निभावत रहिन । चन्द्रकला देवी के मार्गदरसन म गाँव के उत्तरोत्तर विकास होत रहिस । ग्रामीण कुटीर उद्योग, परम्परागत धंधा सब झन करे लगिन । हर हाथ ल गाँव म काम मिले रहिस । कोई भूख म नई मरय, सबके कोठी म धान भरे रहय । उपर से रोजी मंजरी अलग मिल जावय । पलायन के समस्या दूर होत रहय । नई तो पलायन करके गाँव के गाँव आदमी मन बाल-बच्चा, डौकी-लइका सहित कलकत्ता, इलाहबाद के ईंटभट्ठा म बंधुवा मजदूर बनके जात रहय । पूरा गाँव खाली हो जावव । मात्र घर रखवार डोकरी-डोकरा मन रहय । झार-झार कमाय खाय ल चल देवय । जहाँ बहु बेटी के इज्जत के संग मान सम्मान घलो गंवा के आवय । मारपीट तो आम बात रहय । छत्तीसगढ़ के मजदूर मन के बहुत शोसन होवय । चन्द्रकला देवी ह कई परिवार बंधुवा मजदूर बने रहय, ओला छोड़ा के लाय हे । ओकर रोजी मंजूरी के बेवस्था घलो कराईस चन्द्रकला ल देवी जईसे पूजय ।

कलेक्टर रायगढ़ ल मुख्यमंत्री निर्देश देथे कि चन्द्रकला देवी, मंत्री ह रायगढ़ म हे । ओला सूचना दे दे कि माननीय मदर टेरेसा ह कलकत्ता से मेल द्वारा बम्बई जात हे ओकर सुवागत, सतकार सासन के ओर से चन्द्रकला देवी करही । कलेक्टर साहब ह चन्द्रकला देवी ल सूचित करथे कि मदर टेरेसा कल सुबह पाँच बजे बाम्बे हावड़ा मेल से रायगढ़ के पार होही । राजकीय सत्कार के साथ सुवागत करना हे । चन्द्रकला देवी ह अपन सौभाग्य समझथे कि अत्तेक बड़ महान समाज सेवी के दर्शन करहूँ अउ आसीरबाद लेहूँ । कलेक्टर ल सब बेवस्था करे के निर्देश दे देथे । रात म जल्दी भोजन करके सो जाथे ।

चन्द्रकला देवी जल्दी से तियार होके रेल्वे स्टेसन पहुँच जाथे । कलेक्टर, पुलिस अधीक्षक, एस. डी. एम., तहसीलदार, थानेदार, नायब तहसीलदार फूल-माला, चाय-नास्ता के बेवस्था करके प्लेट फार्म नं. दो म रहय । चन्द्रकला देवी स्टेसन मास्टर के कक्ष म बईठ के इंतजार करत रह । मदर टेरेसा के जगह-जगह सुवागत के कारण ट्रेन आधा घंटा लेट चलत रहय । थानेदार ह पाँच मिनट ट्रेन रोके बर कहीस । कलेक्टर, पुलिस अधीक्षक सब झन बईठ के इंतजार करत रहिन । ट्रेन आय के सूचना मिलथे, चन्द्रकला देवी सरग नसेनी से पटरी पार कर प्लेटफार्म नं. दो म जाते । हावड़ा मेल धड़धड़ावत स्टेसन म रूक जथे । ए. सी. कोच म मदर टेरेसा नीचे उतरथे । चन्द्रकला देवी पुस्पमाला से सुवागत करथे, पाँव छू के परनाम करथे । मदर ह माथा ल चूम लेथे, हाल-चाल पूछथे । कलेक्टर, पुलिस अधीक्षक अऊ नागरिक मन पुस्पाहार के सुवागत करथे । चाय-नास्ता गाड़ी म रख देथे । मदर ह सलाह देथे कि देवी जी, रायगढ़ म अनाथ आश्रम, सिसु निकेतन, कुष्ठ आश्रम खोलिये । चन्द्रकला देवी सासन की ओर से भूमि अऊ सहयोग के आस्वासन देथे । मदर आसीरबाद देथे । समाज सेवा, गरीब, दीन-दुखियों की सेवा करो । ट्रेन सीटी बजाथे, मदर हाथ हलावत रायगढ़ से बिदा लेथे । चन्द्रकला देवी मदर के इच्छानुसार समाज सेवा म लग जथे । रेल्वे स्टेसन से चन्द्रकला देवी प्रसन्नचित घर आ जे । कलेक्टर ल आवश्यक कार्यवाही के निर्देस भी दे देथे ।

चन्द्रकला देवी मदर टेरेसा से बहुत प्रभावित होथे अउ आजीवन दीन-दुखियों, गरीब, अनाथ, सिसु, महिला, गर्भवती माता, बूढ़ों, कोढ़ी, कलाकार, संगीतकार साहित्यकार के सेवा करे लगथे । रायगढ़ म कुष्ठ आश्रम, शिशु निकेतन, मिसन अस्पताल, नेत्र चिकित्सालय निरमान करवाय बर कलेक्टर अउ समाज सेवी मन के बैठक आयोजित करके सासन के हर संभव मदद के आस्वासन देथे । चन्द्रकला देवी बिलासपुर, रायपुर, राजनांदगाँव, दुर्ग, मुगेली, जबलपुर, भोपाल, ग्वालियर, इन्दौर, उज्जैन, सतना, रींवा, सहडोल, मंडला, छिंदवाड़ा म खोले के आदेश अउ बजट भी समाज सेवा विभाग से उपलब्ध करा देथे । चन्द्रकला देवी म मदर टेरेसा के गुण आय लगथे । मदर मानवता के प्रतिमूर्ति हे, साक्षात देवी माँ बन के समाज सेवा करत हे । जे शिशु के माँ नई हे छोड़ दे हे , ओकर माँ बन के हजारों-लाखों सिसु के माँ बन के पालत-पोसित रहीस । मदर टेरेसा होली मदर, सबके माँ, बहन, देवी रहीस ।

चन्द्रकला देवी संकल्प ले लेथे कि भविष्य म दीन, हीन के सेवा करहूँ । भोपाल बँगला म हमेसा भीड़ लगे रहय । चन्दा देवी ह हरदम साथ म रहय । चन्दा देवी के लईका मन भोपाल म पढ़त-पढ़त होशियार होगे रहय । छत्तीसगढ़ ल भुला गे रहय । कक्षा आठवीं अऊ दसवीं परीक्षा पास कर डारे रहय । चन्द्रकला देवी ल बड़ी माँ कहिके पुकारय,, चन्द्रकला देवी के सीना ह चौड़ा हो जावय । भोपाल म लगभग पाँच बछर बीतत रहय । चन्दा देवी अउ चन्द्रकला देवी चुनाव के तियारी करत रहय ।

भोपाल के आबो-हवा से चन्दा ह अउ लाल हो गे रहय । वईसे भी पहिली से गोरी-नारी सुन्दर रहीस, पर भोपाल म रहसी खाप-पान से भोपाली बन गे रहीस । लूगरा के जगा म सलवार सूट पहिनस रहीस । पाँच साल के एकदम बदलाव आगे रहय । समारू ह किसान से साहब जईसे सूट-बूट म रहय । एकदम जीवन म परिवर्तन आगे रहय । फर्राटा से स्कूटर, स्कूटी, सायकल चलावत रहय । बढ़िया सुखी जीवन जीयत रहय । मौज-मस्ती से कईसे पाँच बरिस कट गे पता नई चलिस । डॉ. प्रेमलता ह तीन लईका के माँ बन गे रहय । चन्द्रप्रकास हे भोपाल घुमाय बर ले जाथे । चन्द्रकला देवी मंत्री तो दौरा म रायगढ़ चल दे रहय । चन्दा देवी के घर म रूके रहय । तीनों बच्चा मन मस्त खेल-कूद, धूम-धड़ाका मचाय रहय । भूरी अउ कुसुवा भी लईका मन संग खेलय-कूदय । घर किलकारी स गुंज गे । चन्द्रप्रकास फोन से रायगढ़, चन्द्रकला देवी अउ पुस्पा माँ से पात करीस । सब ठीक हे कहिके बताइस । चन्द्रकला देवी कईथे, चन्द्रप्रकास कईसे भोपाल म हस । चन्द्रप्रकास कईथे, दीदी बहुत दिन से प्रेमलता ह बोलत रहीस चल ना भोपाल दिखा दे । प्रमोसन डिप्टी कलेक्टर म कब होही पता लगा लेबे । चन्दा दीदी के घर ठहरे हन । बढ़िया मान सम्मान मिलत हे, सगा बहिनी से जादा मानत हे । चन्द्रकला कईथे, भाई मय तो अभी नई आय सकंव फेर बाद म भोपाल म आहूँ त देखहूँ । प्रेमलता भी फोन से बात करके परणाम परथे । चन्दा देवी भी बात करथे, सब कुछ बने-बने हाल-चाल बताथे ।

चन्दा देवी ह डॉ. प्रेमलता ल भोपाल के बड़े तालाब, जामा मस्जिद, कमला गार्डन, बैरागढ़, अरेरा कॉलोनी, भोजपुर के मंदिर, सिवलिंग, भीम बैठका, केरवा डेम अउ अन्य जगा उदयपुर की गुफाएँ, सैल चित्र, बौद्ध विहार सब ला घुमाथे । मौज-मस्ती से एक हप्ता कट जथे । न्यू मार्केट के सिनेमा हॉल म मुगले-ए-आजम अउ नीलकमल पिक्चर देखथे । प्रेमलता ल भोपाल सहर भा जथे । चन्द्रप्रकास के छुट्टी खतम होत रहीस । चन्दा देवी बढ़िया खाना बना के खिलावय । प्रेमलता भी खाना बनाय लगय, दूनों बहिनी मिल के लेवय । चन्द्रप्रकास अपन पदोन्नति के पता लगाय, वल्लभ भवन सचिवालय गईस साथ म चन्दा देवी विधायकी भी गईस । सामान्य प्रसासन विभाग म पता लगाईस अवर सचिव से पता चलथे कि विभागिय पदोन्नति समिति अगले महीने होने वाला हे । चन्दा देवी कथे कि जरा देख लीजियेगा । सचिवालय घूम के घर आ जाथे ।

चन्दा देवी घर म जाके बताथे, अगले माह डी. सी. पी. होवईया हे जल्दी प्रमोसन हो जाही । प्रेमलता कथे, दीदी जब हो जाय तब मानबो । कई महीना से सुनत हंव, आदेस निकलईया हे । चन्दा देवी कथे, बहिनी सरकारी काम में समय लगथे । चन्दा मजाक म कथे । तोर एक ठन लईका अउ हो जाहय । प्रेमलता लजा जाथे । चन्दा कथे, काबर सरमावत हस ओ । प्रेमलता कथे, दीदी का बतावंव । चन्द्रप्रकास के उमर जादा होगे, मय जवान हंव । प्रेमलता कथे, तभी दीदी ललियाय हस । मस्त गोरियाय हस दीदी । तभे तो तोर जीदी ह मोहाय हे । चन्दा कथे, तैं तो डॉक्टर हस बने दवाई, केप्सूल नई खवाते । प्रेमलता कथे, केप्सूल खवाथंव, तभे तो चलत हे । नई तो डोकरा हो गे हे । कत्तेक जोर मारही । डाक्टर हंव तो चलत हे । चंदा कथे, मन में संतोस होना चाही । काम वासना से घर टूट जाथे । विस्वास टूट जाथे, विस्वास ल बनाय रखना हे ।

चन्द्रप्रकास अउ समारू बच्चा मन ला न्यू मार्केट से घुमा के आ जाथे । बच्चे मन धूम-धड़ाका करे लगथे । प्रेमलता ह चहक के के भांटो, समारू के पास बईठ जाथे । प्रेमलता कथे, कालि घर जाबो कहत रहेन । समारू कथे, दू-चार दिन अउ रहि जावव । बने लगात हे घर ह । बच्चा मन हिल-मिल गे हे । चन्द्रप्रकास कथे, मोर छुट्टी खतम होगे हे । चन्दा कथे, ठीक हे कल रिजर्वेसन करा लेवव । चन्दा देवी विधानसभा से छत्तीसगढ़ में रिजर्वेसन करा के ले आथे । चन्दा देवी ह जुमेराती बाजार म कपड़ा, सामान खरीद के ले आथे । प्रेमलता भी सात म जाय रथे । तीन घंटा धूम के मार्केटिंग करथे, सबे समान खरीदते । दो सूटकेशसभर गे रहय । शाम के सात बजे छत्तीसगढ़ एक्सप्रेस से चन्द्रप्रकास अउ प्रेमलता भोपाल से दुर्ग आ जथे ।

क्रमशः

by-www.srijangatha.com

भाग-बारह

2006-06-27T12:57:00.000-07:00

चन्द्रकला देवी ह दूसर दिन कलेक्टर कार्यालय म अधिकारी मन के मिटिंग रखे रहय । कलेक्टर माननीया मंत्री जी के पुस्पा गुच्छ सें सुवागत करथे । मंत्री जी ल आस्वासन देथे सरकार के नीति के अनुसार कार्य करबो । मंत्री जी ह चेतावनी देथे, अधिकारी मन निडर होके, ईमानदारी से काम करय । अऊ भ्रष्टाचार के शिकायत मिलही त सक्त से सक्त अनुशासानात्मक कार्यवाही करे जाही । चन्द्रकला देवी कलेक्टर कार्यालय से सीधा समलेस्वरी समूह के मंदिर आसरम म जाथे । औघड़ बाबा अवधूत राम के दरसन करथे । आसरम के सेवादार से मिलके समस्या पूछथे । बिजली के कमी बताथे । दूसर दिन बिजली लग जाथे ।

पुस्पा कथे बेटी उत्कल एक्सप्रेस तीन बजे अवईया हे । चन्द्रकला कथे । चन्द्रसेन जा तंय कार म बईठ के रेलवे स्टेसन । चन्द्रप्रकास अऊ पूरनिमा ल लेके आबे । उत्कल एक्सप्रेस आधा घंटा देरी से आईच । चन्द्रसेन प्लेटफार्म एक म टहलत रहय । किताब अऊ इंडिया टुडे, माया देखत रहय । बुक सेंटर म नारायण केसरी से बात करत रहय । केसरी कथे काला लेय य हच । चन्द्रसेन बताथे भईया, पूरनिमा ह जबलपुर ले अऊ चन्द्रप्रकास ह दुर्ग से आवत हे । केसरी कथे ।चन्द्रप्रकास के परमोसन होगे हे के नई । चन्द्रसेन कथे भईया साल भर से जादा होगे तहसीलदार बन गे हे । अभी पाटन दुर्ग म तहसीलदार हे । ओकर ससुर ह संयुक्त कलेक्टर दुर्ग म हे । नारायण कथे तुंहर बढ़िया भाग जागे हे । दीदी अभी मंत्रई है । चन्द्रसेन कथे । भईया मय तो कछु नई बने हंव । मय तो गोसाला के दूध अभी भी बेंचव हंव । केसरी कथे । तय दूधम पानी मिला के जादा कमा लेथच । चन्द्रसेन कथे नई भईया मय दूध म पानी नई मिलावंव वईसे भी गाय मन दूध जादा देत हे ।

उत्कल एक्सप्रेस एक नंबर प्लेटफार्म म रूकते । गेट के पास डिब्बा म बईठे रहय । लइका अउ चन्द्रसेन ल सूटकेस, झोला पकड़के उतारथे । चन्द्रप्रकास अऊ प्रेमलता घलो लईका धर के उतरीच । पूरनिमा अऊ प्रेमलता अपना लईका ल गोदी म पाय रहय । चन्द्रसेन, सबो के पाँव छूईच । सूटकेस उठा के कार म रखते । कार म बईठ के घर आ जाथे । चन्द्रकला देवी अऊ रमौतीन, पुस्पा देवी ओमन के अगोरा करत रहय । चन्द्रकला ह प्रेमलता के बेटी ल गोदी म पाके चुमे लगथे । चन्द्रकला कथे ग – दाई रोमा माँ जईसे अंग्रेज दिखत हे । पुस्पा कथे । बेटी रोमा देवी ह चन्द्रप्रकास के बेटी बन के आय हे । पूरनिमा के तीनों टूरी मन बारी बारी से चुमा लेथे । तीनों लक्ष्मी मन सुन्दर रहय । बड़ी माँ के गोदी म बईठे बर रोवत रहय । चन्द्रकला एक साथ तीनों ल गोदी म बईठाईच । कथे पूरनिमा तोर टूरी मन तोरो ले सुन्दर होही बहिनी । पूरनिमा कथे टूरी मन बड़ी माँ जईसे बनबो । पढ़बो लिखबो नेता बनबो । चन्द्रकला कथे, ह रे टूरी हो नेता बनिहा । हा माँ सिर हिला देथे । चन्द्रकला तीनों के सिर म हात रख देथे । बेटी हो खूब पढ़व । दाईददा के नाम ऊँचा करव । पूरनिमा कथे दीदी बहुत सैतानी करथे । धमा चौकड़ी मचाय रथे । सुनील कथे दीदी एको झन ल तुमन रख लेवा । पूरनिमा कथे मय अपन लईका नई छोड़ सकंव । भले सैतानी करत हे । चन्द्रकला कथे तहूँ त बचपन, नानपन म बहुत सैतानी करत रहे । चन्द्रसेन ल चाब देत रहे । हर समय झगड़त रहेव । पूरनिमा झेप जाथे । सुनील कथे दीदी आज भी ओ आदत ल नई छोड़े दे । रोजिना लड़त रथे । नानी मन ल मारथे पीटथे मय लईका

चन्द्रकला ह पूरनिमा ल अपन कमरा म ठहराथे । चन्द्रप्रकास अऊ डॉ. प्रेमलता ह अपन कमरा म रूकथे । प्रेमलता के टूरी ह बहुत रोवत रहय । दूध पिलावय तभो ले चूप नई होवय । चन्द्रकला, पुस्पा देवी, रमौतीन सब झन थक जाथे । चन्द्रप्रकास परेसान हो जाथे । शायद वातावरण बदले ले रोवत रहिस । पूरनिमा कथे दे दाई मोला चुप कराके देखत हंव । पूरनिमा ह गोदी म पाके पीढ़ा म बईठ के दूध पिलाईच । दूध पियत, पियत पेट भर गे । फेर मुँह देख के हांसे लगथे । प्रेमलता कथे । दीदी मय दूध पिलावत रहेंव त न पिईच । तोर दूध जादा मीठा हे । पूरनिमा कथे । चन्द्रप्रकास अऊ मय दाई रमौतीन के खूब दूध पीये हन । चन्द्रकला दीदी गाय के दूध पीयय । पूरनिमा कथे । प्रेमलता हमन दूध पीके बड़े होये हन । मजा आवय खेले कूदे म । मय हमेसा अव्वल आवंव । गोटा, बांटी, सातुल, लुकाछिपी म । पूरनिमा के दूध पियत, पियत बच्ची ह गोदी म सो जाथे । प्रेमलता ह पलंग म लेके सुला देथे ।

रमौतीन अऊ पुस्पा देवी ह रंघनी धर म भात, दार, साग, चटनी रांधत रहय । प्रेमलता पूरनिमा खाना खाय बनाय लगथे । सब जूर मिलके खाना बना के खाथे । लईका मन के उछल, उछल कूद म, किलकारी म घर गुंजत रहय । चन्द्रकला ल सगुन महसूस होईच । ओकर सुन्ना कोख म गुदगुदी होय लगिच । सोंचे लगिच आज मोटो कोख ले बच्चा होय रतिच त बड़े, बड़े होगे रहतिच । आँखी ले आँसू आ जाथे । करम के लकीर तो पहिली ले खिंची गय रहिच । भाग ल दोष देना ठीक नो हय । मय अपन हाथ म बिगाड़ेहंव । चन्द्रकला पेट ल छू छूके रो डारिच । पूरनिमा कथे काबर रोवत हच दीदी । चन्द्रकला कथे बहिनी तुहर कोख हरा भरा हे । मोर कोख सुख्खा है । पूरनिमा कथे दीदी तय मंत्री बने हच । तोर का कमी हे । मोर दूनों नोनी ल गोदी ले ले । मय देर बर तियार हंव । तोर संगा भोपाल म पढ़ही लिखही । पूरनिमा कथे मय तो मशीन जईसे बच्चा पैदा कर सकत हंव . मोर कोरा बड़ उपजाऊ हे । जईसे लईका दूध छोड़थे । मोर पेट ह निकल जाथे अभी तीन माह होगे हे । चन्द्रकला कथे बहिनी तय किसमत वाली हच । जतका लईका चाहत हच मिल जाथे । पूरनिमा कथे दीदी सुनील भी अच्छा आदमी हे । एक दिन मोला नई देखही त परेसान हो जाथे । फेर मोला रोजिना पियार चाही । तोर नाही शक्ति प्रबल हे । तोर स्त्रीत्व भारी हे । तय किस्मत से लड़का भी पटा लेय हच ।

चन्द्रकला कथे चल बाबू जी ल देख लेथन । बलराम ह खटिया म सोय रहय पूरनिमा कथे । बड़े ददा, बड़े ददा सोगे ग । बलराम कथे नहीं बेटी । आँकी मूंदे हंव । खाँसी ह नई छोड़त ऐ । सब लईका मन आ जाथे चन्द्रप्रकास अऊ प्रेमलता बेटी ल गोदी म उठा के लाय रथे । चन्द्रकला कथे, ददा चन्द्रप्रकास के बेटी के चेहरा रोमा दाई से मिलत हे । एक दम अंग्रेजन दिखत हे । बलराम कथे मोला दे । गोदी म पाके दुलार करथे । बलराम कथे बेटी सही मोर रोमा ह चन्द्रप्रकास के बेटी बन के आ गे हे । प्रेमलता ल बोलथे बने जतन पियार कर रखबे मोर रोमा ल । प्रेमलता कथे हाँ बाबू जी । बलराम सब लईका मन ल बारी बारी से पाथे । पुस्पा देवी, अऊ रामौतीन भी आ जाथे । बलराम कथे पुस्पा अब मय जादा दिन के मेहमान नई अवं । अब सब लोग लईका ल देख लेव । चन्द्रप्रकास ल कथे बेटा तोर बहिनी मन अमेरिका म हे तय पता लिख ले । तीनों बेटी के पता लिखाथे । इंदौर के जमीन बेच के रायगढ़ ले आय रहय । चन्द्रप्रकास ल बताथे ।

पुस्पा देवी कथे । काबर हदरत हव । सुखे सुख म लईका मन हावय । पाँव दबावत पुस्पा कईथे, बलराम ह कथे पुस्पा देवी अब जादा दिन के संगी नोहव । मोर बेटी मन विदेश म हावय कल चिट्ठी ल डाक म डलवा देबे । रायगढ़ के पत्र लिख दे हवं । नोनी मन आही त माँ के पियार दुलार देथे । रोमा ह बहुत चाहत रहीस । मोर मरे के संदेश तार द्वारा भेज देबे । पता साफ साफ लिखबे । पुस्पा देवी सिर म हाथ फेरत कथे । जलदी ठीक हो जाबे । बलराम पुस्पा ल कथे । मरे के बेरा मय पुंछत हंव । मोर संका के निवारण कर दे । नहीं तो मोर जीव भटकत रईही । पुस्पा देवी कथे, कह न महराज जो होही तेला बताहूँ । देवी जी चन्द्रप्रकास आत्मज बलराम रामदेव नाम कईसे रखे हच । पुस्पा देवी अचकचा जाथे । अईसे प्रश्न के उत्तर कईसे देवय । पुस्पा देवी सम्भल के कथे । महराज चन्द्रप्रकास आप ही के बेटा ऐ । जब चन्द्रप्रकास के जनम होईच । त आप नई आयेव । अऊ मोर दूध नई आवत रहीच त रमौतीन ह अपन दूध पिलाके के बड़े करे हे । मय दिन भर काम म चले जांव । त रामदेव अऊ रमौतीन मन अपन बेटा कस पाले पोसे हे । फेर तुंहर आय के आस नई रहीस । तय मय ह स्कूल के दाखीला रजिस्टर म चन्द्रप्रकास बल्द बलराम रामदेव लिके हांवव । बलराम कथे ठीक हे देवी जी मय समझ गेंव । मोर संका के समाधान होगे । अब मय निसफिकर होके मर जाहंव । हे राम पुस्पा देवी ह गंगा जल अऊ तुलसी दल मंह मे डारधे । बलराम ह ईसारा करके कथे । सब झन बोजन कर लव । मोला दूध भात लाके रखाव । बलराम महराज ह भर पेट भोजन करथे । जेवन जे के, सब अपन अपन कमरा म सो जाथे ।

पुस्पा देवी भोजन कराके सो जाथे । बलराम रात म सोईच, त सोते रहिगे । बिहनहा पुस्पा देखते ल लास पड़े रहय । पुस्पा हिला डुला के देखिच । लास ठण्डा पड़ चुके रहय । पुस्पा दण्ड पुकार के रोईच । मोर मालिक मोला काबर छोड़ के चले गिच । मय मर जातेंव । बोम मारके रोईच । रोवई सुन के सब जाग जाथे घर भर म कल्लई मात जाथे । रोवई धोवई सुन के मोहल्ला वाले मन का होगे कहिके आ जाथे । रामदेव कथे, महराज ह गुजर गे । चन्द्रकला देवी के पिता जी मर गे कहिके सोर बस्ती म, रायगढ़ सहर म फईलगे । पुस्पा देवी, चन्द्रकला, चन्द्रप्रकास पूरनिमा, रमौतीन, के रोवाई म आँखी सूज गे रहय । चन्द्रसेन अऊ चन्द्रप्रकास ह अपन सगा संबंधी मन ल फोन म सूचना देथे । चन्द्रप्रकास अपन ससुर साहेब ल दुर्ग फोन करके सूचना देथे । चन्दा देवी विधायक सांरगढ़ ल कलेक्टर साहब ह सूचना देथे । चन्दा देवी तुरंत दो घंटा म रायगढ़ पहुँच जाथे । कलेक्टर, पुलिस अधीक्षक थानेदार, एस. डी. एम., तहसीलदार, उप संचालक समाज सेवा एवं विभागीय कर्मचारी, नगरपालिका के कर्मचारी गण, नेता, अधिकारी, सेठ साहूकार हजारों के संख्या म इकट्ठा हो जाथे । बलराम के इच्छानुसार राम भाठा के स्मसान घाट म लास ल दफनाय जाथे । महघट से तलाब म स्नान करेक सब अपन अपन घर जाय लगथे । चन्द्रप्रकास अऊ चन्द्रकला देवी ल सब ढांढस बंधाथे । धीरज देथे । सब एक एक करके अपन अपन घर चले जाथे ।

चन्दा देवी ह चन्द्रकला देवी ल समझाथे । पुस्पा देवी, चन्द्रप्रकास ल घलो समझाथे । तलाब से स्नान करके घरग आ जाथे । रमौतीन सब झन बर भोजन पका के खवाथे । घर के हँसते खेलते वातावरण ह गमगीन होगे रहय । सब के मुँह ओंदरे रहय । सोक व्यक्त करईया मन के तांता लगे रहय । मुख्यमंत्री, राज्यपाल महोदय के फोन कलेक्टर के पास आथे । सोक संवेदना व्यक्त सासन की ओर से कर दीजिए । कलेक्टर चन्द्रकला देवी ल कईथे, मेडम, मुख्मंत्री अऊ राज्यपाल महोदय द्वारा कहरा दुःख अशोक व्यक्त करे गे हावय । चन्द्रकला देवी धन्यवाद देथे । रात अऊ दिन घर भरे रहय । सोक संतप्त परिवार ल सबे झन ढांढस बंधावय । रात म भोजन करके सो जाथे ।

तीसर दिन तीज नहावन होथे । कोई भी ब्राम्हन मन सामिल नई होईन । साम के बेरा म बैकुण्ठकपुर के ब्राम्हन अऊ सियान मन के बईठक चन्द्रकला देवी ल बुलाईच । बने पन्दरा बीस झन बईठक म आ गे रहय । चन्द्रप्रकास कथे, मय हाथ जोड़ के बिनती करत हंव । मोर ददा के देश करम अऊ तेरही म ब्राम्हन भोजन स्वीकार कर लेवव । पंडित बिहारी लाल कईथे, देख चन्द्रप्रकास तय जरूर बामन हच । पर तोर बाप ह कुजात ईसाई पादरी बन गे रहिच । इसाई पादरी के वामन भोजन हमन नई करन । चन्द्रकला देवी, पुस्पा देवी, चन्द्रप्रकास बहुत बिनती करथे । फेर बामन मन टस से मस नई होईन । अऊ एकेक करके चल दीन । चन्द्रकला देवी देखते रहीगे । चन्दा देवी कथे । दीदी ब्राम्हन मन तो पंगत म नई बईठय । त का करिहव । मोर विचार म ब्राम्हन के जगा म, कोढ़ी अऊ गरीब मन ल भोजन करा दव । पुस्पा कईथे बेटी ठीक कहत हच । फेर घर ल तो सुद्ध करे ल पड़ही । प्रेमलता ह कथे । दाई यदि बामन नई खात ते रहन दे । बलराम के वसीयत, इच्छानुसार, सतनाम धर्म के अनुसार क्रियाकर्म कर जावय । चन्द्रकला देवी अऊ पुस्पा देवी ब्राम्हन मन से विस्वास उठ जाथे । मरे के बाद भी नियम धरम, पोंगा पंडित अंध विस्वास के बात । पुस्पा देवी कथे बने करे रहीस महराज ह ।

चन्द्रकला देवी मंत्री समाज कल्याण व महिला विकास ह सोक पत्र पाँच हजार छपवाके बंटवा देथे । म. प्र. शासन के सत्री मंत्री, राज्यपाल महोदय सभी अधिकारी ल शोक पत्र भिजवा देथे । सभी छत्तीसगढ़ के विधायक, समाज सेवी, नेतागण अऊ महिला बैंक अऊ महिला मण्डल के सदस्य मन ला बांट देथे । चन्द्रकला देवी ह रेस्ट हाउस अऊ सर्किट हाउस, होटल म कमरा बुक करा दे रहय । कलेक्टर, एस. डी. एम. ह व्ही. आई. पी. मन बर वाहन उपलब्ध करा दे रहय । रूके के बेवस्था म तहसीलदार, नायब तहसीलदार लगा दे रहय । दस करम के भोजन के बेवस्था मालूराम अग्रवाल, सुनील सांडिल्य चन्द्रसेन करत रहय । चार पाँच रसोईया, वेटर लगा दे रहय । लगभग दस हजार आदमी के भोजन वेवस्था करे रहय । दिन भर आदमी मन के तांता लगे रहय ।

पुस्पा के आँकी ले आँसू गंगा जईसे बोहात रहय । आँसू रूके के नाव नई लेत रहय । सादा के लूगरा म मुड़ ढाँक के ले जात रहय । पुस्पा देवी जनम जनम के पति के मृत्यु के बाद बिधवा हो जाथे । माँग के सिंदूर, चूरी, रंगीन लूगरा छीन जाथे । एकदम दुःखी जान पड़थे । वईसे बुढ़ापा म पति के संग सहिस । भरे जवानी अकेला काट दीच ।

हफ्ता भर बाद चन्द्रप्रकास के छुट्टी खतम हो जाथे । पुस्पा दाई ल कथे । माँ चल हमर साथ पाटन, साथ म रहिबो । पुस्पा कथे बेटा, घर म दीया जलाहव । कम से कम महीना भर । तुमन अपन अपन काम म जावव । चन्द्रकला देवी कथे जा भाई अपन ड्यूटी म । मय कुछ दिन रहिहों । विधानसभा सत्र होवईया हे भोपाल चल देहूँ । चन्द्रप्रकास किराया के जीप लेके पाटन, अपन परिवार सहित चल देथे । चन्द्रकला देवी घर से पन्दरा दिन बाद निकलिस । मालूराम ह सब बेवस्था करे रइस । एक दामाद बाबू के काम करे रहय । रमौतीन अउ पुस्पा देवी ह धन्यवाद देथे । चन्द्रसेन ह सब घर द्वार देखे लगथे । खेती-खार के जिम्मेवारी चन्द्रसेन, कामदेव अउ रामदेव उपर आ गे । बने असामी बन गे रहय । काबर बलराम के मकान अउ फार्म हाउस के देखईया कोनो नई रहय । चन्द्रकला देवी ह अपन विधान सभा क्षेत्र सरिया म महिला मंडल के सदस्य मन ला मिल के आ जाथे ।

मंत्री चन्द्रकला देवी जी ह विधायक चन्दा देवी के घर सारंगढ़ जाथे । चन्दा देवी ह भोपाल जाय के तियारी करत रहय । समारू ह उहाफोह म झूलत रहय, कि मय कहत रहि हूँ मोर खेती किसानी कोन करही ? चन्दा देवी कथे सब खेती खार ल तोर भाई ल सौंप दे । महीना-महीना म आबे देख लेबे । विधानसभा क्षेत्र म आय लगही । घर ल थोड़े छोड़े देबो । पाँच साल तो भोपाल म रहन जरूरी । काबर, भूरी अउ कुसुवा ल पढ़ाबो । भूरी ह पांचवी कक्षा अऊ कुसुवा ह चौथी किलास म पढ़त रहय । समारू ह बने सोच विचार के कोसिर के भूमि खेत ल अपन छोटे भाई दुकालू ल सौंप दीस । रानी सागर के खेत-खार, घर-द्वार ल समारीन बाई अऊ दाई ल देखे बर कहीच । समारू अउ चन्दादेवी कथे, हमन हर महीना आबो, खेती-किसानी बर पैसा घलो देबो ।

पुस्पा देवी रस्ता देखत रहय । चन्द्रकला देवी ल कथे बेटी रात कईसे होगे ? माँ चन्दा बहिनी के हाथ के दार भात, खब्जी, घी बढ़िया सुहाथे, मंय खाना खाके आय हंव । कान भोपाल जाना हे, तियारी करे बर आय हंव । मंत्री जी स्टाफ मन ला रेस्ट हाउस भेज देथे । काल जल्दी तियार होय बर कहि देथे । चन्द्रकला देवी जरूरी समान ल सूटकेस म रख लेथे अउ जल्दी सुत जाथे ।

चन्द्रकला देवी बिहनिया ले जल्दी नहा धो के तियार हो जाथे । बिहनिया 7 बजे अहमदाबाद एक्सप्रेस पकड़े बर रेल्वे स्टेसन चल देथे । रेल्वे स्टेसन म चन्दा देवी पहिली ल बईठे रहय । रेल्वे स्टेसन छोड़े बर पुस्पा देवी, रामदेव, चन्द्रसेन, कलेक्टर, पुलिस अधिक्षक, एस. डी. एम., तहसीलदार, थानेदार, जिला समाज सेवा अधिकारी, अउ कर्मचारी, नगरपालिक के कर्मचारी लगभग सौ आदमी सी. आफ करे बर आय रहय । चन्दा देवी अपन कुसुवा बेटा अउ भूरी बेटी ल ले जात रहय, चन्द्रकला देवी के पाँव परथे । चन्द्रकला ह चुम्मा लेके पियार जताथे । कुछ देर बाद मा अहमदाबाद एक्सप्रेस आ जथे । प्रथम श्रेणी के कोच म सूटकेस, समान थानेदार मन रखवाथे । चन्दा देवी, समारू के सूटकेस घलो चढ़ाथे । चन्द्रकला देवी हाथ हला के सब झन के अभिवान स्वीकार करथे । अहमदाबाद एक्सप्रेस देखत-देखत ओझल हो जथे । अहमदाबाद एक्सप्रेस ठीक दस बजे बिलासपुर स्टेशन म रूक जथे, सब समान ल स्टाफ अउ कुली मन ह उतारथे ।

चन्द्रकला देवी अउ चन्दा देवी व्ही. आई. पी. वेटिंग रूम म रूक जथे । ठीक 1 बजे छत्तीसगढ़ एक्सप्रेस से बिलासपुर से भोपाल के लिये प्रस्थान करथे । छत्तीसगढ़ एक्सप्रेस धड़धड़ावत रायपुर, दुग, राजनांदगाँव, डोंगरगढ़, गोंदिया, नागपुर, आमला, इटारसी होवत भोपाल बिहनिया 6 बजे पहुँच जथे । चन्दा देवी अउ चन्द्रकला देवी कार मा बईठ के चौहत्तर बँगला के बंगला नं. 28 म पहुँचथे । चन्द्रकला देवी ल पहिली ले आबंटन होगे रहय । चन्दा देवी कथे दीदी मय अपन विधायक विश्राम गृह के कमरा नं. 20 मे जाथंव । चन्द्रकला देवी चाय पी के विधायक बिसराम गृह, फेमिली ब्लाक म चल देथे । चन्दा देवी जल्दी नहा धो के तियार होके विधानसभा पहुँच जथे । चन्द्रकला देवी घलो विधानसभा पहुँच जथे । विधानसभा के पहिली दिन दिवंगत सदस्य मन ला श्रद्धांजलि दे के विधानसभा स्थगित हो जथे ।

चन्दा देवी, सब महिला विधायक, मंत्री से परिचय करथे । चन्द्रकला देवी ह सबो मंत्री ले परिचय कराथे । माननीय मुख्यमंत्री जी से परिचय कराथे । चन्दा देवी सबसे कम उमर के महिला विधायक रहीस । विधानसभा म कोसा के लूगरा पोलखर पहिन के गिस त देखनी होगे । बढ़िया सुंदर गोरी नारी । चन्द्रकला देवी घलो बढ़ापा म सुन्दर दिखत रहय । सब के नजर दूनों झन म जात रहय । दूनों झन अपन मस्ती म झूमत रहय । सबके अभिवादन स्वीकार करत रहय । केन्टीन म बढ़िया चाय-नास्ता करके स्थान आ जाथे । समारू अउ चन्दा देवी ह आटो म बईठ के सरस्वती शिसु मंदिर म लईका मन ला भरती करा देथे । लईका मन बन आय-जाय के रिक्शा बंधाय रहय । भूरी उर्फ कौसल्या, कुसुवा उर्फ कमलेश्वर प्रसाद वारे, सरस्वती सिसु मंदिर म पढ़े लग गे । चन्दा देवी अउ समारू पढ़ावत रहय । दूनो झन पढ़े लिखे म होसियार रहय । प्रथम श्रेणी म परीक्षा पास हो जथे । चन्दा देवी ह सारंगढ़ दो महीन म जाय ले मिलय । सारंगढ़ के काम ल समारू ह देखय । हर महीना जाके सब झन ले मिलके समस्या ल सुलझावय चन्द्रकला देवी विधानसभा सत्र के बाद अपन क्षेत्र के एक बार दौरा जरूर करय । सब महिला मन से जीवंत सम्पर्क बनाय रहय । कभू-कभू चन्दा देवी ल घलो ले जावय । सरिया अउ सांरगढ़ के महिला बैंक अउ महिला मंडल ह माडल के रूप म मध्यप्रदेश भर म लागू हो जाये । चन्द्रकला देवी के माडल के लागू हो जाय ले महिला सशक्तिकरण म प्रगति होय लगय । महिला बैंक से छोटे-छोटे धंधा बर लोन मिल जावय । मध्यप्रदेस म लगभग सब्बो जिला म महिला बैंक खुल गे रहय । महिला जागृति के काम घलो बैंक करय । चन्द्रकला देवी अउ चन्दा देवी के बैंक महिला मंडल के चर्चा दिल्ली, भारत सरकार म होय लगिस । भारत सरकार ह अच्छा काम के कारण उत्कृष्ट पुरस्कार चन्द्रकला देवी ल देईस । भारत सरकार ह महिला विकास बर पचास करोड़ के आर्थिक सहायता घलो देईस । मुख्यमंत्री जी चन्द्रकला देवी अउ चन्दा देवी ल बधाई घलो देईस अउ कहिथे, आप लोग बहुत अच्छा काम किये हो मैं बहुत खुस हूँ । चन्द्रकला देवी अउ चन्दा देवी उत्कृष्ट पुरस्कार मिले ले बहुत खुस होथे । मध्यप्रदेश म सब्बो जिला म दौरा करके मॉडल प्रचार-प्रसार करके महिला मन ल स्वावलंबी, स्वरोजगार, उद्योग-धंधा म लगाय बर प्रेरणा, प्रोत्साहन देथे । महिला ससक्तिकरण के काम म तेजी जथे । चन्द्रकला देवी महिला मन ल आगे बढ़ाय के योजना लगू करवाथे ।

क्रमशः

by-http://www.srijangatha.com

भाग- ग्यारह

2006-06-27T12:55:00.000-07:00

चन्द्रकला कथे आज शाम के गाड़ी हे । चंदा ल राष्ट्रपित भवन अऊ मुगल गार्डन दिखा देहन । मधु अउ जमुना चन्दा, मालूराम आटो म बईठ के राष्ट्रपति भवन जाथे । राष्ट्रपति भवन दरसक मन बर बंद रहय । मुगल गार्डन ल घूम घूम के तीन घंटे ले देखिन । मस्त रंग बिरंगी गुलाब खिले रहय़ । विस्व के सभी प्रजाति के फूल फूले रहय । रंगीन फब्बारा, बड़े-बड़े घास के लान, घूमत घूमत लान के बेंच म बईठ जाथे । चन्दा कथे दीदी स्वर्ग के समान हे । कतका बढ़िया गार्डन हे । मधु कथे, मजा आगे चन्द्रकला दीदी । ऐला हम जिनगी म कहाँ देख पातेन । मालूराम कथे । मधु जी, विधायक बनही त फेर तोला नई लाहय । चन्द्रकला अब ले अपन विधायक समझ । कांग्रेस के टिकिट मिल गे समझ । मिनी माता जी के किरपा से टिकट मिल जाही । मालूराम कथे । मिनी माता सचमुच छत्तीसगढ़ के महतारी ऐ । अतेक झन मादा जी के घर पलत हे अऊ नेता बने के तियारी करत हे । चन्दा कथे । सेठ जी मोला टिकट नई दिवाय ग । मालूराम कथे । चंदा बहिनी तोला तो मिनी माता ह आसीरबाद दे देये हे । सारंगढ़ से टिकिट मिल जाहय । काबर फिकर करत हच ।

चन्द्रकला कथे, चलव दो बजत हे । दिल्ली म कब ट्राफिक जाम हो जायें । जलदी चलव फेर तियारी करबो । आटो म नार्थ एवेन्यू आ जाथे । मालूराम सूटकेस निकाल ले थे । सब अपन सूटकेस लेके आटो म बईठ जाथे । पास के रूप म सासंद केयूर भूषण जी के इहाँ चाबी दे देथे । सांसद केयूर भूषण कथे । कहाँ के हो जी, मालूराम कथे । रायगढ़ के आन ।एक हफ्ता होगे रहिस । आज घर जाथन । चन्द्रकला केयूर भूषण के पाँव छूथे । चन्दा घलो ह पैर छूथे । आटो म बईठ के रेलवे स्टेसन नई दिल्ली पहुँच जाथे । साम 6 बजे ट्रेन छूट जाथे । ट्रेन म आरक्छित सीट म सो जाथे । सीधा रायगढ़ म दूसर दिन साम चार बजे पहुँचथे । चन्द्रकला के निवास म जाके सब रूक जाथे । पुस्पा, रमौतीन, खाना बनाके खिलाते ।
पुस्पा देवी कथे । चन्द्रकला प्रेमलता ह चार महीना के गरभ म हे । चन्द्रकला ह बधाई देथे । चल दीदी बनगे । साल भरके भीतक माँ बन जाही । बहुत खुशी के बात हे । चन्दा घलो बधाई देते । दूसर दिन चन्दा, मधु, जमुना बस म सारंगढ़ पहुँच जाथे । सांरगढ़ पहुँच जाथे सारंगढ़ से सरिया जमुना चले जाथे । ओमन अपन अपन घर चले जाथे । चन्दा ह घर पहुँचिस त भूरी अऊ कुसुवा दाई आगे कहिके कुलके चिल्लाय लगिन । भूरी अऊ कुसुवा ल गोदी म उठा के प्यार करे लगथे । दिल्ली ले रेडीमेड कपड़ा अऊ बाबासूट लाय रहाय । भूरी ह फ्राक, दुप्ट्टा पहिन के परी बन जाथे । कोला म समारू काम करत रहय । बूरी दउड़त दउड़त जाके कथे दाई आगे । समारू कुआँ म हाथ पाँव धोये लगिच । चन्दा घलो हाथ पाँव धोये बर जाथे । चन्दा समारू के पाँव परथे । सुखी रह । जलदी विधायक नेता बन । दिल्ली रिटर्न सरपंच । चंदा गद ले हंस पड़थे । दूनों झन खूब जोरहा हांसथे । चन्दा ह हांसत हांसत लोट पोट हो जाथे ।

चन्दा कथे तोर मुँह दूध, भात, घी, सक्कर । मिनी माता जी श्रीमती इंदिरा गांधी जी भेंट कराईच हे । सारंगढ़ से आस्वासन देय हे । माताजी कहे हे जाके चुनाव के तियारी करव । गाँव गाँव के सूची बना ले । मुखिया मन ले मिलना शुरू कर दे । समारू कथे सतनाम साहेब के किरपा बने रहे । डऊकी विधायक बन जाहयतो मोला तो अति खुसी होही । चल हाथ पाँव झन धो । कुआँ म बने साबुन लगा के नहा ले । ऊहां थोरकन पानी म नहाय होबे । फेर धूल मर्रा जमगे होही । चन्दा ह बढ़िया लूगरा पहिरे रहय । बने उज्जर दिखत रहय । वईसे भी फक्क गोरी, कदकाठी, बने तंदरूस्त राहय । पीढ़ी म बईठ के भूरी अऊ कुसुवा ल भात खवाईच । समारू ह संग म बईठ के दूनो झन दार भात खाईन । चन्दा ह एकेक ठन ल बताईच । डॉ. प्रेमलात के गरभ रहे के बात बताइच । समारू कथे आजकल के लड़का लड़की मन जलदी देह मा हो जाथे । काबर जवान होगे रईथे । कईथे प्रेमलता के उमर पैंतीस साल होगे हे । चन्दा कथे, चल सतनाम साहेब ह जलदी चिन ले । अच्छा हे जलदी होगे । बाद म परेशानी होतिच । खाना खाके खटिया म जाके सोये लगथे । लईका मन सो जाथे । समारू दरवाजा बंद कर देथे । चन्दा कथे दिन दहाड़े डाका डालत हच । सारी रात पड़े हे । छोड़ कोई आ जाहय । गाँव के सरपंच आंव । समारू कथे । कोनो लपता चल ही तन । समारू कथे । बने महमहावत हच । चन्द्रकला दीदी ह विदेसी सेंट देईच हे ओही ह लगा देईच । अऊ कहिच चन्दा जाबे त भंवरा कस झूमे लगही । पति पत्नी सुख भोग के आराम करथे । एक हफ्ता के बाद मिले रहय । चन्दा मस्त तरो ताजा होगे । ओतके बेरा टहलू ह दरवाजा खटखटाते चन्दा कहिच देखे मय कहत रहेंव न कोई आ जाहय, जा दरवाजा खोल अऊ बईठार । मय हाथ मुँह धोके आवत हंव ।

समारू दरवाजा खोलिच । मालिक सरपंच मेडम ह दिल्ली ले आईच । हाँ आगे हे बईठ । परछी म कोटवार ह बईठ जाथे । समारू कईथे कईसे आय हच । कोटवार कथे । मतादाता सूची विधान सभा बर तियार करत हे । ये देख लेव । तुंहर कोनों के नाम तो नई छुटगे रहय । समारू ह रानी सागर गाँव के सूची पढ़थे । सूची म समारू, चंदा अऊ चन्द्रकला देवी, समारू के दाई, दुखिया बाई के नाव रहय । चन्दा ओतके बेर आ जाथे । कोटार जय जोहार राम, राम कथे । चन्दा ह जय सतनाम । का हाल चाल हे टहलू ? हललू कईथे, मेडम मतदाता सूची पुनरीक्छण संसोधन होथे । देखाय बर आय हंव । विधानसभा के चुनाव हो वाला हे । चन्दा सब झन नाव देखथे । हमर तो नाव हे । फेर देख ले कई टूरा, चेलिक मन नाव तो नई छूटगे । चन्दा कथे । टहलु एक कापी छोड़ दे । कोई आही त देखाहंव । मय विधायक के चुनाव लड़त कहत हंव । कोटवार कथे । ठीक हे मेडम आप तो जरूर जीतहंव । मय गाँव गाँव के चुनाव प्रचार करिहंव । चन्दा कथे । ठीक हे। जा गाँव म घर घर बता दे । ओतके बेर सचिव मनबोधी बेहार आ जाथे । नमस्ते मेडम । नमस्ते । दिल्ली के सफर ठीक रहिस । हां ठीक रहिस चन्दा कईथे, बेहार कथे । विधायक के लिये नवा दरखास दे देतेव । चन्दा कथे । श्रीमती इंदिरा गांधी से मिलके आय हन । आस्वासन तो देय हे । देखव काला टिकिट मिलत हे । मनबोधी कथे, मेडम निराश्रित पेंसन के चेक म दस्खत कर देवव । चन्दा कथे कतका झन के हे । ओ बीस झन के हे । चन्दा कथे बेहार जी ग्राम पंचायत के बईठक बुलवा लेवा ओही दीन कर देहूँ । अऊ सब तो ठीक हे । सब ठीक हे मेडम । बेहार चले जाथे ।

चन्दा अपन काम बुता म लग जाथे । बाड़ी म जाथे । संझा के साग भाजी के बेवस्था करे लगथे । रात म भोजन बना के बढ़िया खाथे । भात खात-पात बताथे समारू ल मिनी माता जी हा मोर भात, दार, सब्जी, चटनी ल बहुत पसंद करिच । बेटी बहुत बढ़िया जेवन बनाय हच । माताजी वईसने जलदी जलदी म बनाय हंव । कहेंव माताजी मोला रंघईया रख लेव । माताजी कहिच । मय तो रख लेहंव, फेर सरपंची कौन करही । कहिच बेटी जा सरपंची कर । सरपंच ले विधायक बन जाबे । माताजी के आशीरवाद लेके आये हंव । समारू मजाक करथे । तय विधायक बन जाबे तब मय सचिव बन चाहूँ । अऊ रोजिना खाना पका के देहंव । रात म गोड़ भी दबाहंव । चन्दा कईथे अभी ले मोला ताना मारत हच । थोरकन रूक तो जाव । चन्दा के लहर बटोर देख । जब विधायक बनहूँ त तोरे तो इज्जत बाढ़ ही । सब तही ह काम करबे । मय तो नाम मात्र के विधायक बने रईहंव । मात्र विधानसभा म विधायक । घर म तो तोर गोबर हेरीन चन्दा रईहंव । समारू कथे मय तो मजाक करत रहेंव । चन्दा खिलकिला के हंस देथे । महूँ तो ठट्ठा करत हंव । भात खाके सो जाथे ।

चन्दा मस्ती मस्ती म रहय । बहुत खुश रहय, काबर विधायक के आवेदन कर रहय । अऊ भावी सारंगढ़ के विधायक बने बन मन मचलत रहय । समारू मुँह ल चूमे चाटे लगथे । समारू कथे दिल्ली ले नवा सिख के आय हच । चन्दा कथे अउ कछु झन कहिबे । चन्दा कथे आज मय बहुत कुस हंव । दूनों थक के पसीना पसीना होके सूत जाथे ।

दूसर दिन चन्द्रकला आ जाथे सारंगढ़ । मधु के घर चाय पीये । चन्द्रकला कथे । मय महिला बैंक के अध्यक्ष बन जाथंव । सरिया महिला बैंक के मीटिंग बुलावा । मधु कथे ठीक हे दीदी । बैंक के अध्यक्ष बने ले जादा काम होही । चन्द्रकला कथे मय चन्दा देवी से मिल के आवत हंव । सरिया संग जाथे । मधु कथे । हाँ मय तियार होगे रईहंव । चन्द्रकला देवी, पैदल, पैदल चल के रानी सागर गाँव चल देथे । चन्दा ह दरवाजा खोलथे चन्द्रकला देवी के पाँव छूथे । आसीस देते सारंगढ़ के एम.एल.ए. बनो । सुखी रहो । चन्दा खिलखिला के हंसते । चन्द्रकला भी हँसथे । परछी के खटिया म बिछाके चादर । दूनों झने बईठ जाथे । चन्द्रकला कथे भूरी अऊ कुसुवा कहाँ गे हे । चन्दा कथे पढ़े गे हे । समारू भईया ह खेत गय हे । चन्द्रकला पूछथे तोर सरपंची कईसे चलत हे । बढ़िया जापान के ट्रेन जईसे दउड़त हे । चन्द्रकला कथे पाँच कि.मी. के गति से भागत हे । चन्दा कथे ओकरे ले जादा । मजा आगे दीदी । दिल्ली घूम के जरा भूलागे । आनंद आगे । चन्द्रकला कथे हमर संग रईबे त स्वर्ग के सुख भोगबे । बस ये गोबर थोपे ल छोड़ दे । घर के दुवारी ल निकल जा । सरपंची करत हच । अतका बोल पाथच । नई तो कोठा के गोबर हेरत हेरत हाथ पाँव म कंदवा चर देही । चन्दा कथे अतके तो किसान मन के पूँजी ये । आज खाय पीये के पूरता हो जाथे । नौकरी कर हाथ नई फइलावन । चन्दा कथे चल दीदी दूध भात खाले । दूबराज चाउर रांधे हंव । सब्जी अभी बनई नईऐ । चन्द्रकला कथे । दे बहिनी जो भी बने होही ला दे । बटकी म चन्दा भात लाथे । अऊ गरम-गरम दूध बटकी के भात म एक पाव से जादा डाल देथे । चन्द्रकला दूध भात खाथे । चन्दा ह पंखा झलथे, वाह मजा आगे चन्दा । पहिली बार दूध भात बहुत दिन के बाद खात हंव ।

चन्द्रकला बताथे । दादाजी जीयत रहिच तब हम नान नान रहेंव, गौसाला के दूध दादाजी लावय । दूध भात खावन। साग सब्जी त रहय नहीं चन्दा कथे दीदी अऊ भात परोसा लेले । दे बहिनी दूध भात बने लागत हे । चन्द्रकला छेड़थे । तभे बहिनी तय समारू के ऊपर हस । बेचारा चिटोपोट नई करय । बने सीधा मनखे हे । मोर अईसने दिन कटगे । मन मसोस के जीवन ल काट डारेंव । चन्द्रकला कथे बहिनी चल सरिया जाय बर आय हंव । चन्दा कथे । मोर घर सुन्ना हे । मोरसास, अऊ पति देख खेत डहर गय हे । ओमन आही त जा सकत हंव । घर छोर के नई जावंव । आज कर चोर चिंहार बहुत होत हे । फेर सरपंच आंव । सबके नजर म चढ़गे हंव ।

समारू ह ओतके बेरा खेत ले आ जाथे । चन्द्रकला ल देखके कईथे, नमस्ते समारू भईया । चन्दा ह विधायक बनही, पईसा के बेवस्था कर अभी ले तियारी कर ले । समारू कथे, दीदी मय तो किसान आव । धान हो जाहय पचास हजार के अऊ पाँच सात एकड़ खेत बेच देथंव । चन्द्रकला कथे भईया ये ही महीना बेवस्था कर दे । फेर दिल्ली जाय लगही । चन्द्रकला कथे । भईया तोही ल घर द्वार सम्हाले ल पड़ही । चन्दा तो नेता बनगे हे । समारू कथे दीदी घर देखे बर एक झन अऊ ले आत हे । चन्दा नेता गिरी करही । दूसर ह घर देख ही । चन्द्रकला कथे भईया अईसे गलती झन करबे । अभी तो एक कान ल खिचत हे । दूसर पत्नी ह दूसर कान ल खिचही । हलाकान हो जाबे । समारू कथे दीदी मय तो मजाक करत हंव । चन्दा कथे तय ले आन । मोर सौत आही बने मारही झाड़ू बाहरी म त तोर चेत जागही । चन्द्रकला कथे भईया बहुत मजाक होगे ।

चन्दा कईथे भईया समारू अब चन्दा ल मोर संग छोड़ दे । मय विधायक बनवा के रइहूँ । समारू कथे दीदी चन्दा ल मय उल्ला छोड़ दे हंव । जहाँ जाना चाहय जा सकत हे । चन्दा त मोर गुमान बढ़गे हे । समाज म महर स्थान ऊँचा होगे हे । समाज म बिना चन्दा के कोई काम नई होवय । मोला गुमान हे । कम से कम मरद समाज ल नारी मन टक्कर देय ल खड़ा होत हे । मरद के गुमान ल तोड़ना चाही । नारी समाज ह ऊपर उठाय के परयास करत हे । अच्छा बात हे । चन्द्रकला कथे चन्दा बहिनी चल । हाँ दीदी लूगरा बदलत हंव । चन्दा ह कोसा के लूगरा पहिन के निकरिच त चन्द्रकला ह देखते रहिगे । बड़ सुघ्घर दिखत रहय । समारू कथे वाह क्या सुन्दर परी जईसे दिखत हे । चंदा सरमा जाथे । चंदा खिलखिला के हंस देथे । समारू कथे आज कोकरो ऊपर गाज गिराही लगत हे । चल जा बूता कर बहुत छेड़त हच । का मोला नई देखेच । गटोर के देखत हच । समारू हंस देथे । जा भई सरपंच जी । विधायक जी । चन्द्रकला कथे जाथन भईया । समारू कथे लउहा आ जा बे ।

चन्द्रकला, चन्दा, मधू बस म सारंगढ़ से सरिया पहुँच जाथे । जमुना घर म रहय । जमुना जाय पिलाईच । मधु ह प्रस्ताव करिच चन्द्रकला महिला बैंक के अध्यक्ष बनही । आज ऐ मीटिंग महिला मंडल के बुला ले । चन्द्रकला ह अपन घर म कार्यालय अऊ बैंक के आफिस रखे रहय । दो कमरा नवा बना डारे रहय । मधु कथे । जमुना दीदी चल आफिस म बईठबो । शाम चार बजे महिला मंडल के बैठक म महिला बैंक के अध्यक्ष चन्द्रकला देवी बन जाथे । मैनेजर ल बुलाके निर्देश देथे । मेडम शांति शर्मा, सब महिला मन लोन बाँट दे । एक करोड़ रूपिया के लोन बाँट देथे । चन्द्रकला, चन्दा, मधु अपन अपन घर आ जाथे । चन्द्रकला कथे । चन्दा तय विधानसभा के तियारी कर ।

चन्दा ह सरपंची के काम म लग जाथे । पंचायत सचिव ल बुलाके सारंगढ़ के गाँव के सूची बनवाथे । सभी गाँव के मतदाता सूची के कापी रायगढ़ के जिला निर्वाचन कार्यालय से खरीद के ले आथे । चन्दा ह पईसा के बेवस्ता करे ल समारू ल कथे । समारू कथे तोर ददा मन से उधार म रूपिया ले आ । मय पचास हजार रूपिया के कोठी के धान बेच देथंव । सारंगढ़ के बड़े साव के पास जमीन बेचे बर कहिहूं । पास के खेत हे शायद ले लेही । समारू ह रूपिया के जुगाड़ कर लेथे । चन्दा ह अपन भाई रामदयाल अऊ भउजी ल बुला लेथे । मोहन लाल भारद्वाज से चुनाव लड़त हंव कहिके चिट्ठी लिख देथे । समारू के बहिनी समारिन बाई ल घलो खाना बनाय बर लेवा लाथे । पूरा घर भरे रहय । समारू ह दस बोरा धान कुटवा के ले आय रहय । एक बोरा तिवरा दाल अऊ उड़द के दाल दरवा ले रहय । एक बोरा गेहूँ एक बोरा पिसवा के रखते रहय । किराना दुकान के मिर्चा, मसाला, तेल एक टीना, साबून, सोडा खरीद के ले आथे । चन्दा ह चुनाव के तियारी म भीड़ जाथे ।

चन्द्रकला के टेलीफोन मधु के घर आथे । चन्दा ह कल भेज देबे । मिनी माताजी बिलासपुर म आय हे । काल जाबो तियारी करके आ जाहय । चन्दा ह दूसर दिन बस म रायगढ़ पहुँच जाते । रायगढ़ ट्रेन म बिलासपुर दूनों झन चल देथे । मिनी माताजी के किराये के मकान जरहाभाठा म जाते माताजी से मिलईया मन के भीड़ लगे रहय । चन्दा ह माताजी के पाँव छूथे । चन्द्रकला भी पाँव छूथे । सुखी रहो के अशीष देथे । माताजी चन्दाल कईथे, बईठ बेटी बईठ । भीड़ ल निपटा के बात करहूँ । दस मिनट बाद पानी अऊ चाय आ जाथे । चन्दा ह माताजी ल देथे । चन्द्रकला अऊ अपन चाय पीये लगथे । तब तक भीड़ छठ झाथे । माताजी कथे । कईसे आय हच चन्दा बेटी । चन्दा कथे माताजी अईसे भेंट करे आय हन । दिल्ली के बाद बिलासपुर पहिली रथे आय हन । चन्द्रकला कथे । माताजी विधानसभा के टिकिट बर आय हन । माताजी कथे बेटी हो श्रीमती गांधी ल आवेदन दे देहव । अऊ तुमन ल आश्वासन दे देहे । फेर तुमन काबर घबरावत हव । तुमन ल जरूर टिकट मिलही । एक आवेदन पत्र मोर डायरी म हावे । नाम घलो लिख के रखे हंव । जावव तुमन रायगढ़ म तियारी करव । माताजी चरण छूके बिलासपुर से रायगढ़ आ जाथे । चन्दा ह रात चन्द्रकला के घर रूक जाथे । दूसर दिन सारंगढ़ चले जाथे ।

चन्द्रकला मालूराम ल सब बात बताथे । माताजी तियारी करे ल कहे हे । चन्द्रकला कथे रूपिया के जुगाड़ कईसे होही । पुस्पा देवी अऊ बलराम घला बताथे । पुस्पा कथे बेटी तोर पास सोना दो सौ ग्राम हे तेला बेच दे । एक लाख रूपिया के हो जाहय । सेठ जी से एक लाख रूपिया ले ले । चुनाव जीतबे त वापस कर देबे । रूपिया के बेवस्था हो जाथे । मालूराम से जीप भी किराया म ले लेथे । अपन घर के जीप भी अपन पास रखिहंव कथे । चन्द्रकला ह पूरनिमा ल बुला लेथे । टेटकी बुआ ल कहिथे बुआ मय चुनाव लड़त हंव । सहजोग चाही । टेटकी कथे ठीक हे बेटी । सब जुर मिलके चुनाव म काम करबो । जरूर जीत हमर होही । चन्द्रकला चुनाव के तियारी म लग जाथे ।

विधानसभा चुनाव के घोसना दू महीना पहिले हो जाथे । नवम्बर महीना म चुनाव बीस तारीख के पक्का हो जाथे । चन्द्रकला देवी अऊ चन्दा देवी सरिया अऊ सारंगढ़ से कांग्रेस पार्टी के चुनाव चिन्हा के आवेदन कलेक्टर रायगढ़ म चार कापी म प्रस्तावक, समर्थक सहित भर देथे । चन्दा देवी अऊ चन्द्रकला देवी के नाम अखबार म छप जाथे । दूनों महिला जीतने वाली उम्मीदवार रथे । बहुत आदर सम्मान होय सुरू हो जाथे । जिला कांग्रेस कमेटी रायगढ़ भी नाम भी फार्म के लिये भेज देथे । टिकट आबंटन समिति से श्रीमती इंदिरा गांधी दूनों महिला के नाम जोड़वा देथे । बी फार्म भी सुश्री चन्द्रकला देवी आत्मज रामदेव यादव पांड़े, सरिया के लिये कांग्रेस के अधिकृत प्रत्यासी घोसित की जाती है । सारंगढ़ सुरक्षित अनुसूचित जाति के लिये कांग्रेस पार्टी के श्रीमती चन्दा देवी वारे पति श्री समारू राम वारे अधिकृत प्रत्यासी घोसित की जाती है ।

मालूराम दूनों बी फार्म जिला निर्वाचन अधिकारी रायगढ़ म जमा कर देथे । भारतीय जनसंघ ले सरिया के चिन्तामणी नायक अऊ सारंगढ़ से सेरसिंह खड़ा होथे । चन्दा देवी अऊ चन्द्रकला देवी सरिया पईसा के जुगाड़ बेवस्था म लग जाते । पोस्टर, बेनर पार्टी कार्यालय से मिल जाते । चन्द्रकला देवी सरिया मन पूरा परिवार सहित डट जाथे । मालूराम चुनाव के कमान सम्हालथे । चन्द्रकला देवी के चुनाव प्रचार करे बर रामदेव, कामदेव, चन्द्रसेन, एम.ए. गफ्फार भाई, टेटकी बुआ अपन परिवार सहित, पूरनिमा सुनील सांडिल्य, चन्द्रप्रकास, पुस्पा देवी बलराम अऊ पाँच सौ महिला मंडल के सदस्य म गाँव गाँव घर घर चुनाव के प्रचार म लग जाथे । सरिया के निवास स्थान म चुनाव कार्यालय बना लेथे ।

चन्दा देवी के चुनाव कार्यालय सारंगढ़ म मधु के घर म खुल जाथे । चन्दा देवी चुनाव के संचालन समारू करथे । चुनाव प्रतार बर चन्दा के माँ-बाप, भाई-बहन । समारू के बहिनी, भाई, ममा, चचा, महिला मंडल के पाँच सौ दस्य मन गाँव-गाँव घर घर चुनाव प्रचार म लग गे । मधु सारंगढ़ नगर अऊ आसपास क्षेत्र के चुनाव प्रचार करत रथे । चुनाव, बेनर, पोस्टर कांग्रेसी पार्टी से मिल जाथे । चुनाव प्रचार घमासान, गाँव गाँव म होये लगथे । रानी सागर गाँव म प्रचार करियईया मन बर भंडारा खुले रहय । कम से कम रोजिना तीन सौ चार सौ आदमी बन बर दाल भात सब्जी पकत रहय । चुनाव म सब जगा चन्दा देवी वारे के नाम के सोर उड़त रहय । जनसंघ पार्टी के प्रचार करईया बहुत कम रहय । प्रचार करईया नई मिलित रहय । चन्दा देवी वारे ह सेरसिंह के घर जाके, चुनाव जीते के आसीरबाद माँगथे । चरण छूथे । सेरसिंह कथे, चुनाव जीतो । चन्दा कथे मोला बोट देवे भईया । सेरसिंह कथे बेटी तहूँ मोला बोट देतेच । कार्यकर्ता मन हांस डारथे । सेरसिंह बेचारा गरीब आदमी कोई चुनाव प्रचार म दम नई रहय । सारंगढ़ के घर घर म महिला मन तीन चार बार चुनाव प्रचार करत रहय । बहुत अच्छा प्रचार के काम महिला मन करत रहय ।

चन्द्रकला देवी के कांग्रेस पार्टी के चुनावा प्रचार करे बर मुख्यमंत्री अर्जुन सिंह सरिया आथे । चुनाबी सभा म हजारों महिला मन जुरे रहय । आदमी खचाखच भरे रहे । बीस हजार से तीस हजार के भीड़ रहय । अर्जुन सिंह कहिथे । श्रीमती चन्द्रकला देवी ल बैल जोड़ी छाप म मुहर लगाके भारी बहुमत से जीतवाव । महिला मन ल आगे लाय बर पार्टी समरपित हे । चुनाव काम म जोस भर देथे । चुनाव काम म जोस भर देथे । चुनाव काम म तेजी आ जाथे । महिला मन उत्साह से घर घर म दस्तक देथे । कोई गाँव नई छुटय । जनसंघ पार्टी ल चुनाव प्रचार करे बर आदमी मन बेनार, पोस्टर, सायकल म लगाके घूमत दिखय । कांग्रेस पार्टी के चुनाव प्रचार तेज होगे रहय । सरिया कांग्रेस मय हो गय रहय ।

सारंगढ़ विधानसबा म कांग्रेस पार्टी के चुनाव प्रचार म अर्जुन सिंह मुख्यमंत्री के साथ मिनी माताजी सांसद आथे । मिनी माताजी कथे । चन्दा देवी मोर बेटी ऐ । ऐला कांग्रेस के बैल जोड़ी छाप म मुहर लगा के प्रचंड बहुमत से जीतावव । तभे महिला मन के विकास होही । अर्जुन सिंह जी के भासन से कार्यकर्ता मन के उत्साह ह दुगुना हो जाथे । पचास हजार के भीड़ महिला पुरूष मन के रहय । चुनाव प्रचार गाँव गाँव, घर घर महिला मन करत रहय बहुत बढ़िया माहोल चंदा देवी के पक्ष म हो गय रहय । सारंगढ़ क्षेत्र म कांग्रेस पार्टी के जोर दिखय । कार्यकर्ता मन चुनाव प्रचार खात पीयत करत रहय । चन्दा देवी कथे जतका आवय दाल, भात, चटनी, सब्जी बना के खिलावय ।

बीस नवम्बर के बोट पड़िच । सरिया म 55 प्रतिशत अऊ सारंगढ़ म 50 प्रतिशत मत पड़िच । महिला मन घर के सबे महिला मन निकालिन । सबे बुथ म महिला मन के लाईन देखे बर मिलिच । कई जगा छोट मूट विवाद, हाथापाई होईच । परंतु सांत पूर्ण ढंग से चुनाव सम्पन्न होगे । चन्दा अऊ चन्द्रकला के किस्मत मत पेटी म बंद होगे । चन्दा के हाय जी होईच । गाँव गाँव के धूल, धक्कड़, कीचड़, कांदो जगा-जगा पानी पीये रहय । सर्दी पकड़े रहय । समारू ह बढ़िया दूध हल्दी गरम करके देईठन । चन्दा के सरदी थोड़ा कम होईच । तोसरे दिन मत गणना रायगढ़ म हो बईया रहय। चन्द्रकला देवी अऊ मालूराम ल कईथे, ऐ मतगणना एजेंट के नाम हे । पास बनवा देथे । मालूराम अग्रवाल मतगणना एजेंट के पास बनवा के रख ले रहय । चन्दा ह जीप म भरके रायगढ़ पोलेटेकनिक कालेज मतगणना स्थल म पहुंचिस । मालूराम अऊ चन्द्रकला देवी इंतजार करत रहय । मतगणना ठीक आठ बजे सुरू होगे । प्रथम च्रक म जनसंघ आगे होगे रहय । चन्दा अऊ चन्द्रकला के चेहरा मुरझाय जईसे होगे । दूसरा चक्र म कांग्रेस आगे होगे । फेर सभी चक्र म कांग्रेस लीड करे लगिच । अंतिम चक्र शाम पाँच बजे खतम होईच । चन्द्रकला देवी ल कुल मत पैंतालिस हजार मत मिले रहय । जनसंघ ल सात हजार के लगभग मत मिलिच ।

जिला निर्वाचन अधिकारी रायगढ़ ह सरिया विधान सभा क्षेत्र मे कांग्रेस के प्रत्यासी सुश्री चन्द्रकला देवी पिता रामदेव यादव ल विजयी घोषित करीच । अनुसूचित जाति सारंगढ़ से कांग्रेस के प्रत्याशी श्रीमति चन्दा देवी पति समारूराम वाले विजयी घोषित करिच । परमान पत्र भी दिच । चन्दा अऊ चन्द्रकला ल कलेक्टर साहब बधाई भी दिच । रायगढ़ म कांग्रेस सभी सीट से जीते रहिस । मध्यप्रदेश म अर्जुन सिंह मुख्यमंत्री ल पूर्ण बहुमत कांग्रेस ल दो सौ इक्कीस सीट से जीत हासिल होय रहय । नव निर्वाचित विधायक मन के दूसर दिन बैईठक भोपाल म आयोजित होथे । चन्द्रकला देवी अऊ चन्दा देवी, रायगढ़ से बिलासपुर, बिलासपुर से छत्तीसगढ़ एक्सप्रेस म भोपाल चल देथे । नव निर्वाचित विधायक बिलासपुर, रायपुर, रायगढ़, सरगुजा, दुर्ग, राजनांदगाँव, बस्तर के विधायक मन से विधानसभा के रेस्ट हाउस म मुलाकात होथे । विधानसभा के स्वागत कक्ष म पहिली से कमरा के आबंटन होगे रहय । चन्दा अऊ चन्द्रकला देवी ल पुराना रेस्ट हाउस के कमरा नम्बर 19 एवं 20 होथे । सबेच समान के बेवस्था रहय ।

चन्द्रकला देवी ह 19 नं. के कमरा म सूटकेस रखिच। मालूराम साथ म रहिच । सब बेवस्था कर देथे । चन्दा ह अपन कमरा म सूटकेस रखथे । चन्दा देवी कुर्सी म बईठ के ऐती ओती देखत रहय । भोपाल बड़े सहर रहय । जतका दूर दिखय पक्का पक्का मकान बीच म बड़े तलाब ओकर चारों तरफ मकान सादा दिखय । बड़े मस्जिद, जामा मस्जिद के मीनार दिखत रहय । समारू कथे का देखत हच । जलदी स्नान धियान करके विधायकों के बईठक म जाबे । चन्दा अऊ समारू नहा के कपड़ा पहिन के नीचे आय लगथे । चन्द्रकला देवी अऊ मालूराम साथ म नीचे आथे । होटल म आलू गुंडा, जलेबी, गरम-गरम खाथे । मालूराम चार आलू गुंडा खा जाथे ।

विधायक दल के बईठक विश्राम गृह के बईठक हाल म रहय । कई बड़े बड़े नेता मन मुख्यमंत्री के चयन करे बर आय रहिस । मिनी माता भी आईस । चन्दा अऊ चन्द्रकला देवी ह पाँव छूथे । सुखी रहव । आगे बढ़ते रहो । चन्दा कथे । माताजी के आशीरबाद मिलही तबे कुछो बनबो । माता जी दूनों महिला मन ल विधायक बने के बधाई देथे । माताजी कथे, बेटी तय पहिली महिला विधायक समाज म बने हच । मय अर्जुन सिंह ल मंत्री बनाय बर कहिहूँ । चन्द्रकला कथे । माताजी मोहू ल मंत्री बनवा देना । ठीक हे भाई देखहूँ बोलके । मालूराम मंत्री बनाय बर जोड़ तोड़ करे लगथे । विधायक दल के बईठक म सर्व सम्मत्ति से अर्जुन सिंह मुख्यमंत्री चुने जाथे । सब नव निर्वाचित विधायक मन ल बधाई देथे । मुख्यमंत्री बने ले सब विधायक फूल माला से लाद देथे । दूसर दिन दस बजे राज्यपाल महोदय ह मुख्यमंत्री के शपथ ग्रहण कराथे । मुख्यमंत्री ह अपन मत्रीमंडल के सूची देथे । केबीनेट मंत्री, राज्य मंत्री, अऊ उपमंत्री ल सपथ दिलाथे । अंदिम म राज्य मंत्री के लिये सुश्री चन्द्रकला देवी ल सपथ राज्यपाल महोदय दिलाथे । मालूराम ह जगतपाल से मिलके नाम जोड़वा लेथे । नवा मंत्री मन ल बधाई देथे । राज्यपाल महोदय ह । मंत्री मन बधाई देने वाले के तांता लग जाथे । चन्दा देवी ह चन्द्रकला देवी ल बधाई देथे । दीदी मोर सपना ह आज पूरा होगे । तोला मंत्री के रूप मा देख के । चन्द्रकला देवी कथे चन्दा तोर मोहनत के फल ऐ । मय मंत्री जरूर बने हंव । फेर तय मंत्री जानगे । अपन ल आँख से आँसू आ जाथे । चन्द्रकला अऊ चन्दा विधायक विश्राम गृह अपन कमरा म आ जाथे ।

सब थकान आज दूर होगे । मंत्री बने के खुसी म अप जऊन जाहत हंव करलो । मालूराम लस्ल पड़ जाथे, अउ सुत भुलाथे । बिहनहा के अखबार म फोटो सहित मंत्री मन के विभाग के बँटवारा छपे रहय । चन्द्रकला देवी ल स्वतंत्र प्रभार समाज कल्याण विभाग राज्य मीं के देय रहय । चन्द्रकला देवी ल अपन इच्छा के अनुसार विभाग मिल जाथे । विभाग के अधिकारी मन के बधाई टेलीफोन मिले लगिच । सचिव अऊ संचालक मन फूल माला लेके रेस्ट हाउस म बधाई देथे । सब अधिकारी मन विभाग के जानकारी देथे । महिला बाल विकास, समाज कल्याण विभाग के जानकारी ले लेथे । अधिकारी मन के जाय के बाद, चन्द्रकला देवी स्नान करके, चाय, नास्ता करके मंत्रालय म विभाग के चार्ज लेय बर चन्दा देवी, समारू, मालूराम पहुँचथे । विभाग के सचिव, प्रभार के कागजात म दस्तखत कराथे । सब अधिकारी मन से परिचय भी करथे । अऊ मंत्रीगण से घलो परिचय करथे । विभाग के अधिकारी कर्मचारी मन के बधाई देय बर तांता लग गे रहय । शाम पाँच बजे तक आफिस म काम निपटाईच । लाल बत्ती के कार म बईठ के पूरा सहर घूमत चन्दा देवी वारे विधायक, समारू, मालूराम अऊ चन्द्रकला देवी मंत्री रेस्ट हाउस आ जाथे। साथ एक गन मेन ।

चन्दा देवी हाथ पाँव धोके कपड़ा पहिन के तियार भोजन करे जाय बर । चन्द्रकला देवी कथे आज जुमेराती के जैन भोजनलाय म जाबो । रात आठ बजे म जुमेराती घोड़ा नक्काश जैन भोजनालय म भर पेट भोजन करथे । बाहर पान ठेला में पान मीठा मसाला खाथे । मालूराम कथे, बहुत भारी खाना हो गय जलदी नई पचय । होजमोला के गोली मेडिकल स्टोर से खरीदथे । सहर घूमत घूमत रेस्ट हाऊस आके सो जाथे । चन्दा देवी अऊ चन्द्रकला देवी ह कोसा के बढ़िया लूगरा, पोलखर पहिन के विधानसभा जाथे । चन्दा देवी ल परिचय पत्र देथे । विधानसभा म सांरगढ़ विधानसभा के सीट क्रमांक दो सो एक म बईठाथे । चन्द्रकला देवी ह मंत्री मन के पाछू म बईठ जाथे । विधानसभा अध्यक्ष ह विधायक मन ल शपथ कराथे । दोपहर के भोजन विधानसभा अध्यक्ष महोदय कराथे । दिवंगत विधायक, सांसद, नेता ल श्रद्धांजलि देके विधानसभा स्थगित हो जाथे ।

चन्द्रकला देवी के पी. ए. सम्भूनाथ राय बनिस छत्तीसगढ़ एक्सप्रेस से भोपाल से बिलासपुर के टिकट आरक्षण विधानसभा काउंटर से करा देथे । चन्दा देवी, समारू, मालूराम, चन्द्रकला देवी, ए. सी. बर्थ म बईठ के बिलासपुर आ जाथे । बिलासपुर रेलवे स्टेसन म नगरपालिका कर्मचारी एवं विभागीय अधिकारी मन फूल माला से लाद देधे । वेटिंग रूप म उत्कल एक्सप्रेस या अहमदाबाद ट्रेन के इंतजार म रहिस । अहमदाबाद एक्सप्रेस बिलासपुर से रायगढ़ पहुँच जाथे । रेलवे स्टेसन म स्वागत बर फूल माला धरे हजारों के भीड़ रहय । कलेक्टर, पुलिस अधीक्षक पंचायत एवं समाज सेवा अधिकारी एस. डी. एम. कांग्रेस के सैकड़ो कार्यकर्ता नगरपालिका के सैकड़ो सफाई कर्मचारी एवं अधिकारी, वरिष्ठ नागरिकगण । एम. ए. गफ्फार भाई, कामदेव, बलराम, चन्द्रसेन, पुस्पादेवी, जानकी, जगदीश, डॉ. बिहारी लाल, अनुपम दास पत्रकार, सिवसरण आदि हजारों के संख्या म भीड़ रहय अहमदाबाद एक्सप्रेस से पहिले मालूराम अऊ समारू सूटकेस लेके उतरथे । समान ल चन्द्रसेन अऊ पुलिसवाला मन कार म रखवाथे । चन्द्रकला देवी अऊ चन्दा देवी उतरीन । कलेक्टर अऊ एस. पी. गुलदस्ता से स्वागत करथे । पुस्पा देवी, बलराम, कामदेव, गफ्फार भाई के चन्द्रकला देवी चरण छूथे । चन्दा देवी घलो चरण छूथे । एक घंटा स्वागत म लग गे । फूल मालाओं से लाद दे रहीन । रायगढ़ म ऐतिहासिक स्वागत रहिस । रायगढ़ शहर के लाडली बेटी चन्द्रकला देवी मंत्री बने रहिस ।

चन्द्रकला देवी कईथे कलेक्टर साहब मय सबसे पहिली घर जाहंव । कार म पुस्पा देवी, चन्दा देवी, चन्द्रकला देवी बईठथे । दूसर कार म मालूराम अऊ समारू, बलराम, चन्द्रसेन बईठ गोसाला पार के घर जाथे । जगा, जगा स्वागत होत रहिस । जईसे गोसाला पारा पहुँचिस, फटाका, बम फटाका धमाक, धमाक फूटथे । पंडाल म सैकड़ों कुर्सी लगे रहय । चन्द्रकला देवी अऊ चन्दा देवी दुवारी म गईन । आरती लेके रमौतीन अ तीन झन महिला खड़े रहय । रमौतीन आरती उतारथे । चन्द्रकला देवी पाँव छूथे । रमौतीन आँखी ले खुशी के आसू बोहा जाथे । चन्द्रकला ल हिरदय से लगा लेथे । दाई के पियार म आसू छलक जाथे । आरती उतार त घर म ले जाथे । अंगना के कुर्सी म बईठथे । रामदेव, पुस्पादेवी, बलराम, कामदेव के पाँव छूके आसीरबाद लेथे । चन्द्रसेन सूटकेस ल कमरा म रखिथे । चन्दा देवी, स्नान करके तियार हो जाथे । मालूराम अपन घर जाय ले पहिले सब ल मिठाई बंटवाथे । सब अपन अपन घर चले जाथे । सुरक्षा गार्ड मन बचे रथे ।

चन्द्रकला देवी स्नान, धियान करके लूगरा पहिन के निकलिच । चन्दा देवी अऊ समारू तियार होके बईठे रहय । चन्दा बिहनी चल गोसाला म गाय बछरू के पूजा कर लेंथव । अगरबत्ती, धूप, पान, लोटा म पानी लेके पूजा करे लगथे । गाय मन देखथे का होगे । बिचक जाथे । चन्दा अऊ चन्द्रकला देवी लउहा आफिस म आ जाथे । रामदेव ह गोसाला के गेट ल बंद करथे । चन्द्रकला देवी बताथे चन्दा मय अऊ मोर परिवार, गो सेवा करके जिनकी चलाय हन, गोबर साफ मय करे हंव ।गाय के दूध पीके रहिजावन, दिन म भात नसीब नई होवय । अईसे दिन देखेव । गोसाला के गोबर हेरई, सफाई, दूध बेचई से लेके, नगरपालिका म कलरकी, जसपुर सारंगढ़ म नौकरी महिला बैंक के अध्यक्ष, महिला मंडल के संयोजक आज विधायक अऊ समाज कल्याण मंत्री बने के सफर तय होय हे । बड़ अपमान सहे हंव । चन्दा कथे दीदी तभे सोना जईसे तप गे हच । चन्द्रकला अऊ चन्दा अंगना म पीढ़ा म बईठ के गोठ बात, सुख दुःख के गोठ बात करत रहीन । पुस्पा देवी अऊ रमौतीन दाई मन भात रांधे बर घर लीन । चन्दा कथे चल दीदी रंधनी कोती । रमौतीन दाई ह चाऊँर अंघना म डरत रहय । चन्दा कथे दे ना दाई मय रांध देथंव । नहीं बेटी आज हमन छूअन नई देन । हमर बेटी ह विधायक अऊ मंत्री मन के आय हे त आज हमर नाक ल ऊंचा कर देन । चन्द्रकला कथे त का होगे दाई, माँ बेटी तान । चन्दा अऊ चन्द्रकला मटर छिल के खाय लगथे । पुस्पा कथे बेटी ऐही दिन देखे बर तो जीयत हंव । रमौतीन दाई कथे । बेटी आज मोर कोख ह तरगे । मय तर गेंव, तोला जनम देके । आँखी ले आँसू खुशी के बोहा जाथे । नव महीना कोख म रखे रहेंव । अऊ छेवारी के पीरा अऊ ओकर सुख के अनुभव होईच हे ।

रमौतीन कथे चन्दा बेटी जे दिन चन्द्रकला ह होईच । ओही दिन गोसाला म दस बारह गाय मन जनमे रहीन । दूध के गंगा बोहागे । घर म दूध दही के भंडार होगे । अईसे लक्ष्मी बन के आय हे चन्द्रकला ह । आज ले लक्ष्मी जईसे हम तो पोसत पालत हे । आज अऊ चूल्हा चौकी छोड़ के सरकार चलाही । मोर तो भाग जागगे । सब ल ईसे बेटी देवय । पुस्पा देवी कथे । चंदा रमौतीन जरूर जनम देय हे फेर पाले, पोसे, पढ़ाय लिखाय मय हंव । मय यशोदा माता आंव । पाल पोस के नौकरी घलो लगवाय हंव । पुस्पा कथे बेटी चन्द्रकला म ताकत, सक्ति रमौतीन के हे पर दिमाग, बुद्धि मोर हे । अईसे चन्द्रकला देवी के दाई मन रहय । दूनों के पियार दुलार पाके बड़े आदमी, नेता बने के गुन आय रहय । चन्द्रकला रंघनीम बईठ के रो डारिच । दुःख के आँसू बोहागे, सुख के आँसू आगे ।

चन्द्रकला अऊ चन्दा देवी, समारू पीढ़ा म बईठ के खाना खाथे । रमौतीन दाई हाथ के खाना के कुछ और सुवाद रथे । चन्दा ह चटकारा लेके खाईच । गप मारके सो जाथे । दूसर दिन स्नान धियान करके चन्दा देवी अऊ चन्द्रकला देवी सारंगढ़ कार से चल देथे । नवभारत अखबार म मंत्री बने के बधाई छपे रहय । चन्द्रकला अऊ चन्दा के फोटो छपे रहय । मंत्री जी के कार्यक्रम सारंगढ़ अऊ सरिया जाय के छपे रहय । जईसे ही कार नगरपालिका आफिस के पास रूकिच । नगरपालिक कर्मचारी, कांग्रेस कार्यकर्ता, मधु अऊ महिला मंडल के सैकड़ों सदस्य मन फूल माला से चन्दा अऊ चन्द्रकला देवी ल फूल माला म लाद देथे । लगातार दो घंटे तक मंत्री महोदया अऊ विधायक चन्दा देवी के सुवागत होथे । रंग गुलाला से माहौल रंगीन हो जाथे । मधु केसरवानी मिठाई बंटवाथे । चन्द्रकला देवी अऊ चन्दा देवी ह धन्यवाद अऊ आभार व्यक्त करथे ।

चन्दा देवी कथे । चल न दीदी घर कोती । चन्द्रकला देवी अऊ महिला मंडल के सदस्य गण रानी सागर गाँव म भव्य सुवागत करथे । जगा, जगा द्वार आरती उतारथे । चन्दा देवी के घर के पास सैकड़ों नर नारी जुड़े रहय । चन्दा देवी के चेहरा लाल रंग पहिचान नई आवत रहय । भूरी अऊ कुसुवा आके पाँव छूथे । चन्दा अऊ चन्द्रकला देवी गोदी म उठा लेथे । सब झन ल लड्डू बंटवाथे । चन्दा देवी अऊ चन्द्रकला देवी जैत खाम म पूजा आरती करथे । नरियर फोड़थे । चन्दा ह कथे दीदी सतनाम साहेब के किरपा से विधायक बने हंव । मिनी माता जी के आसीरबाद से ही विधायक बने पायेंव । चन्द्रकला देवी जैत खाम म माता टेकथे । सुख समृद्धि बर आसीस माँगथे । समारू हा सब झन नरियर के प्रसाद अऊ लड्डू बाँटथे । मधु अऊ महिला मन बहुत खुस होथे । चन्द्रकला देवी सब झन एकजुट रहे के समझाइस देथे । चन्दा देवी ह अपन घर म भोजन कराथे ।

चन्द्रकला देवी समाज कल्याण मंत्री अऊ चन्दा देवी विधायक, मधु केसरवानी, भूरी अऊ कुसुवा ल लेके तीन कार म सरिया चले जाथे । सरिया गाँव म जगा जगा तोरण द्वार सजे रहय । द्वारी द्वारी म आरती लेके महिला मन चन्द्रकला देवी अऊ चन्दा देवी के सुवागत करीन । चंदैनी गोदा के फूल पियर अऊ लाल रंग से चेहरा म चमक आगे रहय । चन्द्रकला के चेहरा दमकत रहय । सबके सुवागत दूनों किच । बुढ़िया दाई मन के चरण स्पर्स करीन दाई मन मुख्यमंत्री बने के आशीष देवय । चन्द्रकला हंस देवय । एक झने बुढ़िया दाई जेकर उमर सौ साल से जादा रहय आसीस देईच सात बेटा के माता बन । चन्दा कथे दाई मंत्रीजी तो बिहाव नई करे हे । अईसे बात हे बेटी, त जुग जुग जीए के आशीष देथे । चन्द्रकला देवी के घर के सामने जमुनादेवी ह पंडाल बना के मंच बनाय रहय । चन्द्रकला देवी अऊ चन्दा देवी मधु केसरवानी मंच म बईठथे । भूरी अऊ कुसुवा घलो चंदा देवी के पास कुर्सी म बईठे रथे । मधु, जमुना अउ नेतामन सुवागत फूल माला से करवाथे । बारी बारी से महिला मन लगभग पाँच सौ जादा माला फूल, मंत्री जी अऊ चन्दा देवी विधायक ल पहिनाईच । जमुना देवी महिला मंडल के कार्यालय से पूरा मिठाई अऊ भोजन के बेवस्था करे रहय । पूरा गाँव हअऊ आस पास के गाँव के मन मंत्री जी के सुवागत म आ रहय । चन्दा कथे दीदी मोला सारंगढ़ छोड़वा दे । चन्द्रकला देवी कथे । मय तो अकेल्ला हो जाहंव । घर म अभी कोनो नईये । चन्दा कथे । दीदी तय रात रूक के सब झन ले मिल ले । काल सुबह गाँव गाँव जाके महिला मंडल के बहिनी ले मिल ले । बहुत मिहनत करे हे । काल महुँ ह कोसीर महादनी के आसपास म मिलबर जाहंव . चन्द्रकला देवी ह भूरी, कुसुवा के चुमा लेथे । कुर्सी कथे चल न बड़ी दाई हमर घर म सोबो । चन्दा कथे । बेटी तोर बड़े दाई ह बहोत बड़े मंत्री बन गे हे । अड़बड़ झन से मुलाकात करना हे । चन्दा देवी, मधु केसरवानी कार म बईठ के सांरगढ़ आ जाथे ।

समारू ह रात होत हे कहिके तिलमिलात रहय । पचास साठ आदमी गाँव के मन सुवागत करे आय रहय । चन्दा देवी ह बड़े मन के पाँव छुईच । छोटे मन चन्दा देवी के पाँव छुईन । चन्दा देवी दिन भर के थकगे रहय । भूरी अऊ कुसुवा मन सोवत रहय । बार बार चन्दा ल कहय चल न दाई सोबे । चल न दाई सोबो । चन्दा देवी घर म खटिया के चादर ल झर्रा के भूरी अऊ कुसुवा ल थपकी देके सोवाथे । लोरी घलो सुनाथे । भूरी ह आँखी ल निहार फेर देखय । चन्दा कथे, तोर नींद नई आत हे त काबर सोचत हच । भूरी कथे दाई बहुत दिन के बाद तय मिले हच । भोपाल चले गे रहे । अब हम ल नई छोड़बे न । चन्दा कथे बेटी हा अब भोपाल म रहिबो । पाँच साल तो भोपाल म पढ़िबे । पाँच साल म तुमन बड़े बड़े हो जाहंव । चन्दा के गोठ सुन के दाई के थपकी के पियार से भूरी के नींद धीरे धीरे पड़े लगथे । जब दूनों झन सो जाथे तो लूगरा, कपड़ा बदल के घर पहिरे के लूगरा पोलकर पहिन के आ जाथे । चेहरा के रंग, गुलाल ल कुआँ म जा के साबुन से रगड़ रगड़ के धोथे । चेहरा ल लाल होगे रहय । चेहरा म पोण्ड्स के क्रीम ल लगाथे । चन्दा ह थोरकन हल्का महसूस करिच । समारू ह सब झन ल चाय पान, सुपारी खिलाके बिदा कर देथे ।

समारू के दाई अऊ बहिनी मन खाना खाके सोगे रहय । चन्दा कथे भूरी के ददा । चुनाव खर्च के हिसाब किताब लगाय हच । कतका कतका उधारी देय बर बांचे हे । समारू कथे आज तो चल सो जाथन । कालि हिसाब किताब करबो । चन्दा कथे चल सो जाथन । समारू कथे तोर नींद पड़ जाही । हाँ मय थके हंव । समारू कते, खटिया ह बाजही लईका मन जाग जाही । ओकर सेती भूईंया म गोदरी बिछा देथंव । चन्दा जाके सो जाथे । मय तो बहुत थके हंव । समारू कथे । का मय नई थके हंव । चुनाव के बाद तो पहिली बार घर म आय हन । चुनाव के धूल धक्कड़ बहुत खाय हन । चन्दा कथे । समारू मस्ती म रहय । चन्दा कथे । हाय दाई आज परेसान कर डारे । खिलखिला के हांस डारथे । मौज मस्ती आनंद लेके से जाथे ।

चन्दा देवी समारू जीप म कोसीर गाँव जाथे । चन्दा देवी के विधायक बने पहिली बार कोसीर गाँव गय रहय । रंग, गुलाल, फूल माला से लाद दे रहय । गाँव के गुड़ी म दरी म बईठ के चन्दा देवी के सुवागत करथे । गुड़ी म खमखमाय औरत अऊ आदमी मन जुरे रहय । गाँव वाला मन दिल खोल के सुवागत करथे । चन्दा देवी बहुत खुस हो जाथे । कोसीर महिला मंडल के सदस्य मन बढ़िया खाना खवाथे । चन्दा देवी ह कोसीर गाँव के जैत खाम म पूजा करके नरियर चढ़ाथे । नरियर के परसाद बंटवाथे । चन्दा देवी के जय जयकार होगे । बड़े गाँव कोसीर आय । मनखे-मनखे दिखय । समारू ह अपन फार्म हाऊस जाथे । चन्दा देवी भी फार्म हाऊस म खेती किसानी ल देखथे । धान ह मिसावत रहय । दौ सौ बोरा धान मिंजा के कोठी म धर दे रहय । आधा धान बांचे रहय । समारू ह कमिया बनिहार ल बूता जोंग के कथे । भईया हो अब तुमन के जिम्मेवारी म छोड़ के मय भोपाल जाहू । लोग लईका मन उहें रईही । महिना खांड़ म आके देखहूँ । चन्दा कथे । पाँच साल तो भोपाल म रहि सकत हंव । विधायक के मजा तो ले लव । ओकर बाद तो गोबर थापहंव । समारू कथे चल दूसर गाँव भी जाबो । एक दिन म दस बारा गाँव म महिला कार्यकर्ता अऊ कांग्रेस कार्यकर्ता मन से मिल के आ जाथे । गाँव गाँव म चन्दा देवी के आरती उतारथे । रंग, गुलाल चंदैनी गोंदा, गेंदा के फूल से सुवागत करथे । रात के दस बजे गे रहय । समारू कथे चल घर लईका मन रस्ता देखत होई ।

जीप म बईठ के चन्दा समारू घर आ जाथे । भूरी दउड़त द्वारी म आथे । अतका बेरा कईसे होगे दाई । चन्दा कथे बेटी नेतागिरी पूरा घर बरबाद हो जाही । सुख सांति मोर खतम होगे हे बेटी । का रात अऊ दिन । जब चाहे तब लोगन मन समस्या लेके आ जाथे । चन्दा लउहा लउहा हाँथ पाँव धोथे । अऊ सिर के केस म धुर्रेच धुर्रा रहय । गमछा म झर्राथे । केस ल बने फटकारथे । चन्दा ल थोरकन बने हलका लगिच । परछी के पीढ़ा म बईठ के सुस्ताथे । गोड़ लमा के बैईठे रहय । समारू के दाई ह देशी करेला के साग रांधे रहय । भात अऊ करेला के साग चन्दा ल देथे । भूरी घलो बईठ जाथे । समारू के संग कुसुवा खाथे । लउहा लऊहा चन्दा ह भात ल खाईच । एक लोटा पानी ल पीथे । दाई ह परोसा देते । चन्दा नई लेवय । रात म खाना खा के सोये लगथे लईका मन सो जाथे । समारू ह चादर ओढ़के सोये बर लगथे । चन्दा कथे का पहलवान जी । कईसे अभी ले सूतत हच । आज कुछ चिटपोट नई करत हच । समारू कथे आज मय बहुत थक गे हंव । चन्दा कथे दे मय तेल लगा देथव । चन्दा तेल मालिस करथे ।

चन्द्रकला देवी ह सरिया म दू तीन रात रूक जाथे । गाँव गाँव के द्वारी द्वारी म जाके भेंट करथे । घर घर म आरती उतारथे, फूलमाता से सुवागत होथे । जगा जगा सुवागत से चन्द्रकला देवी खुस होथे । तीन दिन म पचास से साठ गाँव म मुलाकात भेंट करके धन्यवाद देथे । सरिया क्षेत्र के महिला बैंक अऊ महिला मंडल ल ससक्त बनाय बर जोर देथे । एक सौ बीस महिला सरपंच मन बहुत खुश होथे । काबर सत्ता म महिला मन के भागीदारी सुनिश्चित होगे रहय । महिला मन बिनाभय के निडर होके काम करत रहिन । चन्द्रकला देवी मंत्री जी कथे । इहां महिला अधिकारी अऊ कर्मचारी भी पदस्थ करा देहंव । सरिया बरमकेला क्षेत्र म खुसी के लहर फईलगे रहय । उड़ीसा के बाडर के गाँव म जाके मिल के धनवाद आभार व्यक्त कर देबे ।

चन्द्रकला देवी जीप से रायगढ़ चल देथे । गाँव के सघन दौरा कर लेथे । गाँव के का का समस्या हे तेला अऊ सिकायत के आदेदन ल बांध के रख ले रहय । सरिया क्षेत्र म का काम कराय बर हे । प्राथमिकता सेका हो सकत हे । पूरा विधानसभा क्षेत्र के नजसी नक्सा बनवा ले रहय । पी. ए. सब ल नोट कर ले रहय । विभागीय अधिकारी मन ल प्रस्ताव प्राक्कलन बनाय के निर्देस भी दे देय रहय । सरिया क्षेत्र के मुख्य समस्या सिंचाई रहय । सड़क अऊ सिक्षा, चिकित्सा सुविधा, बेरोजगारी रहय । चन्द्रकला देवी जी ह डयरी म नोट करले रहय । रायगढ़ के रेस्ट हाउस म मंत्री जी के नाव से दू कमरा बुक रहय । एक म पी. ए. अऊ गन मेन म रहय । एक कमरा म अधिकारी मन से चरचा, विचार-विमर्स करे बर रखे रहय । सरिया क्षेत्र के कार्यकर्ता मन रात रेस्ट हाउस म रूक जावय ।

चन्द्रकला देवी घर जईसे पहुँचथे, महिला मंडल के भीड़ सुवागत करे बर उमड़ पड़े रहय । सुवागत के बाद चन्द्रकला देवी रंधनी घर म रमौतीन दाई के पास जाथे, पीढ़ा म बईठ के कथे । कुछ रांधे होबे त दे । बेटी चीला रोटी बांचे हे । दू चीला रोटी, पताल के चटनी, लहसून, धनिया पत्तीडार के पीसे रहय । चन्द्रकला देवी बढ़िया चीला रोडी खाईच, एक गिलास पानी पीईच । पुस्पा देवी कथे, बेटी पूरनिमा अऊ चन्द्रप्रकास काल मिले बर आही, चिट्ठी आय हे । चन्द्रकला ल बधाई देय रहय । पुस्पा देवी बताथे, बेटी तोर बाबूजी के तबियत ठीक नईए । कथे, चल दाई बाबूजी के पास जाबो । बलराम ह खांसी, सर्दी से परेसान रहय । चन्द्रकला बाबूजी के पाँव छूथे । बईठ बेटी बईठ । खटिया पाटी म बईठथे । कथे बेटी बुढापा के बीमारी ए जलदी ठीक नई होवय । फेर उमर एक सौ दस बरिस के ऊपर होगे हे । तोर मंत्री बने ले मोर मन माढ़ गे, गर्व से सीना फूल गे । बेटी अब मर जाहंव त कोई चिंता फिकर नईए । पुस्पा ह बताथे । काली चन्द्रप्रकास अऊ पूरनिमा ह जबलपुर से अवईया हे । उत्कल एक्सप्रेस से आही । चन्द्रकला कथे बाबूजी डॉक्टर बुलावय । बलराम कथे बेटी दवाई के असर अब नई होवय । तोर माँ ह अतका सेवा करत हे । तब तो ठीक हंव । नई तो इंदौर म कब के ऊपर पहुँच गे रहितेंव । चन्द्रकला ह चन्द्रसेन ल बुलाके खांसी के कप सीरप मँगवा देथे । रात म चन्द्रकला देवी ह तेल मालिस कराके सो जाथे ।

क्रमशः

by-http://www.srijangatha.com

भाग- दस

2006-06-27T12:52:00.000-07:00

चन्द्रकला महिला मंडल के बईठक ले बस के सारंगढ़ आ जाथे । दूसर दिन के अखबार नवभारत, देशबंधु, अमृत संदेश, रायगढ़ संदेश म जोरदार बड़े शीर्षक के छपे रहय । सरिया म महिला मंडल के संयोजक चन्द्रकला देवी विधानसभा देवी दिधानसभा चुनाव लड़े के घोसना । चन्द्रकला देवी अपनी बाईस साल की नौकरी से त्याग पत्र देके चुनाव लड़ने की घोसना । महिला मंडल ने कमर कसे के तियारी करिच । महिला मंडल के एक हजार सदस्य हावय । एक गाँव म दू महिला सदस्य । जिला म सिरिफ चन्द्रकला देवी ही के चरचा होत रहय । चन्दा, मधु, उर्मिला, जमुना एक सौ बीस सरपंच के नाव रहय । तहलका मच गे ।

चन्द्रकला देवी, अपना माँ पुस्पा देवी, पिता बलराम, रामदेव अऊ कामदेव, मालूराम से नौकरी से त्याग पत्र देहे बर सलाह लेथे । सब कोई विधानसभा चुनाव लड़े बर कथे । मालूराम कथे अभी चुना चार महीना बचे हे । सरिया म तीन चार कमरा के कच्चा मकान बनवा ले । चन्द्रकला देवी नगरपालिका के नौकरी से त्याग पत्र दे देधे । बाईस साल म पेंशन के पात्रता आ जाथे । चन्द्रकला देवी के त्याग पत्र सारंगढ़ नगरपालिका परिषद के बइठक म संकल्प पारित होके स्वीकार कर लिये जाथे । त्याग पत्र के सूचना दे देथे । पूर्ण रूप से महिला मंडल के काम म लग जाथे । महिला बैंक के काम ल भी देखथे । सरकारी योजना के लाभ महिला मन ल मिलय । जोर से काम करे लगिच । कई महिला मन ल स्वरोजगार बर लोन भी देवाईच । विधानसभा के टिकट चन्द्रकला देवी को ही दिया जाय । आवेदन म एक हजार महिला मन के हस्ताक्षर तीन चार कापी करा लेथे । चन्द्रकला देवी रायगढ़ जाके कांग्रेस भवन म कांग्रेस के सक्रिय सदस्य के फार्म भरते त सदस्यता मिल जाथे । ठाकुर पृथ्वीपाल सिंह, जगतपाल सिंह ह मालूराम ल बधाई देथे । सरिया क्षेत्र में कांग्रेस के संगठन ल मजबूत करे बर जवाबदारी भी देथे । महिला शाखा के ब्लाक अध्यक्ष के जवाबदारी भी देथे । चन्द्रकला देवी रात रायगढ़ म रूक जाथे । पुस्पा देवी रमौतीन माँ के चरण छूथे । माता दाई मन आसीरबाद देथे । जलदी चुनाव जीत के विधायक बन । बलराम जी सतनाम के दार्सनिक पृष्ठभूमि, गुरू घासीदास की अमृत वाणी, पंथी गीत, सब ल पढ़त रहय । दीन दुःखिया मन के सेवा म लगे रहय । कोई व्यक्ति ल भूका नई रहे देवय । चौका आरती भी अपन घर म कराईच । सबके आसीस चन्द्रकला ल मिलथे ।

चन्द्रकला रात म भोजन करे बर मालूराम ल टेलीफोन करके बुला लेथे । रातभर चुनाव के योजना बनथे । कांग्रेस के टिकट के आवेदन कब बर दिल्ली जाय के योजना बनाथे । मालूराम कईथे, चन्द्रकला देवी यदि कांग्रेस के टिकट मिल जाही त पईसा के कोई कमी नहीं होवय । फेर मय तो हंव । जतका खरचा हो जावय । चन्द्रकला देवी मस्ती करके सो जाथे । चन्द्रकला ल जीवन के आनंद मिले के राह सरल दिखत रहय । अब तो रात दिन विधायक बने के सपना देखत रहय । चन्द्रकला देर से उठथे । रमौतीन दरवाजा खटखटाथे । चन्द्रकला, चन्द्रकला पुस्पादेवी भी जगाथे । चन्द्रकला कथे । दाई बहुत दिन के निसफिकर सोवत हंव । अब नौकरी म सारंगढ़ नई जाना हे, अभी सोवन दे । आठ बजे तक चन्द्रकला सोवत रथे । बाथरूम जाके आ जाथे । रमौतीन दाई चाय लाथे । पुस्पा देवी, रमौतीन, बलराम, रामदेव सब बईठ के अंगना म चाय पीथे । पुस्पा देवी कईथे, बेटी तय चुनाव लड़ीहंव कथस । अतका पईसा कहा पाबे । चन्द्रकला कथे । दाई कांग्रेस के टिकट मिलही त कोई पईसा के कमी नई ए । यदि नई मिलही त चुनाव नई लड़व । मोला पेंशन मिल जाही, पेंशन से गुजारा चल जाही । या कोई काम धंधा दुकान खोल लेहंव । रमौतीन कईथे । ठीक हे चुनाव लड़ । विधायक बन के दिखा दे । गरीब, चपरासी के बेटी भी ह विधायक बन सकत हे ।

चन्द्रकला गफ्फार भाई से मिले बर राज फोटो स्टूडियो जाथे । गफ्फार भाई के पाँव छूथे । जीते रहो । विधायक बनो । गप्फार चचा मय सरिया से चुनाव लड़िहंव कहत हंव । तोर से सहजोगक अऊ आसीरबाद माँगे आयहंव । गफ्फार भाई, आवाज लगाथे । चाय पियत बताथे, चन्द्रकला चुनाव लड़त हे । नौकरी से त्याग पत्र दे देहे । अम्मा कथे बेटी ठीक हे चुनाव लड़ विजय श्री जरूर मिलही । चन्द्रकला दूनों के आसीरबाद लेके कांग्रेस भवन जाथे । अध्यक्ष सचिव ल नमस्कार करके बताथे चाचा जी मय चुनाव लड़हू कहत हंव । मोला आसीरबाद दे । पृथ्वीपाल सिंह ठाकुर कथे । मोर आसीरबाद तो हमेसा तोर साथ रईही । मय सिफारिस पत्र कांग्रेस कमेटी कती ले लिख देथवं, दिल्ली जाके श्रीमती इंदिरा गांदी जी से मिल लेबे । पत्र लेके चन्द्रकला अपन घर आ जाथे ।

मालूराम शाम के आथे । मेडल का प्रगति हे । चन्द्रकला कथे, कांग्रेस कमेटी अध्यक्ष के पत्र मिलगे हे । दिल्ली जाके श्रीमती गांधी जी से मिले बर कहे हे । मालूराम कईथे, दू तीन झन महिला मंडल के सदस्य ल घलो ले चलिन । तंय सांरगढ़ अऊ सरिया जाके महिला कार्यकर्ता मन के नाम ले आ । दिल्ली जाय बर हे । चन्द्रकला रात म योजना बना के जाथे । बस से सरिया जाथे । महिला मंडल के सदस्य मन हस्ताक्षर कराथे । जमुना सर्मा ल कथे । चल दिल्ली घूम के आबो । जमुना सर्मा कथे, पईसा कहाँ ले पाबो चन्द्रकला कथे चल न मय तो खरचा करहूँ सिरफ साथ म जाना हे । नहीं नई कर सकिच । चन्द्रकला सरिया से सारंगढ़ बस म आ जाथे । चन्द्रकला मधु केशरवानी के घर जाथे । दिल्ली जाय के बात करथे । पति से पूछके बताहंव कथे । मधु ल ओकर पति जगन्नाथ कथे । दिल्ली म बड़ गड़बड़ होथे । महिला मन के इज्जत राजनेता मन लूट लेथे । मय नई भेजंव । मधु केसरवानी कथे । तय मोर ऊपर म सक करत हच । मोर उमर ल तो देख चालीस पैंतालीस के डोकरी ल कोन पूछही । फेर मोरपास का हावय त देहूँ । डोकरी होगे हंव । जगन्नाथ कथे जा भई तोर दिल्ली जाय के साध हे त । फेर मोला बद्दी झनदेबे, के मोला नई बताय । मधु कईथे तोला काबर देहंव । उल्टा मोला मजा मिलही त काबर कहिहंव । जगन्नाथ कथे, दिल्ली म ठंड बहुत पड़थे, गरम कपड़ा ले जाबे ।

चन्द्रकला ह चन्दा के घर जाथे । चन्दा अंगना ल छर्रा छिटा देत रहय । बढ़िया गोबर म लीपत रहय । चन्दा कथे । आ आ दीदी । बहुत दिन म आय हच । खटिया म बईठ । मय हाथ धोके आवत हंव । चन्द्रकला भी कुआँ कोती चल देथे । चन्दा ह पानी निकालथे । गोबर सने हाथ धोय लगथे । ओतके बेर भूरी अऊ कुसुवा आ जाथे । मेडम आगे कहिके नाचे कूदे लगथे । भूरी कथे बड़े दाई आजकल ईहाँ नई आवय । चन्द्रकला कथे बेटी मय रायगढ़ चल देत हंव । अभी आय हंव । तीसरी, चौथी म पढ़े चल दे रहय । अब नानकुन नई रहय । अब गोठ ल समझ जावय । चन्दा कथे दीदी कहाँ ले आवत हच । चुनाव के तियारी कईसे चलत हे । चन्द्रकला कथे । बहिनी ओही काम से आय हंव । तोर सरपंची कईसे चलत हे । ठीक हे दीदी । हमर ईहाँ के उपसरपंच अरूण यादव ह बहुत बदमास हे । गुंडा गरदी करथे । बार बार शिकायत करते हे । पईसा खाय ल नई मिलत हेत सिकायत कराथे । मय परेसान होगे हंव । भूरी के ददा ह कथे अऊ अपन अधिकार ल अतका जलदी नई दय । अपन तौहीन समझथे । चन्द्रकला कथे धीरे धीरे सुधरही भईया ।

चन्दा ल कथे तोला दिल्ली ले जाय बर आय हंव । चन्दा कथे नान-नान लोक लईका हे, फेर खेती किसानी फदके हे । घर देखईया भी कोनों नईऐ । समारू कथे, चन्दा यदि तय जाना चाहबे श्रीमती इंदिरा गांधी से मिले बरत जा । चन्द्रकला दीदी के काम हे त जरूर जा । फेर धियान रहे ऊहाँ उल्टी सीधा झन होवय । रीवा के बदमास मन डेरा डाले रथे । रेस्टहाऊस सांसद भवन म सीधी सादा देखके अपन मोह जाल म फंसा लेथे । चन्दा कथे । अतका सुधार तो मय नई अवं । जेमन लड़का मन मोहा जाय । दिल्ली देखे के सउख हे । कईसे दिल्ली सहर हे । देखतेंव । चन्द्रकला ल घर म थोड़ा परिवर्तन लगिच। परछी म टेबल कुर्सी लगगे रहय । जब से सरपंच बने रहय, आदमी मन आवत जावत रहय । चन्दा भी सरकारी काम म धियान देत रहय । ग्राम पंचायत के सचिव भी । परछी म बईठ के काम निपटावय ।सरपंच के परछी म पटवारी, ग्रामसेवक दाई, मलेरिया वरकर, सब झन एक दिन आके बईठय । घर म चहल पहल होगे रहय । चन्द्रकला कथे । सरपंची म मजा आत होही । हाँ दीदी मजा आत हे । कोई भी निर्णय मय करथंव । गाँव के लोग भी माने लगिन । अच्छा लगत हे । नवा, नवा काम ऐ । समारू ह चन्दा कथे । जरूर दिल्ली जा । तहूं ह भटगाँव या सारंगढ़ से टिकिट माँग के देखबे । चन्दा कथे ठीक हे । एक काम दो काज हो जाही । चन्द्रकला कथे जाथंव । बहिनी परसो बस बईठ के रायगढ़ आ जाबे । मधु, जमुना भी दिल्ली जाहय । साथ म लेके आ जाबे ।

चन्दा कपड़ा, लूगरा, चादर एक सूटकेस म बंद करके मधु के घर पहुँचथे । बस स्टैण्ड म जमुना पहिली ले आ गे रहय । तीनों झन बईठ के रायगढ़ आथे । चन्द्रकला हे घर गोसाला पारा रिक्सा म पहुँचथे । चन्द्रकला के दाई रमौतीन ह भोजन कराथे । मालूराम अग्रवाल ह पाँच सीट टिकिट आरक्षण कराय रहय । उत्कल एक्सप्रेस ठीक ग्यारह बजे रायगढ़ स्टेशन से छूट जाहय कहिच । चन्द्रकला ह रिक्शा म बईठ के रेलवे स्टेसन पहुँचथे । पाँच मिनट बाद ट्रेन आथे । अपन-अपन सूटकेस लेके ट्रेन म चढ़थे । मालूराम अग्रवाल सब सूटकेस ल जंजीर म बाँध देथे । चन्दा ह खिड़की मेर बईठ जाते । बड़िया सीन देखते, देखते चाम्पा पहुँच जाथे । चन्द्रकला, मधु, जमुना, चन्दा गप मारत-मारत जात रहय । बीच बीच म मालूराम भी बोलत जावय । डेढ़ बजे उत्कल हर बिलासपुर पहुँचिस । चन्द्रकला कथे कुछ ले लेना जी । हमन के सेवा करते त मेवा मिलही । मालूराम स्टेशन से सेव क दरजन, केला डेढ़ कलो, भजिया, बिस्कुट रख लेथे । जल्दी ट्रेन म चढ़ जाथे । चन्दा खते काबर बेचारा ल परेशान करत हव । हमन ल बुजुर्ग हे । चन्द्रकला कथे अब बुढ़वा होगे । पहिली बने जोर मार रहिच । गरम-गरम भजिया ले खाव । मधु शरीर से भारी होगे रहय । जमुना बुजुर्ग महिला होगे रहय । चन्दा ह जवान रहिस । दउड़ दउड़ के पानी, खाना, खिलावय । सबके चहेती बनगे रहय, पद भी सरपंच होये के कारण जन सेवक बने गे रहय । बढ़िया खात पीयत, सोवत, जागत ट्रेन बड़े सुबेरे दस बजे दिल्ली पहुँचथे ।

चन्द्रकला, मधु, चन्दा, जमुना, अपन-अपन सूटकेस ल धर के उतर जाथे । मालूराम चेक करके पाछू उतरथे । मालूराम नई दिल्ली रेल्वे स्टेसन से टेक्सी द्वारा नार्थ एवेन्यू कमरा बंबर 182 सांसद बिलासपुर मिनीमाता ह दरवाजा ल खोलथे । मालूराम अऊ चन्द्रकला देवी कथे माताजी हमन रायगढ़ सारंगढ़ से आय हन । चंदा माता जी के चरण छूथे । सब कोई क्रम से चरण छूथे । माता जी अंदर ले जाथे । पानी चाय चपरासी ल लाय बर बोलथे चन्दा बोलथे माताजी मय सतनामी आँ । रानी सागर गाँव के सरपंच अवं । माताजी कथे । वाह बेटी, तही छत्तीसगढ़ के असली बेटा आंच। चंदा गदगद हो जाथे । चन्द्रकला देवी ह कईथे माताजी आप श्रीमती इंदिरा गांधी जी से मिलवा दे । मय सरिया विधानसभा से चुनाव लड़िहंव खातिर कांग्रेस से टिकट माँगे बर आंय हंव । माता जी आपके आसीरबाद मिल जाही त टिकिट जरूर मिल जाहय । चन्द्रकला कथे माताजी मय ब्लाक कांग्रेस कमेटी के अध्यक्ष भी हंव ।

मिनी माताजी कईथे बेटी हो, चाय पीके स्नान ध्यान करके तियार हो जावव । बगल वाले कमरा खाली हे । मालूराम दूसर कमरा म जाके स्नान करत रहय । चन्द्रकला वहाँ पहुँच जाथे । कथे माताजी के किरपा ले मोला टिकिट मिलही । मालूराम कईथे, पाँव ल पकड़ ले । श्रीमती गांधई से मिलवा देही । चन्द्रकला वहीं जलदी नहा लेथे । चन्दा, मधु, जमुना जलदी तियार हो जाथे । माताजी पूछते । भोजन सब मिलके पका के खावव । सब समान हे । चन्दा कथे । माताजी मय भोजन बनावत हंव । आज ले मय रसोई सम्हार हूँ । माताजी कथे ठीक हे बेटी जतका दिन रईहा रहव । मय संसद भवन जाथंव । श्रीमती इंदिरा गाँधी से वही बात कहूँ । टाईम दे देही त मय तुरंत आहूँ । या बँगला म मिलके । माताजी संसद भवन बईठक म चल देथे ।

चन्दा, मधु, जमुना तीनों मिलके भोजन बनाय के तियारी करथे । सब दिल्ली म घर के मजा लेके खाईन। माताजी संसद भवन से एक बजे भोजन अवकास म आईच ।चन्दा भोजन परोसथे । बेटी बहुत दिन के बाद म अच्छा भोजन खाय ल मिलिच । बेटी गाँव के भोजन म जो सुवाद रथे सहर म नई मिलय । चन्दा कथे माताजी मोला भोजन रंधईया रख ले । माताजी कथे फेर रानी सागर के सरपंची कोन करही । तय सरपंची कर बेटी । बहुत कम महिला ल पास मिलते । फेर आगे जाना हे । विधायक के टिकिट भी माँगत हच । मय तोर बात बेवहार, चाल चलन से खुस हंव । तय जरूर आगे बढ़बे । माताजी आसीस देबे । तब होही मोर काम । माताजी कथे । बेटी तय तो मोर घरके बेटी अच । मोर आसीरबाद हमेसा रईही । माताजी बताथे कि श्रीमती इंदिरा गांधी ह कल सुबह नौ बजे मिले के समय देहे हे । कल जलदी तियार हो जाहा । चन्द्रकला गदगद हो जाथे । मालूराम कथे, आवेदन पत्र कई प्रति म तियार कर ले । चन्द्रकला कथे । तीन प्रति म तियार करले हंव । चन्दा वारे भी सारंगढ़ बर आवेदन पत्र बनाथे ।

चन्द्रकला देवी, मधु, जमुना अऊ चन्दा देवी स्नान करके तियार हो जाथे । मालूराम भी स्नान करके तियार हो जाथे । चंदा जल्दी चाय बना लेथे । माताजी बैईठक म आथे बईठ जाथे । लउहा लउहा चाय पी के त्रिमूर्ति भवन कोती निकल जाथे । मिनी माताजी अउ संग म सब की ठीक आठ पैंतालीस म वेटिंग रूम म पहुँच जाथे । पी.ए. चार्ज ल स्लीप मिनी माता देथे । मिलने वाला मन के सूचीनाम रहय । जार्ज स्वयं लेके मिनी माताजी ले जाथे । मधु, चन्द्रकला, चन्दा, जमुना देवी चरण स्पर्श करथे । माला भी पहिनाथे । माताजी कथे । मोर छत्तीसगढ़ के बेटी ऐ । चन्द्रकला देवी, चन्दा वारे, आवेदन पत्र श्रीमती इंदिरा गांधी ल देथे । आवेदन पत्र म कलेक्टर, जिला कांग्रेस कमेटी के अनुसंसा, एक हजार महिला मन के हस्ताक्षर, एक सौ बीस सरपंच के हस्ताक्छर रहय । मिनी माताजी कथे मेडम दोनों महिलाओं को कांग्रेस की टिकट दे दीजिए । श्रीमती गाँधी आस्वासन देथे । वर्किंग कमेटी से पास करवा दूँगी । चन्द्रकला देवी चन्दा देवी, पाँव छूथे आसीरबाद माँगथे । मालूराम, जमुना देवी, मधु, चन्दा देवी, मिनी माता के साथ वापस कमरा म आ जाथे । मिनी माता कथे । बेटी हो मय तो जाथंव रायपुर । आप लोग जब तक रहना हो तो रहो । मय एक कमरा बंद कर देथंव । तुमन दिल्ली मस्त घूमव फिरव । माताजी रायपुर रात के गाड़ी से चल देथे ।

मालूराम चन्द्रकला देवी, चन्दा, मधु अऊ जमुना देवी सब म.प्र. भवन म मुख्यमंत्री अर्जुन सिंह जी से मिलथे । विधायक टिकट बर आवेदन पत्र देथे । पाँव छूथे आसीरबाद माँगथे । श्रीमती गांधी से मिलने के बात बताथे । अर्जुन सिंह जी ह पूरा पूरा भरोसा दे देथे । क्षेत्र म काम करे के निर्देस भी दे देथे । मालूराम महिला मन ल दिल्ली घुमाथे । दिल्ली के कुतुब मीनार, लाल किला, चाँदनी चौक, नगरपालिका मार्केट, जंतर-मंतर, मुगल गार्डन, इंडिया गेट, दिन भर घुमाथे । सब कोई थक के बईठ जाथे । इंडिया गेट म गुपचुप खाथे । भेलपुड़ी, मूँगफली भी लेथे । समूह म फोटो भी खिचाथे । ऊहाँ ले बस म बईठ के नार्थ एवेन्यू आथे ।

नार्थ एवेन्यू के सरवेंट क्वार्टर म दो झन रीवापारी ब्राम्हन ठहरे रहय । मालूराम के क्रियाकलाप देखत रहय । चार पाँच दिन ले खुफियागिरी करत रहय । चन्द्रकला देवी अऊ मालूराम जाके सोगे एक कमरा म । चन्दा, जमुना, मधु दरवाजा बंद किये बिना सोयके तियारी करह रहय । ओतके बेरा खिड़की ले कूद के दू बदमास मन आ जाथे । चन्दा ह बाथरूम गय रहय । मधु ल पकड़ लीन । जमुना वृद्ध महिला ल चाकू दिखा के कपड़ा उतवा लेथे । डरके मारे जो बदमास कहीन वही मधु अऊ जमुना करे लगीन । दूनो बदमास चाकू को जोर म डरा धमका के काम निकालत रहय । चन्दा देवी बाथरूम से निकलथे, देख के आगी लग जाथे । अऊ बदमान मन के ऊपर टूट पड़थे । बाघनिन जईसे । कछरा भीर के एक बदमास ल पीछू ले एक लात मारिच । दम ले मुंह के भर गिरगे । चाकू दूर म फेंका गे । चन्दा चाकू ल लूट लेथे । परछी म दूसर बदमाश ह भीड़े रहय । पाछू ले एक लात मारिच । ओह ह दीवार म माता-टकरा के अचेत हो जाथे । मधु के हिम्मद बढ़िगे रहय बिना कपड़ा के बदमाश के छाती म चढ़गे । लात घूंसा से दे पिटाई जमुना देवी ह घलो लात घूसा से पिटाई सुरू करीन जब तक बेहोश नई होईपन । पीटते रहीन । चन्दा देवी दूनो बदमास के हाथ पाव बांध के सूअर जईसे बांध दे रहय । दूनो बदमास मन अधमरा होगिन । मधु छाती म बईठे रहय, वईसे भी भारी शरीर टस से मस नई करिच । चन्दा गारी देथे । बेर्रा, भडुवा, रोगहा हो, तुंहर दाई बहिन नी होही का ? तुमन छत्तीसगढ़ी औरत म ल कमजोर समझथ । तुहर खून लहू भी जाहंव, अभी तुमन का देखेहव । मधु अऊ जमुना लूगरा, पोलखर, पेटीकोट पहिने लगिन । हल्ला सुन के चन्द्रकला देवी भी आ जाथे । देख के डारके मारे कांपे लगथे । चन्दा बताथे । दीदी बदमाश गलत नियत से आय रहीन । चाकू के नोक से डरावत धमकावत रहीन । जान के मारे के धमकी देके कपड़ा उतरवा के काम सुरू कर दे रहीन । ओतके बेरा मय बाथरूम से निकलेंव । फेर मोर सरीर म आगी, भूर्रीबर गे टूट पड़ेव बेर्रा, भडुवा मन के उपर । सुअर जईसे बाँध के रखेंव ह । मधु, जमुना, चन्दा ल धन्यवाद देथे । आज हमर इज्जत अऊ जान ल बचा दे । चन्द्रकला देवी भी धन्यवाद देथे । तोर जईसे हिम्मती नारी होना चाही । तय दूझन मरद ल मार मार के चेहरा बिगाड़ देहे । ऐमन कभू औरत मन ल नई छेड़ही ।अऊ बलात संग नई करही ।

चन्द्रकला नाईटी पहिने रहय । मालूराम ल कईथे, चल उठ । का होगे तोला देख । का कबसे चल उठ। आँकी रमजत, उठिच । चन्दा है बताईच । मालूरमाम कथे बड़ हिम्मत के काम करे हच । चन्द्रकला देवी अऊ मालूराम भी चार-चार पाँच-पांच लात मारथे । मालूराम पूछथे । कहाँ के हो रे । सर हम लोग रीवा, सतना के आन । ईहाँ रोजी मजूरी करे आय हन । हमन के चोरी के नियत से घूरे रहीन । पेर हमन के नियत बदलगे रहिस । गलत काम करके बाद म जेवर, गहना, रूपिया, पईसा लेके भाग जातेन । सरवेंट क्वार्टर म रहिथन । चन्द्रकला कथे । मालूराम जी चन्दा, मधू, जमुना यदि पुलिस म रिपोर्ट दर्ज कराबे त बार बार पेसी म य लगही । बलात्कार के प्रकरण भी बनही । पुलिस वाला मन फोर फोर के पूछही । जो इज्जत बजे हे ओहू चले जाही । मधु कथे हमर जान बाचगे भले इज्जत म हाथ डालत रहिस । जीवन म कईठन दुर्घटना होत रईथे । चन्दा देवी ह हमर इज्जत अऊ जान ल बचा दिच । जमुना देवी कईथे मोर मानिहव त कहत हंव । जतका गलती करे के ओकर ले जादा पिटाई करें हंव । दू चार लात मारके, नाम, पता लिखलव । अऊ नई दिल्ली छोड़े ल कह दव । आज ही रीवा चले जाय ।

जमुना देवी के कहना सभी मानथे । पुलिस के चक्कर नई पड़ीन कहिके । चन्दा देवी के गुस्सा सांत नई होय बेर्रा मन ल सबक सिखाना चाही । बहुत छटपटाथे, चिल्लाथे, सुअर जईसे बांध देय रहय । मालूराम कथे कल जाना भी हे । साले बदमाश मन के नांव तो लिखलंव । पूछते तोर का नाव हे, सुभास सर्मा, तोर नारायण त्रिवेदी । एक लात, मारथे । साले तुमन तो सीधा दीखत हंव रे । फेर तुमन चोरी चमारी काबर करत हव । दूनो झन बहुत गिड़गिड़ाथे, चिरौरी बिनती करथे, माफी माँगथे । अब अईसे गलती नई करबो । हम अभी रीवा भाग जाथन । हमला पुलिस म झन दे । पाँव पड़त हन । बहुत माफी माँगे के बाद चन्द्रकला देवी कथे । भाग साले हो । जमुना कईथे रीवा राज के मन सब अईसे । मूत पिअईया ऐ । दू दू लात सब फेर मारिन । चन्दा कथे । जादा झन मारीन नई तो मर जाही बेर्रा मन । फंस जाबो । मधु कईते ईकर गलती के सजा मिलगे । चन्दा ह रस्सी के गांठ ल छोड़ देथे । मालूराम कईथे, आसपास नई दिखना चाही । नई तो पुलिस ल बुला लेबो, दूनो बदमास मन जी बचाके भाग जाथे । ये घटना ले सबके नींद उचट गय रहे, गोठबात म बिहनिया होइस ।

क्रमशः

By-www.srijangatha.com